¹ ŋan ba bobni Haarɔn yeni o bijaba ŋanbli maama, ban tua n tuonsɔnba yeni n salga yidkaaba n ne: ŋan lugdi naatonpanli yeni patona lie, yaa n ki pia pɔdimaba kuli, ² ŋan buuni kpanu yoma ki tieni ya kpanu n ki pia dabinli, ki pua ya lalaadi n ki pia dabinli, ki tieni ya cieciena n ki pia dabinli, ki nan ñuni mi kpama. ³ ŋan taani li kuli ku baabuogu nni, ki gedi yeni li kuli yeni li naatonli yeni a patona, u kaangagdiŋamu nni. ⁴ ŋan kuani Haarɔn yeni o bijaba u taankaanu, ki baa mi ñima, ki wuli ki ŋanbi ba. ⁵ Li ya gbeni, ŋan taa ya tialakaadi n gagdi, ki ŋani yeni, ki lani Haarɔn, tini tie ku liadgaaligu, li liadfagdili, ki liadtedga, u benŋundu, ki ñagni o ku gbanñagdigu. ⁶ ŋan yuandi ki fini o yuli li finfinjuali, ki yilni o ya badfegliga n gagdi ki ŋani li finfinjuali po. ⁷ Ki ji yuandi ki wuli o yuli po mi kpaŋanma, ki sɔgi o li kpaŋanma. ⁸ ŋan kuani o bijaba mo, ki lani ba ti liadgaaldi. ⁹ ŋan lani Haarɔn yeni o bijaba bi tialakaadi, ki ñagni ba ti gbanñagditi, ki fini bi yula a finfinjuana. Salga yidma tuonli ji ba tua bi ya tuonli i hali ya yognu n tuu ya yognu. ŋan ba tieni maama ki kaani Haarɔn yeni o bijaba ban ya tuuni npo n yeni. ¹⁰ ŋan kuani Haarɔn yeni o bijaba yeni li naatonli ku jongu taankaanu, Haarɔn yeni o bijaba ba maani bi nui li naatonli yuli po. ¹¹ ŋan kpa li naatonli li gbandieli bulñɔbu, u taakaanu kani, O Diedo nintuali. ¹² ŋan taa li naatonli sɔma, ki faani yeni a nuubili, li padbinbindli yina po ki ji wuli ya sɔma n sieni li padbinbindli tinga po. ¹³ ŋan taa tugu nni kpama kuli, yeni li puali yeni a cayaanbina yeni a kpama kuli, ki juu li padbinbindli po. ¹⁴ Li ya sieni li naatonli nandi, li gbangu yeni li bindi, li buali ke li juu likuli ku jongu niipo i, lan tua salga yidma ti tuonbiadi po. ¹⁵ ŋan taa patonyenli, Haarɔn yeni o bijaba ń maani bi nui li yuli po. ¹⁶ ŋan kodi li patonli yeni, ki taa li sɔma ki mii mii ki lindi li padbinbindli, i kaankuli. ¹⁷ ŋan jia li patonli nandi, ki ŋuudi ti nuadi yeni li taana ki taani ki bili ti nuadi yeni a nanjena, yeni li yuli, ¹⁸ li padbinbindli po ki juu li patonli kuli. Li ba tua ya padjuukaali n dagdi O Diedo po, ya salga nuulu n mani, ke i juu O Diedo po. ¹⁹ ŋan taa ya patonli n sieni, Haarɔn yeni o bijaba ń maani bi nui li yuli po. ²⁰ ŋan yuandi ki kodi li pantonli, ki taa mi sɔma, ki sii Haarɔn tubli, u jienu po yeni o bijaba tubjienu po, ki tieni bi nuujienu nuupangu nni, yeni bi taajienu taabijali po. Ya sɔma n sieni, ŋan mii mii i kaankuli li padbinbindli po. ²¹ ŋan taa li padbinbindli po sɔma yeni mi kpaŋanma, ki mii mii Haarɔn yeni o tialakaadi po, yeni Haarɔn bijaba yeni bi tialakaadi po. Haarɔn, o bijaba yeni bi tialakaadi baa ya ŋanbli n gagdi ki dagdi ke ban tua Mini O Diedo tuonsɔnba n yeni. ²² ŋan taa li patonli kpama, mani n tie: li juoli yeni ki ciaga ya kpama, tugu nni ya kpama, yaama n poabi li puali, a cayaanbinlieda yeni a kpama yeni li jienpanli, kelima laya patonli padli n ba kaani salga yidkaaba ciamo o tuonli nni ²³ ŋan taa ya kpanu n ki tieni dabinli ku baabuogu yaagu n see O Diedo nintuali, laalaayengu yeni maadyenli. ²⁴ ŋan mubni likuli Haarɔn nui nni yeni o bijaba nui nni , ki cedi ban nagni N nintuli, ki yidi salga lan waani ke bi teni mini O Diedo. ²⁵ ŋan yuadi ki ga li salga jiedi bi nui nni, ki juu li padbinbindli po yeni salga paabu, lan tua ya padjuukaali n ba teni nni u nuulmanu. ²⁶ ŋan yuandi ki taa Haarɔn kaanma salga patonli bengunli, ki waani, ki tieni li bogdili O Diedo nintuali, lani n ba tua a ya biinu. ²⁷ ŋan paadi ki bili Npo li ki yanpadkaaga, ŋan padi yaaga ki kuani Haarɔn yeni o bijaba yeni, ya bengunli yeni li taali, lan tua salga yidkaaba ya todli. ²⁸ Lan tua Haarɔn yeni o bijaba po bogdili. Israyeli yaaba yeni bi puolŋuani po ya yidi mi taayema salga kuli, ban yi ñani lanya nandi O Diedo po. ²⁹ Haarɔn yaa ti ye, o salga tialakaadi kuli ba tua o bijaba ya tiadi i. Li buali ke lan wuli ki ŋanbi ba, ki sɔgi ba mi kpaŋanma, ban tua N tuonsɔnba. ³⁰ Haarɔn bijaba siiga, yua n ba kali bi báa kaanu, ki tua salga yidkaaba ciamo, yua n ba kua li gbandieli nni, u kadkaanu, ki sɔni o tuonli Npo, ba la lanya tialakaadi, ki ban biini dana lele. ³¹ ŋan taa salga yidkaaba kaanma bogdili patonli nandi, ki ŋaani ti ya kaanu n gagdi ki ŋani, li gbandieli nni. ³² Haarɔn yeni o bijaba n ba ŋmani lanya panandi yeni ya kpanu n ye u kadkaanu bulñɔbu kani baabuogu nni. ³³ Bani baba n ba je salga yidkaaba kaanma bogdili yeni sugli miama salga jiema. Nitiano kuli kan je lanya jiema kelima li jiema gagdi ki ŋanbi Mini ya po i ³⁴ Li kaanma nandi yeni li kpanu ye sieni, ke li fandi, li buali ke lan juu i. Li ki buali ke lan je lanya jiema kelima mi bi gagdi ki bili ma Mini ya po i. ³⁵ Lanwani ii, li buali ke ŋan cɔlni min bili a ya ñɔbona i, ki bogdi ki ŋanbi Haarɔn yeni o bijaba. Salga yidkaaba kaanma bogdili ba tieni dana lele i. ³⁶ Daali kuli , li buali ke lan padi naatonli i, sugli miama salga po, lan ŋanbi salga binbindli. Li ya puoli, ŋan sɔgi salga binbindli mi kpaŋanma ki gagdi ki ŋanbi li Npo. ³⁷ A ba bogdi ki ŋanbi li padbinbindli dana lele, lan gagdi ki ya ŋani O Diedo po. Li padbinbindli ya gagdi ki ŋanbi Mini ya po, yualanyaaka yaali n sii li gagdi ki ŋanbi ki dagdi O Diedo po i. ³⁸ Daali kuli, li buali ke lan padi binyenli pabila alie i. ³⁹ Li ba padi pabiyenga ku siŋaagu, ki padi ya pabiga n sieni ku jenjuogu. ⁴⁰ Ki cincinpabiga padli po, li buali mi yoma cilo bona taa, lan taani ku nugi yeni Olifi kpama liidli yenli yeni bɔgdima yeni ku daamɔngu mo, liidliyeni bɔgdima, ⁴¹ Ki pabiliega ba padi ku yenjuogu i. Li bonbaanbidi yeni li daama tie yenma i, nani ku siŋaagu nni yeni. Li salga ba teni nni u nuulmanu. Li baa tie ya padjuukaali ke i bobni mini ya po. ⁴² Li buali yin cɔlni lanya padjuukaali salga yidma i buolu nni nifiima ń tuu nifiima, li salga baa yidi li gbandieli nni, u kadkaanu bulñɔbu kani, O Diedo nintuali. Lankani i ke N baa kadi yeni yi, ki maadi yeni yi. ⁴³ Lankani i ke n baa kadi yeni Israyeli buolu; N kpiagdi n ba gagdi ki ŋanbi lanya kaanu. ⁴⁴ N ba gagdi ki ŋanbi u kadkaanu yeni li padbinbindli likuli ń gagdi ki ya tie mini baba ya kaanu. N go ba gagdi ki ŋanbi Haarɔn yeni o bijaba, ban ya tie N salga yedkaaba. ⁴⁵ N baa ye Israyeli buolu siiga, ki tie bi Tienu. ⁴⁶ Bi ba bandi ke Mini n tie O Diedo, bi Tienu yua n ñani ba Ejipti Diema nni, ke Min ya ye bi siiga nni. Mini n tie O Diedo, bi Tienu.