¹ Moyiisi ji den kpaa o cuado Jetro, Median salga yidka yandi i. Moyiisi den kpaa ti yadi ki ban kua hali ku inpiengu nni ki pundi Horebi, U Tienu juali po. ² Lankani, ke U Tienu Maleki den legdi o po, ke o la mu ke u co ku tiigu nni. Moyiisi den la ke li yaa ki lidi o kelima u mu den co ku tiigu nni, ama ku tiigu naa den cuo. ³ Ke Moyiisi yedi, N ba gbegi ki diidi ya yaalidgu bonli ne, li nan ga ledi i, ke ku tiigu ki co." ⁴ O Diedo ń la ke o jadi ki ba diidi lan tie yaali, ke U Tienu yini o ku tiigu nni, ki yedi "Moyiisi, Moyiisi." Ke Moyiisi yedi, "Mini n ne" ⁵ Ke U Tienu yedi, "Da nagni nekanba! Pidi a taacaadi, kelima ŋan se ya kaanu ne tie ya tingagdikaaga n bobni n ya po i." ⁶ Ki pugni ki yedi, "N tie a báa Tienu i, Abrahama, Isaka yeni Jakɔbu Tienu i." Ke Moyiisi pii o nunga, kelima o den jie ke wan la U Tienu. ⁷ O Diedo den yedi, "N la yeni i mɔni n buolu yu ye Ejipti fala. N gbadi bi bubuuli yigni, kelima ban wangi ba ya fala bi yobtuona po, kelima, N bani bi falaciamo po. ⁸ N jiidi ki ba faabi ba Ejipti yaaba nui nni, ki ñani ba lan ya tinga nni ki gedi yeni ba ya tinŋanga n yabi nni, mi naaŋanma yeni ti siadi ń puubi ya tinga nni; Kanana, Hititi, Amoriti, Perisiti, Hifiti yeni Jebusiti yaaba diema nni. ⁹ Mɔlane, bi bubuuli yigni ń pundi n kani, ke N ji bandi yeni i mɔni Ejipti yaaba ń wangi ba ya falaciamo. ¹⁰ Lanwani ii, N ba sɔni a Farahɔn kani, ŋan ban ñani Israyeli yaaba Ejipti diema nni." ¹¹ Ke Moyiisi yedi U Tienu, "N mɔ tie ŋma i, ki ba gedi Farahɔn kani ki ban ñani Israyeli buolu Ejipti diema nni?" ¹² Ke U Tienu jiini, "N baa yegi yeni a. Lani n ba tieni a po kasiedi ke mini n sɔni a. I ya ñani n buolu Ejipti nni, I baa pugi nni ya juali ne po i." ¹³ Ke Moyiisi yedi U Tienu, "N ya pundi Israyeli yaaba kani , ki maadi ba 'I yaajanba Tienu sɔni nni i kani, ke bi buali nni, 'O yeli tie be i?' N ba maadi ba be i?" ¹⁴ Ke U Tienu yedi Moyiisi, "Mini n tie Yua n Ye" U Tienu den yedi, "ŋan yedi Israyeli yaaba, "YUA N YE sɔni nni i kani." ¹⁵ U Tienu go den yedi Moyiisi, "ŋan maadi Israyeli yaaba, 'O Diedo, i yaajanba Tienu, Abrahama Tienu, Isaka Tienu yeni Jakɔbu Tienu n sɔni nni i kani. N yeli n yeni ya yogu ń tuu ya yogu, Yin ba bili ya yeli i yula nni n yeni, nufiima ń tuu nifiima.' ¹⁶ Gedi ki taani Israyeli buolu nikpelba. ŋan yedi ba, 'O Diedo, I yaajanba Tienu, Abrahama, Isaka yeni Jakɔbu Tienu, legdi n po, ki yedi "N kpaagi i yema yeni i mɔni, ki la ban tuadi yi maama Ejipti nni. ¹⁷ N jagi ke n ba ñani yi Ejipti nni, yin laadi falaciamo naani, ki gedi yeni yi Kanana, Hititi, Amoriti, Perisiti, Hifiti yeni Jebusiti yaaba diema nni, ya tinga nni ke mi naaŋanma yeni ti siadi puubi." ¹⁸ Bi ba cengi a maama. Fini yeni Israyeli nikpelba ba yegi ki gedi Ejipti badciamo kani, i ba yedi o, 'O Diedo, Hebrewunba Tienu den dɔgdi ti po. Lanwani ii, ŋan puni ti u sanu tin gedi mi fanpienma nni ke li tie dana taa cenli yeni ne, ki ban yidi salga O Diedo, ti Tienu po.' ¹⁹ Ama, N bani ke Ejipti badciamo kan tuo kipuni yi u sanu yin gedi, kese ke li tua o po niinli. ²⁰ N ba tandi n nuu yeni yi, ki pua Ejipti yaaba yeni u paaciamu yeni yaalidgu bona bi siiga nni. Lani ya pendi, o ba cabi yi yin gedi. ²¹ N ba cedi Ejipti yaaba ń juogi li buolu, lanyapo, i ya ba fii ya daali, i kan fii nuukuomi. ²² Pua kuli ba mia bi Ejipti polieba yeni bi kuantalieba ŋanjilfa, wula yeni i badlaani, ti tialakaadi, i bijaba yeni i bisiaba po. Yeni i, ke i ba fagi Ejipti yaaba.