¹ Bi den taa ya pakobdi n tie galula, ki mɔni colcoli, ki mɔni ki tuudi, ki lugi salga yidkaaba tialakaadi, yaadi n gagdi ki ŋani u kaangagdiŋamu tuona po. Bi den lugi Haarɔn tialakaadi u kaangagdiŋamu tuona po, nani O Diedo ń den waani Moyiisi maama. ² Besaleli den lugi wula benŋuunu yeni ya pakobdi n tie galula, ki mɔni colcoli, ki mɔni ki tuudi, yeni leni gaali yii n juagi. ³ Bi den duadi wula bonpabmu, ki buadi mu nani gaali yeni, ki ji lugi yeni ya pakobdi n tie galula, ki mɔni colcoli, ki mɔni ki tuudi, yeni leni gaali yii n juagi, tuonsɔnbanlo tuonli. ⁴ Bi den buadi a caba, ki jɔni u benŋuunu buacaba kunliedi po. ⁵ A caba yeni i gaali yeni u benŋuunu kuli den taani ki tie bontutulyengu i, ki lugu yeni leni gaali yii n juagi, yeni ya pakobdi n tie galula, ki mɔni colcoli, ki mɔni ki tuudi, nani O Diedo ń den waani Moyiisi maama yeni. ⁶ Bi den kpiedi Oniksi tana, yaa n ye wula tuadi nni yeni, ki diani Israyeli piiga n bijaliedba yela, nani bi niba ń yi jaa bi yela a tana po maama yeni. ⁷ Bi den tieni a u benŋuunu buacabdi po, ke ŋan ya tie a tantiadkaana O Diedo Israyeli piiga n bijaliedba po, nani O Diedo ń den waani Moyiisi maama yeni. ⁸ Bi den lugi li benliadli yeni mi tuonsɔnbanma, ki lugi li nani u benŋuunu yeni. Bi den lugi li yeni wula, yeni ya pakobdi n tie galula, ki mɔni colcoli, ki mɔni ki tuudi, yeni leni gaali yii n juagi, ki ŋani. ⁹ Li den tie bonŋmabdagdili i. Bi den gbabi a caba ki tagni, li fagmu yeni li piamu den dɔa i, ki tie centimetri piilie a mu (Cm 25). ¹⁰ Bi den buadi, ki kuani tanjuudi na i. Bi den tieni u juudkpilu nni rubi, topasi yeni emerodi. ¹¹ U juudlielu nni, bi den tieni, emerodi, safiiri yeni diaman. ¹² U juudtaalu nni, bi den tieni Hiyasenti, agati yeni emetisti. ¹³ U juudnaalu nni, bi den tieni berili, oniksi yeni jaspa. Li tanŋana den puabi wula tuagu nni i. ¹⁴ Bi den sagni li tana ki a cɔlni Israyeli piiga n bijaliedba i, yuakuli yeni o yeli. Li den tie nani ban yi jaa a yela a tana po yeni i, yeli kuli den sedi Israyeli piiga n cuglieda kaanu i. ¹⁵ Bi den duadi wula laani, ki piadi yi nani wula baabi yeni . ¹⁶ Bi den duadi wula tuadi lie yeni wula biamu lie, ki tabni mu bialiedmu yeni li benliadli juomu po. ¹⁷ Bi den tuuni wula laani baabi yeni mu bialiedmu yaamu n ye li benliadli juomu po yeni nni. ¹⁸ Bi den tabni wula baabi juoliedmu yeni wula tualierdi. Bi den tabni lankuli u benŋuunu buacaba nintuali po. ¹⁹ Bi den duadi wula biamu alie, ki tabni li benliadli juolidmu yaamu n sieni tiipo ki tugu nni po. ²⁰ Bi go den duadi wula biamu alie, ki tabni mu u benŋuunu buacaba tiipo liiga po, ki nagni yaa baabi n luoli u benŋuunu gbanñagdigu kani. ²¹ Bi den loli ki tabni li benliadli biamu yeni u benŋuunu biamu yeni ya baabu n tie galula, ke mun ya ye ku gbanñagdigu polu. Li den tie ke mun ya tuugu, ki da paadi yeni miyaba nani O Diedo ń den waani Moyiisi maama yeni. ²² Besaleli den lugi o benŋuunu liadfagdili yeni ya caba n mɔni ki tuudi. ²³ Bi den tie li bonli sinsiiga nni u nialu kani, li yuli ń ba kua naani. Bi den kpaa u ñialu kani, ke lin da padi. ²⁴ Li liadfagdili tiipo, bi den kpaa a bala ki kagni ki lindi, ki tagi grenadie luana yeni ya pakobdi n tie galula, ki mɔni colcoli, ki mɔni ki tuudi, yeni leni gaali yi n juagi, ki ŋani hali boncianla. ²⁵ Bi den duadi wula sanbuana, ki sagni a grenadie bonluana siiga nni, ki lindi li liadli tiipo. ²⁶ Sanbuali n ne, grenadie bonluanli n ne ki ban lindi li liadli tiipo, ke Haarɔn ń yi la o tuonli po, nani O Diedo ń den waani Moyiisi maama. ²⁷ Bi den lugi a liadgbagda yeni leni gaali yi n juagi ki go ŋani, Haarɔn yeni o bijaba po. ²⁸ Bi den lugi ti bi finfinjuadi yeni leni gaali, bi feglimu yeni leni gaali, bi banda yeni leni tiidi gaali ²⁹ Bi den lugi ku gbanñagdigu yeni leni tiidi gaali, ke i ŋmadi yeni ya pakobdi n tie galula, k mɔni colcoli, ki mɔni ki tuudi, ki kpaa a bala, ki lindi, nani O Diedo ń den waani Moyiisi maama yeni. ³⁰ Bi den tagi mi gagdiŋanma bonnannali yeni wula yaali n pia mayuli ; bi den diani li po nani ban yi jaa li tanli po maalma yeni, ki tie: "Li gagdi ki ŋani O Diedo po" ³¹ Bi den tabni li bonnannanli ku finfinjuagu po, nani ODiedo ń den waani Moyiisi maama. ³² Lanwani ii, li gbandieli yeni u kaangagdiŋamu tuonli ji den gbeni n yeni. Israyeli niba den sɔni li tuona kuli. Bi den cɔlni O Diedo ń den teni Moyiisi ya ñɔmaama. ³³ Bi den taa li gbandieli, ki cua yeni li Moyiisi kani. Ku jongu yeni ku tiabobinkaadi, i bongobdi, ti daapagdi, a kpaana, a daacaada yeni a bunbuna; ³⁴ Ti pagbandi yaadi n tuu, ki mɔni mɔni, ya gbandi n nugi ki juagi, yeni bu kpadɔginkaabu. ³⁵ Yiko nɔmaama kpagu yeni a daapanda yeni ku kpagu bonbiili. ³⁶ Bi den cua yeni taabli yeni li tuonsɔntiadi kuli yenu bu bu paabu kpanu; ³⁷ Wula fidsantuankaanu yeni li fidsanmu ke mu saagi, yeni u bonbaanbidi, yeni mi fidsankpama; ³⁸ Wula padbinbindli, mi kpaŋanma yeni tulaali li gbandieli bulñɔbu bonluodli; ³⁹ Ti kumɔndi binbindli yeni li kumɔndi gilyaasi yeni li daapanda yeni li bonbaanbidi, yeni ku tadciangu yeni ku tuankaanu. ⁴⁰ Bi den cua yeni li gbandieli luolu kpaldɔginkaabu yeni bu daacaada yeni a bunbunna, yeni u luolu bulñɔbu kpadɔginkaabu; u baabi yeni u kpaana kuli; yeni u kaangagdiŋamu tuonsɔntiadi kuli, u kadkaanu jongu. ⁴¹ Bi den cua yeni salga yidkaaba tialakaadi, yaadi n gagdi ki ŋani u kaangagdiŋamu tuona po, salga yikaciamo Haarɔn yeni o bijaba tialakaadi, yaadi n gagdi ki wangi ke bi tie salga yidkaaba. ⁴² Lanwani ii, Israyeli yaaba den sɔni li tuonli nani O Diedo ń den waani Moyiisi. maama ⁴³ Moyiisi den diidi ya tuona n sɔni kuli, ki sua ke bi sɔni lan buali maama. Nani O Diedo ń den waani maama yeni, bi sɔni yeni i. Lanwani ii, Moyiisi den gaali ba, ki yadi mi yedŋanma bi po.