¹ Lanyognu ke Lefi cugli nni ja kuani lefi pua. ² O pua den punbi, ki mali bonjaga. Wan la ke ki tie ya bonjaga n pia u gbanmanu yeni, ke o wuoni ga ŋmaali taa. ³ Ama o den kan fidi ki wuoni ga lan waagi, ke o taa ki cancaaga, ki baa ti sindi ki faani ki lindi, ki duani ki biga ki niinni ki gedi ki sieni ga li kpenjaali po. ⁴ O naataanpuoga den fuadi ki ban se, ki nua yaali n ba tieni ki biga. ⁵ Farahɔn bisalo den ñani ki yegi yeni o potuada li kpenjaali po ki caa u kpenciamu po, ki baan wali. O den la ki cancaaga ke ki see ku muagu nni, ki sɔni o potuada ke bi yugdi ki teni o. ⁶ Wan bibdi ki cancaaga, o sua ke ke biga i. Cengi mani, ki biga yeni den buudi. Mi niñima den cuo o, ke o yedi, "Laa pia tama ke kine ki tie hebrewu biga." ⁷ Ke ki biga ninsakpelo den yedi Farahɔn bisalo, " Min gedi ki ban yini a po Ebrewu pua yua n ba fidi ki ya ŋaani ki biga a po oo? ⁸ Ke Farahɔn bisalo jiini o, "gedi ki yini o" ki bonpuoga den gedi ki yini ki biga naá i. ⁹ Ke Farahɔn bisalo yedi ki biga naá, " ga ki biga ne ki ya ŋaandi ga npo, N ba pa ŋa lan buali maama. Lanwani ii, o pua den ga ki biga ki ba ya ŋaandi ga. ¹⁰ Ki biga ń fandi, ke o taa ga ki cua , ki teni Farahɔn bisalo bonjaga. O den yini ga Moyiisi, ki yedi "kelima n ñani ga mi ñima nni i." ¹¹ Moyiisi ń kpedi, ke o ñani ki bua diidi o naataani, ki nua ban tuuni ya tuonpaala. O den la ke Ejipti yua kubi hebrewu o naataano ki cagni. ¹² Ke o gbagi ganu yeni jienu ki sua ke niloba kuli ki nua o, ke o pua ki kpa Ejipti yua, ki bubni o ti tandi nni. ¹³ Ke o go ñani daatɔali, ke li yaalidi o yeni hebrewu niba bilie ke bi kɔni bi ŋmiali nni. Ke o yedi yua n ki pia mɔni yeni, "Be n cedi ke a pua a yegnu?" ¹⁴ Ama ke li nilo guani ki jiini o, "ŋma n dini a ti yudandi ke ŋan jia ti buudi? A bobni ke ŋan kpa nni nani ŋan den kpa Ejipti yua maama yo oo? Ke Moyiisi ji jie, ki yedi, "Min sɔni ya tuonli yeni, niba boncianli bandi o." ¹⁵ Farahɔn ń gbadi li maama, ke o jagi ke wan kpa Moyiisi. Ama Moyiisi den sani ki ban wuoni Median dogu nni O den gedi ki kaa caali kani i. ¹⁶ Median salga yidka den pia jafanba lele, ke bi gedi yeni bi cuana ki baan luuni mi ñima ki go ñuni bi yandi. ¹⁷ A yankpaala den cua ki ba deli ba, ke Moyiisi kɔni bi po, ki todi ba, hali ki luuni ki ñuni bi yandi. ¹⁸ Bi jafanba ń kuni ki la bi báa, ke o buali ba, "Li ga ledi i ke i guani ki kpeni tonma dinne?" ¹⁹ Ke bi jiini " Ejipti ja n kɔni ki ga ti po a yankpaala kani. ki go luuni mi ñima ki ñuni ti yankulu mɔno." ²⁰ Ke o yedi o jafanba, " Mɔlane o ji ye le i? Li tieni ledi i ke i siedi ki ŋa li nilo? yini o mani wan cua ki juadi ki di yeni ti." ²¹ Moyiisi tuo ki baa ye yeni o canbáa ke o go punio o bonpuoga Sipora ke wan kuani o. ²² O pua den mali o bonjaga, ke o yini ga Gercihoma, ki yedi, "N tie caano, ki ye doglamu" ²³ Lan tieni binabá, ki Ejipti badciamo den guani, ke Israyeli yaaba den jagi mi yiema bi yonbdi tuona po, ki fabni ki miadi li todli, ke bi cacagma yeni bi miabu pundi hali U Tienu kani. ²⁴ U Tienu ń den gbadi bi yigni yeni bi miabu, ke o tiadi wan den bili ya ñɔnianu yeni bi Abrahama, Isaka yeni Jakɔbu. ²⁵ Ke U Tienu diidi Isreyeli yaaba ki gbadi ban ye ya yema.