¹ Moyiisi ń jiini, "Ama, bi ya ki ga m maama ki gɔ ki cengi nni, ki yedi nni, 'O diedo ki dɔgdi a po.' Li ba juodi ledi i? ² O Diedo ń buali o, "A kubi be i a nuu nni?" Moyiisi ń jiini, "Gbiamu." ³ O Diedo ń yedi o, "Lu u tinga nni." Moyiisi ń lu u gbiamu tinga nni, un kpandi waa. Moyiisi ń sudi ki sani. ⁴ O Diedo ń maadi Moyiisi, "Nagni ki mubni o juoli." Wan nagni ki mubni o waa. Lan guani ki tua gbiamu o nuu nni. ⁵ "Lan ba tieni maama ban ga a maama, ki tuo ke O Diedo, bi yaajanba Tienu, Abrahama Tienu, Isaka Tienu yeni Jakɔbu Tienu dɔgdi a po n yeni." ⁶ O Diedo go den yedi o, "Mɔlane, kubni a nuu a gaalgu nni." Ke Moyiisi kubni o nuu o gaalgu nni. Wan ñani o nuu, o sua ke mi gbaadma cuo li nuu ke u pieni pai pai pai nani a taatana yeni. ⁷ O Diedo ń yedi o, "Go kubni li nuu a liadgaalgu nni. Ke Moyiisi guani ki kubni li nuu o liadgaalgu nni, wan kubdi li nuu, o sua ke mi gbaadma gbeni, ke o nuu paagi ki tie nani ya gbannandi n sieni yeni. ⁸ O Diedo ń yedi, "Bi ya ki ga a maama, kaa fangi bi yuli n paaciamu po, ki dugni cincinli yaalidgu banma po, bi nan ba ga a maama ki dugni ku yaalidgu banliema po. ⁹ Bi ya ki dugi kelima li yaalidgu banliedma po, ki ga a maama, ŋan kabi u kpenciamu nni ñima, ki wuli ki tinga po. ŋan kabi ya ñima ba kpandi sɔma ki tinkuonga po." ¹⁰ Ke Moyiisi maadi li Miali Diedo, "N Diedo, mii tie maabandi daano ka, hali n yema nni, ki ban tuu ŋan cili ki maadi yeni a naaciemo ne, n ñɔbu kpiagi, ke n lanbu mo ki kagi yeni maama." ¹¹ Ke li Miali Diedo yedi o, "ŋma tagi o nilo ñɔbu? ŋma cedi ke nilo tie muulo bii womo, lanyaaka nunnɔldo bii juamo? Laa tie Mini O Diedo ka aa? ¹² Lanwani ii, ji ya caa, N baa ye yeni a ŋan ba ga mi maama ya yognu, ki ya wangi a ŋan ba yedi yaali." ¹³ Ama ke Moyiisi yedi, O Diedo, N mia ŋa sugli, sɔni nitiano, ŋan li lugdi yua kuli ki ba sɔni o." ¹⁴ Ke O Diedo pali beni Moyiisi po. ke o yedi, "A kpelo Harɔn, yua n tie Lefi buolu ki ye likani ii? N bani ke o bani ki go paa mi maama. N ba waani a ke o paa ki kpendi, ki ba tuogi a, o ya tuogi a ya yognu, o pali ba mangi boncianla. ¹⁵ A ba togdi o, ki waani o, ki kuani wan ba yedi ya lanbona o ñɔbu nni. N baa ye yeni a ñɔbu yeni o ñɔbu, kigo waani yinba bilie kuli yin ba tieni yaali. ¹⁶ Wani n ba maadi yeni li nitaanli a po. O baa tie a ñɔbu, ke a tie o po nani mini U Tienu yeni. ¹⁷ A baa muubi a nuu nni ya gbiamu ne. I baa tie yaalidgu banma yeni uni i." ¹⁸ Lanwani ii, Myiisi den guani ki lebdi ki la o cuado Jetro, ki maadi o, "Cabi nni min lebdi ki gedi Ejipti po ki ban diidi n naataani ya ye yeni laafia." Ke Jetro yedi Moyiisi, "N cabi a yeni mi yanduanma." ¹⁹ O Diedo den yedi Moyiisi, ke o dá ye Median dogu nni, "Fii ki lebdi Ejipti, kelima ya niba n den lingi ke ban gbindi a miali yeni kuli kpe o." 0 Moyiisi den taa o denpua yeni o bijaba, ki jagni ba ŋunbo po. O den lebdi Ejipti diema nni ki muubi U Tienu gbiamu o nuu nni. ²¹ O Diedo den yedi Moyiisi, "A ya lebdi Ejipti, diidi ŋan ba tieni min waani a ya yaalidgu banma kuli Farawɔn nintuali. Ama N ba juagi o pali o kan tuo ki cabi bi niba ban gedi. ²² ŋan ba yedi Farawɔn yaali n ne, 'O Diedo yedi ya maama ne: Israyeli tie n bijua i, n bijakpelo, ²³ N maadi a, "Cabi n bijua wan gedi ki ban pugi nni." Ama, nani ŋan yie ke a kan cabi o wan gedi yeni, N ba kpa a bijua, a bijakpelo.'" ²⁴ Ban den paa u sanu nni, ki ba jadi ki fuodi ku ñiagu, O Diedo den cendi Moyiisi ki bua kpa o. ²⁵ Sefora den taa ya tanli n mani nani ki juga yeni, ki jia o bijua punjuogu, ki sii Moyiisi taana. O den yedi, "Laa pia tama ke a tie n calo, mi sɔma buama taanma po." ²⁶ Ke O Diedo yaadi ki ŋa Moyiisi. Ke o pua yedi, "A tie n calo mi sɔma buama po" kelima ku kɔnciagu po. ²⁷ O Diedo den yedi haarɔn, "Gedi mi fanpienma nni ki ban cendi Moyiisi." Haarɔn den gedi ki cendi o U Tienu juali po, ki wobi o yeni li pamanli. ²⁸ Moyiisi den waani Haarɔn O Diedo ń sɔni o ke wan maadi ya lanbona kuli yeni yeni wan cabi ke ban tieni ya yaalidgu banma ki dugni o paaciamu po. ²⁹ Lanwani ii, Moyiis yeni Haarɔn den gedi ki taani Israyeli nikpelba kuli. ³⁰ Haarɔn den maadi O Diedo ń yedi Moyiisi ya lanbona kuli. O go den tieni yaalidgu banma ki dugni O Diedo paaciamu po li nitaanli nituali. ³¹ Li nitaanli den kuani bi dandanli li maama nni. Ban gbadi ke O Diedo kpaagi Israyeli yaaba yema, ki la ban wangi ba ya falaciamo, ke bi tibni ki pugi U Tienu.