¹ O Diedo den maadi yeni Moyiisi, ki yedi o, ² "Gagdi npo bijakpelo ń tuu bijakpelo kuli, Israyeli yaaba siiga nni bi niba kani yeni ti yandi kani. A bikpiala kuli tie N yaaba i." ³ Moyiisi den yedi li nitaanli, "Yin ya tianilanya daali, Y daali ke bi ñani yi Ejipti diema nni, ki faabi yi yeni ti yonbidieli nni. O Diedo nuu paaciamu po i, ke o ñani yi li diema nni. Obakuli kan ŋmani ya kpanu ke bi tieni dabinli . ⁴ I fii ñani lanya daali i Ejipti diema nni, Abiiba ŋmaalo nni (ku tontongu yeni o naalando siiga) ⁵ O Diedo ń gedi yeni yi Kanana, Hititi, Amoriti, Hifiti, yeni Jebusiti yaaba diema nni, wan den poli ki niani i yaajanba ke o ba teni yi ya diema, mi naaŋanma yeni ti siadi ń puubi naankani- Lanwani ii, baa tiani ki tie li bogdili lanya ŋmaalo nni. ⁶ I ba tieni dana lele, ki ŋmani ya kpanu n ki tieni dabinli; li daaleleli daali, li baa tie jaancianma i O Diedo kpiagdi po. ⁷ I baa ŋmani ya kpanu n ki pia dabinli lan daaleleda kuli; I siiga nni, obakuli kan ŋmani ya kpanu n pia dabinli. Ban da la yi yeni dabinli i diema nni kuli. ⁸ Li daali, i ba maadi i bila, 'Li tie kelima O Diedo Paaciamu tuona po i, ke ti fidi ki ñani Ejipti diema inni.' v 9 Li baa tie tiadma i ke i muubi i nui nni, ki bili i yula nni. Li ji tie O Diedo ñɔbonli, yaali n baa ye i ñɔbu nni, kelima, O nuu paaciamu po, O ñani yi Ejipti diema nni. ¹⁰ Lanwani ii, li buali ke yin kubi, ki cɔlni li ñɔbonli yeni li bogdili yeni lan buali ya yogu binli ń tuu binli. ¹¹ O Diedo ń caa yeni yi kanana diema nni nani wan den poli ki niani yi yeni i yaajanba ke o ba tieni yaali, O ya teni yi mi diema, ¹² I ba gagdi O po bijakpelo kuli yeni ti yandi bikpiala kuli. A bonjala kuli baa tie O Diedo yaa i. ¹³ Li ya tie ŋunbikpiaga, yin taa bebiga ki daa ki faabi ga. I ya ki daa ki faabi ga, yin nan kɔnli ki tulu. Ama i bonjakpimu kuli, li buali ke yin daaki faabi mu i. ¹⁴ I bila ye ti buali yi, ' Li niima nni tie be i?' yin ba jiini ba yaama n ne, ' O Diedo nuu paaciamu po i, ke o den ñani ti Ejipti diema nni, a yonbdela nni. ¹⁵ Farawɔn ń den tieni nangbanma, ki yie ke o kan cedi tin gedi, O diedo den kpaa bonjakpiaga ń tuu bonjakpiaga kuli, ki taani yeni ti yandi bikpiala kuli, Ejipti diema nni. Lanyapo i ke li buali ke min taa yanga kuli bikpiaga, ki padi, ki yidi O Diedo po salga, ki go buali ke min daa ki faabi n bonjakpiaga. ¹⁶ Li ba tua tiadma banma a nui nni yeni a yutunli po, kelima O Diedo den ñani ti yeni o nuu paaciamu i, Ejipti diema nni. ¹⁷ Farawɔn ń cedi ke Israyeli buolu gedi, U Tienu den ki cedi ke bi tɔgni Filisteninba diema sanu ka, ama li diema den ki fagi yeni ba. Ama U Tienu den yedi, "Li ki kua Israyeli yaaba ba fidi ki lebdi bi maalma, ki sani bu tɔbu ki guani ki lebdi Ejipti diema nni." ¹⁸ Lanwani ii, U Tienu den cedi ke li nitaanli cuoni ki lini mi fanpienma nni yeni ku mɔgmɔngu siigs nni. Israyeli yaaba den fii ki ña Ejipti diema nni, ki bobni ti jatiadi bu tɔbu po i. ¹⁹ Moyiisi den cedi ke bi piidi Josefi kpaba ki caa yeni a, kelima Josefi den cedi ke Israyeli yaaba poli, ke o yedi ba, "Li ki pia tama ke U Tienu ba gɔndi yi ki faabi yi, I ya caa, yin piidi n kpaba ki gedi yeni a, yin caa naani. ²⁰ Israyeli yaa den ñani Sukɔti dogu nni, ki gedi Etama dogu, mi fanpienma juodma, ki caani bi jongu, ki kali. ²¹ O Diedo den ye bi liiga u yienu, li ŋunli talwadi nni, ki ciandi ba, ki wangi ba u sanu ; ku ñiagu ke o ye u mu talwadi nni, ki yendi ba, ki wangi ba u sanu. Yeni i ke bi den cuoni yenu yeni ñiagu. ²² O Diedo den ye yeni ba yienu kuli yeni li ŋunli talwadi, ku ñiagu mo, yeni n mu ya talwadi.