¹ O Diedo den maadi yeni Moyiisi, ki yedi, ² Yedi Israyeli yaaba ke ban gɔgdi ki caani bi jongu ki da ki pundi Pi Hahroti, lani n tie Migdoli yeni ku mɔgmɔngu siiga, Baali Sefɔn nintuali. I ba caani i jongu mi ñincianmɔnma kani kaa fagi yeni Pi Hahiroti b ³ Farawɔn ba maadi Israyeli yaaba maama, ki yedi, 'Bi yaadi Ejipti diema nni, ki ban waa ki jilni mi fanpienma nni, ki bodi.' ⁴ N ba juagi Farawɔn pali, wan cedi ban ŋɔdi ki naa ba. N ba baa li seli yeni ti kpiagdi kelima Farawɔn yeni o jakɔnda po. Ejipti yaaba ba bandi ke Mini n tie O Diedo." Lanwani ii, Israyeli yaaba den caani bi jongu nani ban den bili ba ya ñɔbonli yeni i. ⁵ Ejipti badciamo ń gbadi ke Israyeli yaaba sani ki yaadi bi diema nni, ke Farawɔn yeni o naacenba guani ki tiadi bi po. Bi den yedi, "Be n cedi ke ti sɔni lanya tuongundili, ki cedi ke Israyeli yaaba sani ki fuodi yeni ti tuona?" ⁶ Farawɔn den bobni o tɔbturgu ki taa o jakɔnda. ⁷ O den lugdi tɔbturdi kobiluoba, ki taa ya tɔbturdi n sieni Ejipti diema nni, yeni sejenba yudanba li turdi kuli po. ⁸ O Diedo den juagi Farawɔn, Ejipti badciamo pali, ke o bado ŋɔdi ki ba naa Israyeli yaaba, ki woli ba. Israyeli yaaba den ñani ki fagdi, ki ye yeni li pamancianli. ⁹ Ama, Ejipti yaaba yeni bi tɔbturdi, bi taami yeni bi tandanba, yeni bi jakɔnda den ŋɔdi ki ba naa ba, ki woli ba. Bi den cua ki ludi Israyeli yaaba, ke bi caani bi jongu ku mɔgmɔngu kani, kaa fagi yeni Pi Hahiroti, ki kuu yeni Baali Sifɔn. ¹⁰ Farawɔn ń nagi bi kani, I srayeli yaaba den la ba ke li cuo ba ti jawaandi. Ejipti yaaba den ŋua ki bua naaba, ke ti jawaanciandi cuo ba. Israyeli yaaba den buudi O Diedo po. ¹¹ Bi den yedi Moyiisi,"Li tie ke kakula n den luo Ejiptidiema nni, ke a taa ki cua yeni ti hali mi fanpienma nni ke tin kpe? Be cedi ke a sɔni lanya tuonli, ki ñani ti Ejipti diema nni? ¹² Ti den ki maadi a Ejipti diema nni yeni ka aa ? Ti den yedi a, 'Cedi ti, tin ya tuuni Ejipti yaaba po.' Li den baa tu tipo yeni tin ya tuuni Ejipti yaaba po, yeni tin ba kpe fanma mi fanpienma nni ne." ¹³ Moyiisi den yedi li nitaanli, "Da jie mani. Tieni mani suo ki diidi O Diedo ń ba woli ba maama, ki kɔni ti po dinne. Kelima, i ji kan fandi ki la Ejipti yaaba, yin nua yaaba dinne ne. ¹⁴ O Diedo ba kɔni ki fie yi, yinba ń ya tie suo, ki nua." ¹⁵ O Diedo den yedi Moyiisi, "Moyiisi, Be ya po i ke i go bii ki lingi N todli? Yedi Israyeli yaaba, ban paani u sanu. ¹⁶ Duoni a gbiamu, Tandi a nuu mi ñincianma po, ke man ki piani , ki bɔgdi ma kaani lie, Ke Israyeli yaaba ń puodi mi ñincianma ki tinkuonga po. ¹⁷ Yin ya bani ke N ba juagi Ejipti yaaba pala, ban ŋɔdi ki woli yi. N ba baa ti kpiagidi kelima Farawɔn yeni o tɔbtieba, o tɔbturdi, o taami yeni o tanjagla po. ¹⁸ lanwani ii, Ejipti yaaba ba bandi ke Mini n tie O Diedo, N ya baa ti kpiagdi kelima Farawɔn, o tɔbturdi yeni o tanjagla po. ¹⁹ U Tienu Maleki yua n den ye Israyeli yaaba liiga, den lebdi ki guani bi puoli po. Li ŋunli talwadi den ñani bi liiga, ki guani ki ye bi puoli po. ²⁰ Ti talwadi ji den ye Ejipti yaaba tɔgoli yeni Israyeli yaaba tɔgoli siiga i. Ti den tie ya talwadi n biigi Ejipti yaaba po, ama ki puuni Israyeli yaaba mi yenyenma, lanwani ii, tgoyenli den ki nagni li togolieli, ñiamungu. ²¹ Moyiisi den tiani o nuu mi ñincianma po. O Diedo den luodi puoli faaciangu, ke ku figi ki piani mi ñincianma, lanya ñiagu kuli, ki cedi ke mi ñincianma piani ki ŋa tinkuonga sanu. Yeni i, ke mi ñincianma den bɔgdi kaani lie. ²² Israyeli yaaba den tɔgni li mɔgli siiga yeni i tinkuoga po. Mi ñima den bili nani guonli yeni, bi ganu po yeni bi jienu po. ²³ Ejipti yaaba den ŋɔdi ki ba woli ba. Bi den ŋɔdi ba mi ñima siiga nni - Bikuli, Farawɔn taami, o tɔbturdi yeni o tanjagla kuli. ²⁴ Ama ku siŋaapanpangu yognu, O Diedo den jiini ti talwadi yeni u mu, Ejipti yaaba po. O den cedi ke li ŋmadli tieni Ejipti yaaba siiga. ²⁵ Bi tɔbturdi taana den felgi, ke bi tandanba mo ya po, li cenli den paa boncianla. Ejipti yaaba den yedi, "Cedi mani tin sani ki ŋa Israyeli yaaba, kelima O Diedo kɔni bi po, ki bua guli ti. ²⁶ O Diedo den yedi Moyiisi, "Tandi a nuu li mɔgli po, mi ñima ń guani ki taani, ki yili ki miini Ejipti yaaba, bi tɔbturdi yeni bi tanjagla." ²⁷ Lanwani ii, Moyiisi den tandi o nuu li mɔgli po, ke mi ñima guani ki taani ki bili mi kaanu ku siŋaagu nni. Ejipti yaaba ji den siani mi ñincianma nni, ke O Diedo cedi ke bi tɔgni siiga nni. ²⁸ Mi ñima den guani ki taani, ki yili Farawɔn, tɔbturdi, o tanjagla yeni o tɔtieba kuli, yaaba n den ŋɔdi Israyeli yaaba mi ñima nni. Bá niyendo den ki fidi ki ñani li ñima nni. ²⁹ Ama Israyeli yaaba den cuoni tinkuonga po i, li mɔgli siiga nni. Mi ñima den bili guonli i, bi ganu po yeni bi jienu po. ³⁰ Lanwani ii, lanya daali, O Diedo den faabi Israyeli yaaba, Ejipti yaaba nui nni, ke Israyeli buolu la Ejipti yaaba nikpiema mi ñincianma mɔgjaali po. ³¹ Israyeli yaaba ń la ke O Diedo tieni o paaciamu, ki pua Ejipti yaaba maama, Israyeli buolu den kpiagi O Diedo, bi den dugi O po yeni o naaciemo, Moyiisi kuli po.