¹ Besaleli den kpaa a padjuukaana binbindli yeni akasia daadi. Li fagmu den tie nuukpanduna mu, li piamu mo, nuukpanduna mu, bonŋmabdagdili, ke li sedma mo tie nuukpandunataa. ² O den kpaaki duoni li kuni po, ki li tie nani naayina yeni. Li kuni yina yeni li binbindli den taani ki tie bontutulyengu, ke o ñuni a ti kumɔndi. ³ O den bobni li padbinbindli tiabobinkaadi - mu tadbuomu, pelinba, a tadkuana, ti nancɔgtiadi, yeni u fanu. Lanya tiadi kuli den tieni yeni wula i. ⁴ O den bobni ti kumɔndi fanu, ke u tie nani giyaasi yeni li binbindli siiga nni ⁵ O den duadi ti kumɔndi biana ana ki tabni li binbindli kuni po, ban ba tuuni naani a daapanda. ⁶ O den kpiedi akasia daapanda, ki ñuni a ti kumɔndi. ⁷ O den tuuni a daapanda a biana yaa n ye li binbindli kali po yeni, ke lan fidi ki todi li tugma. O den tagi libinbindli yeni daapagdi i, ki ŋa bonlongu siiga nni. ⁸ Besaleli den tagi tadciangu yeni ti kumɔndi, yeni ku tuankaanu ke u mo tie kumɔndi. O den taa bi puoba yaaba n taagi, ki tuuni li gbandieli bulñɔtuogibu kani ya kumɔndi maaduubmu i, ki tagi ku tadgu yeni ku tuankaanu. ⁹ O go den bobni li gbandieli luolu. O den lugi kpaljɔnkaadi yeni leni gaali i, ke ti fagmu tie nuukpanduna kobga, ke o jɔni niganu po. ¹⁰ Bi den bobni daacaada piilie yeni ti kumɔndi bunbuna piilie. O den tabni a daacaada po i bongobdi yeni ŋanjilfa baabi. ¹¹ U jienu po den pia kpaljɔnkaadi yaadi ya fagmu tie nuukaduna kobga, daacaada piilie yeni ti kumɔdi bunbuna piilie, yeni i gobdi, ke i taabi a daacaada, yeni ŋanjilfa baabi. ¹² Nintuali po, den pia kpaljɔnkaadi, ke ti fagmu tie nuukpaduna piimu, yeni daacaada piiga yeni a bunbuna. A gobdi yeni a baabi de tie ŋanjilfa i. ¹³ Puoli po mo ya luolu fagmu den tie nuukpanduna piimu i. ¹⁴ U luolu kalyendu fagmu den tie nuukpaduna piiga amu i. Daacaada taa yeni bunbuna taa. ¹⁵ U kallielu po mo ya fagmu dentie nuukpaduna piiga amu i, yeni daacaada taa, yeni buubuna taa. ¹⁶ U luolu kpaljɔnkaadi kuli den lugi yeni leni gaali i. ¹⁷ Bi den duadi a bunbuna yeni kumɔndi i. I gobdi yeni i baabi den tie yeni ŋanjilfa i, bi den ñuni a daacaada polu mo yeniŋanjilfa i. U luolu daacaada polu kuli den ñuni yeni ŋanjilfa i. ¹⁸ U luolu bulñɔbu kani kpaljɔnkaabu fagmu den tie nuukpanduna piilie i. Bi den lugi li kpaljɔnkaabu yeni leni gaali yii n tie galula, ki mɔni colcoli, ki mɔni ki tuudi; yii n ŋani hali boncianla i, bu fagmu den tie nuukpanduna piilie i, ke bu piamu tie nuukpanduna mu, nani u luolu kpaljɔnkaabu yeni. ¹⁹ Daacaada na yeni bunbuna na yeni gobdi ŋanjilfa den ye likani. ²⁰ Li gbandieli yuni u luolu kpaana kuli den tei kumɔndi i. ²¹ Ban taani ya bonbaanbidi ki bobni li gbandieli, ya gbandieli nni ke yiko ñɔmaama kpagu ye n ne. Nani Moyiisi ń den ga ya ñɔbona yeni, Li den tie Lefi cugli nni yaaba tuonli i, ke Salga yidkaciamo Haarɔn bijua Itamaari den ye li tuonli liiga. ²² Huuri bijua, Huuri yaabili, Besaleli, ke o tie Juda cugli nni yua n den tieni O Diedo ń den waani Moyiisi ya ñɔbona kuli. ²³ Ayisamaki bijua, Oholiabi, ke o tie Dani cugli nni yua, n den tuuni yeni Besaleli, ki tie ya tuonsɔnbanli n den tagi a bona, ki ki ñali ,ki go kpaagi a bala ya pakobdi n tie galula, ki mɔni colcoli, ki mɔni ki tuudi, yeni leni gaali yii n paa. ²⁴ Ban den taa ya wula li gbandieli bobinma po, ki taani yeni u kaagagdiŋamu kuli, Israyeli yaaba ń den teni ya paabu den taani cilo kobi niin n piilele n bona lele, yeni grami kobi taa, nani U Tienu diegu nni bonbiginkaali ǹ waani maama. ²⁵ Li nitaanli teni ya paabu ki bu tie ŋanjilfa kpiagu den tie cilo tuda taa n piiga n bona lele (3017) nani li gbandieli nni bonbiginkaali ń den waani maama. ²⁶ Ban den tieni li cɔli ki la ya niba, ke bi pundi bina piilie, ki maani, den tie tudu kobiluoba n tuda taa n piimu n niba mu (603.550), ke yuakuli den teni ŋanjilfa dibapienli bɔgdima. ²⁷ Bi den taa ŋanjilfa cilo tuda taa, ki duadi u kaangagdiŋamu bunbuna yeni ti kpaldɔginkaadi bubuna: bunbuna kobga, li tie ke bunbunyenli kuli den ga ŋanjilfa cilo piita i (30). ²⁸ Bi den taa ŋanjilfa cilo piiga n bona lele yeni grami kobi lele n piimu yii n sieni, ki tieni i bongobdi, ki go ñuni a daacaada polu, ki go tieni ŋanjilfa kanda ²⁹ Ban den puni ya kumɔndi bu paabu kpiagu den tie cilo tuda lie n kobga n piilie n bona (Kg 2124). ³⁰ Bi den taa li kumɔndi ki duadi li gbandieli bulñɔbu kani, u kadkaanu bunbuna, ki bobni ti kumɔndi binbindli yeni li giyaasi yeni li binbindli tiabobinkaadi. ³¹ Li gbandielu luolu daacaada bunbuna yeni li gbandieli yeni u luolu kpaana den tie yeni lanya kumɔndi i.