¹ O Diedo den yedi Moyiisi, "Falacianyendo go ye, ke n ba waani Farawɔn yeni Ejipti yaaba. Lani ya pendi, o ba cedi yaadi o diema nni. O ba beli ki yaani yi cain. ² Maadi bi jaba yeni bi puoba ke yuakuli ń mia o lielo yeni o kuantalielo ŋanjilfa tiadi yeni wulatiadi." ³ O Diedo ji den cedi ke Ejipti yaaba pali mani Israyeli yaaba po, ke bi bua bi maama. hali ke Moyiisi tua Ejipti yaaba po yeni Farawɔn naacenba po, nicɔlinka yua ke bi fangi, ki go selni boncianla. ⁴ Moyiisi den yedi, "O Diedo yedi ya maama ne: 'Ku yɔgsiigu yognu, N ba jiidi ki kua, ki tɔgni Ejipti diema nni kuli. ⁵ A bijakpela kuli ba kpe Ejipti diema nni, ki cili Farawɔn yua n kaa ti gbandi po bijakpelo, ki ban juodi o poyonbo yua n ye li nannandeli nni ki naani ya bijakpelo, ki taani yeni yandi bikpiala kuli. ⁶ I kumoe baa ye boncianla Ejipti diema nni, ban kikpeli ki la ya yema, ki kan go fandi ki la ma. ⁷ Ama bá sangbanlo ka gbegni Israyeli yua po, lan tie nilo bii yanga po, likan tieni. Yeni i ke i ba bandi O Diedo ń tieni ya paadma Ejipti yaaba yeni Israyeli yaaba siiga nni.' ⁸ Farawɔn, a naacenba ne kuli ba cua n kani, ki gbaani n nituali nni, ki pugi nni. Bi ba yedi, 'Gedi mani, yinba yeni i ŋɔdkaaba kuli!' Lani ya pendi, N ba siedi ki gedi." O den siedi Farawɔn kani yeni pabiencianli i. ⁹ O Diedo den yedi Moyiisi, "Farawɔn kan cengi a maama. Li buali ke min tieni yaaliggu bancianma Ejipti diema nni i." ¹⁰ Moyiisi yeni Haarɔn den tieni lanya yaalidgu banma kuli Farawɔn nituali. Ama, O Diedo den juagi Farawɔn pali hali ke Farawɔn den ki bua wan cedi Israyeli yaaba ń ña o diema nni.