¹ O Diedo den maadi yeni Moyiisi, ki yedi o, ² "Li binpaanli, ŋmaacincinli o daacincinli daali, ŋan kpaa, ki duoni li gbandieli, u kaangagdiŋamu kadkaanu jongu. ³ ŋan kuani yiko ñɔmaama kpagu li niinni, ki dɔgni ku kpagu yeni bu kpaldɔginkaabu. ⁴ ŋan kuani li niinni taabli yeni li tuonsɔntiadi. ki yuandi ki kuani u fidsantuankaanu, ki cuoni mu fidsanmu. ⁵ ŋan kuani wula binbindli tulaali yeni li ŋubli juuma po, ki sieni yiko ñɔmaama kpagu nintuali, ki kpaldɔginkaabu ki dɔgni u kaangagdiŋamu bulñɔbu kani. ⁶ ŋan kuani a padjuukaana binbindli, ki sieni u kaangagdiŋamu kadkaanu bulñɔbu kani. ⁷ ŋan kuani ku tadciangu yeni ku tuankaanu ki sieni u kadkaanu yeni li binbindli siiga, ki tieni mi ñima ku niinni. ⁸ ŋan bobni u luolu ki lindi li gbandieli, ki jɔni kpaldɔginkaabu u luolu bulñɔbu kani ⁹ ŋan taa mi kpaŋanma yeni tulaali ki sɔgi u kaangagdiŋamu yeni ya tiadi yeni ya bona n ye u niinni kuli. ŋan gagdi li gbandieli yeni ya bona n ye li niinni kuli Mini ya po, lankuli ń tua ya kaanu yeni ya bona n gagdi ki ŋani. ¹⁰ ŋan sɔgi a padjuukaana binbindli yeni li tiabobinkaadi kuli lan tua yaali n gagdi ki ŋani mini O Diedo po. ¹¹ ŋan sɔgi ti kumɔndi tadciangu yeni ku tuankaanu, kun gagdi ki ya ŋani Mini ya po. ¹² ŋan kuani Haarɔn yeni o bijaba u kadkaanu, u kaangagdiŋamu bulñɔbu kani, ki wuli ki ŋanbi ba yeni mi ñima. ¹³ ŋan lani Haarɔn ya tialakaadi n gagdi ki ŋani mini O Diedo po, ki sɔgi o mi kpaŋanma, wan gagdi ki tua mini ya salga yidkaciamo. ¹⁴ ŋan kuani Haarɔn bijaba, ki lani ba a benliada. ¹⁵ ŋan sɔgi ba mi kpaŋanma nani ŋan sɔgi ki ŋanbi bi báa maama yeni, ban ta n salga yidkaaba. Lanya kpaŋanma sɔgma ba cedi ban tua salga yigkaaba hali ya yogu kuli, nifiima ń tuu nifiima." ¹⁶ Moyiisi ń den sɔni ya tuona n yeni. O den cɔlni O Diedo ń den waani o ya ñɔbona kuli, ki sɔni li tuona kuli. ¹⁷ Lanwani ii, bi den bobni u kaangagdiŋamu, li binlieli ŋmaakpilo, o daacincinli daali. ¹⁸ Moyiisi den tii u kaangagdiŋamu ki figni li bunbuna, ki caani li daapagdi yeni li daacaada, ki pani li daapanda. ¹⁹ O den tandi a caba li gbandieli yuli po, ki tii ku jongu, nani O Diedo ń den waani o maama yeni. ²⁰ O den taa yiko ñɔmaama tana, ki kpieni ku kpagu nni, ki tuuni a daapanda, ki biini ku kpagu bonbiili. ²¹ O den kuani ku kpagu u kaangagdiŋamu nni. O den jɔni ya kpaldɔginkaabu ki dɔgni yiko ñɔmaama kpagu, nani O Diedo ń den waani o maama yeni ²² O den kuani taabli ki sieni li u kadkaanu, u kaangagdiŋamu jienu po bu kpaldɔginkaabu niinpo. ²³ O den kua yeni kpanu, ki bili ki calgi taabli po, O Diedo nintuali nani O Diedo ń den waani o maama yeni. ²⁴ O den seni u fidsantuankaanu u kadkaanu, ki pɔndi taabli u kaangagdiŋamu ganu po. ²⁵ O den cuoni mu fidsanmu nani O Diedo ń den waani o maama yeni. ²⁶ O den kuani wula tulaali yeni li ŋubli binbindli, ki seni u kadkaanu nni bu kpaldɔginkaabu nintuali. ²⁷ O den juu ya tulaali yeni ya ŋubli nuulu n mani li po, nani O Diedo ń den waani o maama yeni. ²⁸ O den jɔni bu kpaldɔginkaabu u kaangagdiŋamu bulñɔbu kani. ²⁹ O den figni a padjuukaana binbindli u kaangagdiŋamu bulñɔbu kani, u kadkaanu O den taa a padjuukaana yeni bu paabu, ki yidi salga nani O Diedo ń den waani o maama yeni. ³⁰ O den kuani ku tadciangu, ki seni u kadkaanu yeni li binbindli siiga, ki kuodi mi ñima ku niinni, mi wuli ŋanbima po. ³¹ Moyiisi, Haarɔn yeni o bijaba den den nigdi bi nui yeni bi taana ku tadgu nni ³² Ya yognu kuli ke bi bua kua u kadkaanu bii ki pendi ki kua yiko ñɔmaama kpag kani, bi den yi wuli ki ŋanbi bi yula nani O Diedo ń den waani Moyiisi maama yeni. ³³ Moyiisi den kpaa u luolu ki lindi u kaangagdiŋamu yeni li padbinbindli. O den jɔni bu kpaldɔginkaabu u luolu bulñɔbu kani. O den tieni yeni i, ki juodi a tuana kuli. ³⁴ Lanyognu, ti talwadi den libni ki pibni u kadkaanu gbandieli, ke O Diedo kpiagdi gbie yeni u kaangagdiŋamu. ³⁵ Moyiisi den ki pia ya papaali ke o ba kua u kadkaanu gbandieli nni kelima ti talwadi den pibni li gbandieli, ke O Diedo kpiagdi mo gbieni u kaangagdiŋamu. ³⁶ Ku tawalgu ya kaadi li gbandieli po kuli, Israyeli yaaba yi fii ki cuo bi cenli i. ³⁷ Ama ku taawalgu yaa fii li gbandieli po, Israyeli yaaba kan cuo cenli. Bi baa li ye kaanyendu i hali ku tawalgu ya ban kaadi. ³⁸ Kelima O Diedo tawalgu yi ye li gbandieli po u yienu, ke o yenma mo ye li po ku ñiagu, nani laan den bobni maama Israyeli yaaba sancenli kuli po yeni.