¹ Besaleli den tagi yiko ñɔmaama kpagu yeni Akasia daadi. ku fagmu den tie nuukpaduna lie yeni bɔgdima; ku piamu mo nuukpanduna lie yeni bɔgdima; ku sedma mo nuukpanduna lie yeni bɔgdima. ² O den ñuni ku tugu nni yeni niinpo kuli yeni wula, ki go kogni gu yeni wula ki lindi gu ³ O den tagi wula biana ana ki ba pilni ku taanaada, kaliyendu po biana lie, kaltɔu po mo biana lie. ⁴ O den kpiedi akasia daapanda, ki ñuni a wula. ⁵ O den tuuni a daapanda a biana nni ku kpagu kali po, ke ŋan todi ku kpagu tugma po. ⁶ O den tagi ku kpagu bonbiili yeni wula. li fagmu den tie nuukpaduna lie yeni bɔgdima, li piamu mo nuukpanduna lie yeni bɔgdima. ⁷ O den tagi ciherubenba bilie yeni wula, li bonbiili juomu po. ⁸ Ciheruben yendo juoyenga po, ciherube tɔa mo ki juoliega po. O den duadu li ciherubenba yeni ku ŋantaadikpagu kuli bontutulyengu i. ⁹ Ciherubenba den fiini bi fiabi ki cɔni, ke i legni, ki piini li bonbiili. Ciherubenba yeni den see ki toli biyaba i, ki nua li bonbiili sinsiiga nni. ¹⁰ Besaleli den tieni taabli yeni akasia daadi. Li fagmu den tie nuukpanduna lie, li piamu mo nuukpandunyenli, ke li sedma mo nuukpandunyenli yeni bɔgdima. ¹¹ O den ñuni li yeni wula, ki kogni ki lindi li polu po yeni wula. ¹² O den kogni li kali po yeni ya daapaku piamu pundi nuubituga na, ki ñuni lankuli yeni wula. ¹³ O den duadi wula biana ana, ki tabni li lɔdmu po, li taanaada ń ye naani. ¹⁴ Bi den tabni a biana ku daapagu po i, ke lan fidi ki tuuni a daapanda, taabli tugma po. ¹⁵ Bi den kpiedi akasia daapanda, ki ñuni a wula, ke ŋan todi taabli tugma po. ¹⁶ Bi den bobni ya tuonsɔntiadi n baa ye taabli po, tini n tie: mu tadtilmu, a tadkuana, mu tadbuomu, kotonba mi cabma tiadi, bu paabu salga po. Lankuli den tieni yeni wula i. ¹⁷ O den tieni u fidsantuankaanu yeni wula. O den tieni u fidsantuankaanu yeni u taali yeni u ñiali. u tadbuomu, u beni yeni u puugu kuli den taani ki tieni bontutulyengu i. ¹⁸ U den pia beni luoba, ke i tiani. Beni taa den tiani poyenpo, beni taa mo potɔu po. ¹⁹ Li cincinbenli den pia tabuomu taa i, ke mu tie nani amadie luanli yeni yeni a gbina yeni mi puuma, ke bentianli mo pia tadbuomu taa, ke mu tie nani amandie luana yeni, yeni a gbina yeni mi puuma. Li den tie yeni, i u fidsantuankaanu benluobdi kuli po. ²⁰ U fidsantuankaanu po mɔno, li ñiali den pia tadbuomu na i, ke mu tie nani amandie luana yeni yeni li gbina yeni li puuma. ²¹ Li gbinli den ye mu ccincinbenliedmu tiipo, ke likuli taani bontutulyengu, ke gbintɔli mo ye ya beni n tua mo ya tiipo, ki mo tie bontutulyengu. Li bentaali tiipo mo den tie yeni i, gbinli ke li kuli taani ki tie bontutulyengu. Li den tie yenma i, li u fidsantuankaanu benluobdi tiipo kuli po. ²² Li gbina yeni li beni kuli den taani ki tie bontutulyengu i, ki tieni yeni wula. ²³ Besaleli den tieni u fedsantuankaanu yeni u fidsanmu alele, i babi yeni ya tiadi n baa wo mi fantapienma. ²⁴ U fidsantuankaanu yeni u tiabobinkaadi kuli den tieni yeni wula cilo bona piitaa i. ²⁵ Besaleli den bobni tulaali juuma binbindli yeni akasia daadi. Li fagmu den tie nuukpandunyenli, li piamu mo nuukpandunyenli, li den tie bonŋmabdagdili i, keli sedma mo tie nuukpanduna lie. Bi den yugdi li lɔdmupo ke likuli ji taani bontutulyengu. ²⁶ O den ñuni tulaali juuma binbindli yeni wula, li polu, li kali yeni li lɔdmu po kuli. Bi go den kogni li yeni wula ki lindi. ²⁷ O den duadi wula biana, ki tabni li binbindli kaliliedi po. Li biana tie ban ba tuuni naani a daapanda ki fidi ki tugi li binbindli i. ²⁸ O den kpiedi a daapanda yeni akasia daadi, ki ñuni a wula. ²⁹ O den cedi ke tulaali tuonsɔnbada ŋɔli mi kpaŋanma yeni ya ŋubli n ŋani bonciala.