¹ O Diedo den maadi Moyiisi yeni Haarɔn Ejipti diema nni. O den yedi, ² "I ya po, ya ŋmaalo ne baa tie i po i ŋmaali kuli ya cilma, li baa tie i po li binli ŋmaacincinli i. ³ Maadi Israyeli nitaamli, 'O ŋmaalo ne dana piiga daali, ban cuo pebiga bii ŋuabiga bi diegu po, diegu kuli ń tieni la, pebiga o diegu yaaba kuli po. ⁴ Diegu ya waagi yeni pebimunga, o diedaano yeni o kuantalielo ba fidi ki taani ki bɔgdi ya nandi n ba dagdi bi diegu nni yaaba kuli. Li buali ke ti nandi ń ya yabi, ki dagdi yuakuli i, lanwani ii, ban taa ya nandi ke yuakuli ba ŋmani lan dagdi o. ⁵ ki pabiga kan ya pia pɔdi, binyenli pabiga. Li ba fidi ki ya tie pabiga bii guabiga. ⁶ I baa kubi ga hali o ŋmaalo ne piiga n danaali. Israyeli nitaanli kuli ba padi ga li daali o yenjuogu. ⁷ Ban ba ŋmani ki nandi ya diegu nni kuli, bi ba taa ki sɔma, ki faani li ganjali daasieda, yeni jaantalga. ⁸ I ba ŋmani ki nandi lanya ñiagu, i ba puli ti nandi, ki ŋmani yeni ya kpanu n ki tieni dabinli yeni ti muatontondi. ⁹ Yin da ŋmani nankaadi bi nanŋaardi. Ama yin puli yeni ki yuli yeni ki taana yeni tugu nni yaali kuli. ¹⁰ Hali yeni lan ba fandi, libakuli kan sieni. Yaali n sieni kuli, yin juu. ¹¹ Yin ba ŋmani li nandi maama n ne: Yi ñagni i ciamu u gbanñagdu, ki pili ti taacaadi, ku mubni i gbiami. I ba ŋmani ti tontoni. Li tie O Diedo pendma jaanma i. ¹² O Diedo den yedi ya maama ne: N ba kua ki tɔgni Ejipti diema nni kuli ku ñiagu ne, ki pua ki kpa bi niba bijakpelba yeni ti yandi bikpela Ejipti diema nni. N ba buu, ki cuo Ejipti buli kuli. Mini n tie O Diedo. 3 Mi sɔma maalma i diedi po n ba waani n pendma yognu, yin ye naani. N ya la mi sɔma, N ba pendi ki ŋa yi yeni laafia min baa pua Ejipti yaaba ya yognu. Lanya falaciamo kan ŋɔdi yi, ki biani yi. ¹⁴ Lanya daali ba tua i po ya daali ke i baa tundi ki tiani, ki kan sundi hali bada. Li daali li buali ke yin bobni jaancianma, ki kpiagi O Diedo yeli. Li ba tua i po bogdili, i buolu nni nifiima ń tuu nifiima kuli, yin ya tiendi li bogdili lanya daali. ¹⁵ Li buali ke yin ŋmani ya kpanu n ki tieni dabinli ki biini dana lele. Li daacincinli daali, yin ñani li dabinli i diedi nni. Yua n ŋmani kpanu ke li tieni dabinli, ki cili li daacincinli daali, ki ban tuoni li daaleleli daali, li buali ke lan ñani o Israyeli buolu siiga. ¹⁶ Li daacincinli daali, li taancianli baa ye, ki gagdi ki tie Mini ya po, li daaleleli daali mɔ, li taancianli go ba tieni. Lanya dana, tuonli kan sɔni, li nan ya ki tie mi jiema tienma bi niba kuli po yaa ka. Mi jietienma baba n baa tie yin ba fidi ki sɔni ya tuonli. ¹⁷ I baa tiani ki bobindi ya kpanu n ki tieni dabinli jaancianma kelima lanya daali i, ke n den bobni yi tɔbcagli cagli, ki ñani yi Ejipti diema nni. Lanwani ii, i buolu baa tiani ki tie li bogdili nifiima n tuu nifiima. Li baa tie i po, yikodi bogdili i. ¹⁸ I baa ŋmani ya kpanu n ki tieni dabinli, ki cili o ŋmaakpialo o piiga n daanaali yenjuogu, ki ban tuoni li ŋmaalo o piilie n daayenli daali yenjuogu. ¹⁹ Li daaleleda siiga nni, dabinli ń da ye bá waamu i diedi nni. Yua n ŋmani ya kpanu ke bi tieni dabinli, li buali ke yin ñani o Israyeli yaaba nitaanli nni, wan tie caano yo oo, bii dogtielo yoo, lani n yeni. ²⁰ I kan kuani i ñɔbu nni ya jiedi n pia dabinli. Yin li kua naankani kuli, li buali ke yin ŋmani ya kpanu n ki tieni dabinli i.'" ²¹ Moyiisi den yini Israyeli yaaba nikpelba, ki yedi ba, "Kuni mani ki ban lugdi ti yandi ki padi, ki bobni mi pendma jaanma i diedi nni yaaba kuli po. ²² Lanwani ii, yin padi Isɔpi tiiga benli, ki ñua mi sɔma yaama ke i ga ku tadigu nni. Yin faani li ganjali daapandu yeni li daasiedlieda. Obakuli ń da ña o diegu nni hali yeni ku siŋaagu. ²³ Kelima O Diedo ba tɔgni, ki ya pua Ejipti yaaba, O ya la mi sɔmi li ganjali daapandu po yeni li daasiedilieda po, o ba pendi ki ŋa i ganli, o kan cedi o biididaano ń kua i diedi nni ki pua yi. ²⁴ Yin ya kubi li bogdili. li baa tie yikodi bogdili i, yinba yeni puoli ŋuani po. ²⁵ I ya kua O Diedo puni yi ya diema nni, nani wan den niani yi maama, yin ya kubi li bogdili ki pugi U Tienu hali yeni ya yognu kuli. ²⁶ I bila ya buali yi, 'Li bogdili niima nni tie be i?' ²⁷ Yin yedi ba, 'Li tie salga yidma O Diedi pendma po, kelima, O Diedo den pendi ki Israyeli yaaba diedi yeni laafia, Ejipti diema nni, wan den pua Ejipti yaaba ya yognu. O den faabi ti diedi nni yaaba kuli ke ti ciadi. ²⁸ Israyeli yaaba den gedi ki tieni nani O Diedo ń den bili Moyiisi yeni Haarɔn ya ñɔmaama yeni. ²⁹ Ku yɔgsiigu, O Diedo den woli Ejipti diema nni yaaba, ki pua ki kpa bi bijakpelba kuli, ki cili Farawɔn yua den kaa ti gbandi po bijakpelo, ki ban juodi yua n ye li kpaadidieli nni bijakpelo ki taani yeni ti yandi bikpiala kuli. ³⁰ Farawɔn den findi ku ñiagu nni -wani, o naacenba yeni Ejipti yaaba kuli. I kumoe den yabdi boncianla Ejipti diema nni, kelima, bá dieyengu den ki ye Ejipti diema nni, ke kuuma ki ye li niinni. ³¹ Farawɔn den yini Moyiisi yeni Haarɔn ki yedi ba, "Fii mani ki ña ki ŋa n niba, yinba yeni Israyeli yaaba kuli. Gedi mani ki ban pugi O Diedo, nani yin den yedi ke i bua tieni maama. ³² Taa mani i yangbenga yeni i yanbidi ki yaadi, nani yin den yedi maama yeni, yin go yadi mi yedŋanma n po." ³³ Ejipti yaaba den peli ki bua ban ñani Israyeli yaaba tontoni bi diema nni, kelima, bi den tua, "Mi kuuma ba bolni tikuli." ³⁴ Lanwani ii, Israyeli yaaba den fii ki taa bi kpanu yonbugdi, kaa tieni dabinli. Bi den bobni bi tiadi kuli ki loli bi ŋadiidi nni, ki bugi bi buapiadi po. ³⁵ Israyeli yaaba ji den tieni nani Moyiisi ń den yedi ba maama yeni. Bi den mia Ejipti yaaba ŋanjilfa tiadi yeni wula tiadi yeni ti tiayiekaadi. ³⁶ O Diedo den cedi ke Ejipti yaaba pali mani Israyeli yaaba po. Lanwani ii, Ejipti yaaba den puuni ba ban miadi ba yaali kuli. Bi den fagi Ejipti yaaba yeni i. ³⁷ Israyeli yaaba cenli nni, bi den fii Ramisesi dogu ki gedi Sukɔti dogu. Bi den pundi jaba tuda kobiluoba (600.000), ki cuoni, ki pugni bi puoba yeni a bila. ³⁸ Bi canba den ye, kaa tie Israyeli buolu yaaba, ki yegi yeni ba, I yankuli mo den ye, a yangbenga yeni ti yanbidi. ³⁹ Bi den taa ban den kubi ya kpanu yonbugdi ki pua kpanu kaa tieni dabinli, kelima bi den beli ba ki ñani ba Ejipti diema nni, bi den kan la yaanma ki tieni jiema. ⁴⁰ Israyeli yaaba den kua Ejipti diema nni ki tieni bina kobina n bina piitaa (430). ⁴¹ Bina 430 juodma, li daajuodidaali mɔno i, ke O Diedo tɔbcaga den ñani Ejipti diema nni. ⁴² LI den tie ya ñiagu n ki pia guama kelima O Diedo ba ñani ba Ejipti diema nni. Li den tua ya ñiagu n gagdi ki tie jaancianma O Diedo po, binlikuli, ke Israyeli yaaba kuli ba taa, kun tua bogdili bi po hali nifiima ń tuu nifiima. ⁴³ O Diedo den yedi Moyiisi yeni Haarɔn, "Min bili ya ñɔbonli mi pendma jaanma po n ne: Caano kuli kan taani ki di yeni yi li jiema. ⁴⁴ Ama, Israyeli yua yonbo, wan daa yua yeni o ligi, ba fidi ki taani ki di yeni yi, ama kase ke bi kuani o ku kɔnciagu. ⁴⁵ Bi canba yeni ban ga ya tuonsɔnba lebli kan di lanya jiema. ⁴⁶ I ba di li jiema dieyengu nni i. I kan taa nandi ki ñani niinpo, i go kan mudi kpabli mo. ⁴⁷ Israyeli nitaanli kuli baa kubi, ki cɔlni Mi Pendma jaanma bogdili i. ⁴⁸ Caano ya kua yeni yi, ki bua wan taani ki tieni yeni yi li bogdili, yin dá kuani o ku kɔnciagu o, wan fidi ki taani yeni yi li bogdili nni. O ba tua nani dogtielo yeni i. Ama, yua n ki kua kɔnciagu kan leni lanya jiema. ⁴⁹ Li ñɔbonli tie yenma i o dogtielo po yeni ya caano n ye yeni yi kuli." ⁵⁰ Lanwani ii, Israyeli yaaba den tieni nani O Diedo ń den bili Moyiisi yeni Haarɔn li ñɔbonli maama yeni i. ⁵¹ Li den tieni yeni i, ke li daali mɔno, O Diedo den ñani Israyeli yaaba ke bi cuoni nicagli cagli nani a tɔbgola yeni.