¹ Lanwani ii, Besaleli yeni Oholiabi yeni ya tuonsɔnbanda ke O Diedo den puni mi banma yeni li tuonli nunfanbu, ke ban ya bani ya tuona kuli ke O Diedo den buali ke lan sɔni u kaangagdiŋamu maama po kuli ń ba cuoni maama." ² Moyiisi den yini Besaleli yeni Oholiabi yeniO Diedo ń den puni yaaba mi tuonsɔnbanma, ke bi yama kua li tuonli nni, ke ban cua ki sɔni li tuonli. ³ Moyiisi den teni ba wan ga ya paabu kuli Israyeli yaaba kani u kaangagdiŋamu maama po. Li nitaanli den caa siŋaagu kuli yeni bi yanbuapaabu Moyiisi kani. ⁴ Lanwani ii, a tuosɔbanda yaaba n den tuuni u kaangagdiŋamu maama po kuli den jagi ki cedi ke ban tuuni ya tuona kuli sedi. ⁵ Li tuonsɔnbanda den maadi Moyiisi, "Bi niba ń kpedi yeni ya paabu yabi ki cie O Diedo ń buali ya bonbaanbidi li tuonli po. ⁶ Lanwani ii, Moyiisi den ñani li ñɔbonli , ke bi kpaandi ke nilo bakuli ń da fandi ki cua yeni paabu ke bu tie u kaangagdiŋamu maama po. Lanwani ii, bi niba ji den cedi bu paabu tenma. ⁷ Ya paabu n den cua den dagdi, hali ki bua ya cie lan buali ya paabu a tuona po. ⁸ A tuonsɔnbanda siiga nni, yaaba n den bani ki cie den bobni u kaagagdiŋamu yeni kpaljɔnkaadi piiga yeni leni gaali yeni ya pakobdi n tie galula, ki mɔni colcoli, ki mɔni ku tuudi, ki tagi Ciherubenba. Li den tie Besaleli, a tuonsɔnbanda ciamo ya tuonli i. ⁹ kpalbujɔnkaabu kuli fagmu den tie nuukpaduna piilie a niin, bu piamu mo nuukpanduna na. Ti kpalbjɔnkaadi yeni fagmu den dɔa i. ¹⁰ Besaleli den taani ki tugni kpajɔnkaadi mu i, ki go taani ki tugni ya kpaljɔnkaadi muuda n sieni. ¹¹ Bi den kpaa ya gaali n tie galula bu ti kpalmuudi yeni kpaljuodkaaabu kunga po, ki go tieni yeni ya kpalmuudi n sieni mo ya kpajuodikaabu kunga po. ¹² O den tieni i gaali bonjɔnkaana piimu cincinli kpaltuuga fiabu po, ki go tieni bonjɔnkaana ya kpaltuuga n sieni ya kpalfibu po. Lanwani ii, a bonjɔnkaana yeni den tuoli yeni aya i. ¹³ O den tieni wulabonlɔginkaana piimu ki taani ki tugni ti kpaljɔnkaadi, ki lindi ki cebni li gbandieli. ¹⁴ Besaleli den lugi ti ŋɔkobdi caba, piiga n yenli, ki tieni jongu ki ba dɔgni u kaangagdiŋamu niinni. ¹⁵ Cabyenli kulifagmu den tie nuukpanduna piitaa, ke li piamu mo tie nuukanduna na. li caba kuli den dɔa i. ¹⁶ O den taani ki tugni caba mu, ki go taani ki tugni ya cabluobda n sieni. ¹⁷ O den kpaa gaali bonjɔnkaana piimu cincinli cabtuuga cabjuodkaali kani, ki go tieni yeni ya cabtuuga n sieni ya cabjuodkaali kunga po. ¹⁸ Besaleli den tagi ti kumɔndi bonlɔginkaana piimu, ki tugni ki cebni ku jongu, ke ku tie bontutulyengu. ¹⁹ O den taa ti pagbandi yaadi n mɔni, ki tuutuu, ki maani ya gbandi n juagi, ki pigni li gbandieli. ²⁰ Bi den kpaa ti daapagdi ki ba tebni li gbandieli. ²¹ Daapaku kuli fagmu den tie nuukpanduna piiga, ku piamu mo, nuukpandunyenli yeni bɔgdima. ²² Daapaku kuli den pia cuokaani lie i, ke i tuoli yeni iyii. O den tieni yeni i, li gbandieli dapagdi kuli po ²³ Wan den bobni maama li gbandieli po n ne: u ganu po den pia daapagdi piilie. ²⁴ Besaleli den tagi ŋanjilfa bunbuna piina ki ba caani ti daapagdi. Daapaku kuli tiipo den pia bunbuna lie i ki ba taani ki tugni ti daapagdi, li den tie yeni i, daapaku kuli po ²⁵ Li gbandieli jienu po mo den pia daapagdi piilie i ²⁶ yeni ti ŋanjilfa bunbuna. Cincinli daapaku den pia bunbuna lie yaagu n tua bunbuna lie hali ki ban tii. ²⁷ Li gbandieli nintuali den pia daapagdi luoba. ²⁸ O den bobni daapagdi lie li gbadieli lɔdmu po. ²⁹ Li daapagdi den paadi tiipo, ki nan tuugu poli po kandyenli nni. O den bobni yeni i, li lɔdliedmu nni. ³⁰ Daapagdi niin n den ye, yeni li ŋanjilfa bunbuna. Likuli den taani piiga n bunbuna luoba, bunbuna lie, cincinli daapaku nni, bunbuna lie, yaagu tua, hali ki ban tii. ³¹ Bi den kpiedi Akasia daapanda mu li gbandieli kalu po, ³² Li gbandieli kaltɔli mo ya daapagdi den pia daapanda mu, ke puoli po mo pia daapanda mu, yeni nintuali mo. ³³ O den tieni li daapandli ti daapagdi siiga nni i, polu yeni tiiposiiga nni. ³⁴ Bi den ñuni ti daapagdi yeni wula i. ti kanda mo den tie wula i, ke a daapanda ń fidi ki tuuni a niinni ki ya paa, ki go ñuni a daapanda mo yeni wula. ³⁵ Bi den lugi kpaldɔginkaabu yeni ya pakobdi n tie galula, ki mɔni colcoli, ki mɔni ki tuudi yeni leni gaali, ki ciherubenba yaaba n ŋani hali boncianla. ³⁶ Bi den kpiedi Akasia daacaada ana ki ñuni a wula. Bi go den bobni a daacaada po i gobdi, ki ñuni amo yeni wula, ki tieni apo ŋanjilfa bunbuna. ³⁷ Bi den lugi kpaldɔginkaabu li gbandieli bulñɔbu po. Yeni ya pakobdi n tie galula, ki mɔni colcoli, ki mɔni ki tuudi, yeni leni gaali, ki kpaa a bala ki lindi. ³⁸ Bi go den bobni daacaada mu bu kpadɔginkaabu po yeni i gobdi. Bi den ñuni a polu yeni a biana kuli yeni wula. A bunbuna den tieni yeni kumɔndi i.