¹ ŋan bobni li padbinbindli, ban baa juugi naani tulaali ŋubli. ŋan bobni li yeni Akasia daadi. ² Li fagmu baa tie nuukpandunyenli, li piamu mo, nuukpandunyenli. Li baa tie bonŋmabdagdili i, li sedma mo baa tie nuukpaduna lie. Li kuni ba taani yeni li, ki ya tie bontutulyengu. ³ ŋan ñuni li padjuukaali binbindli yeni wula, li polu, li kali yeni li kuni. ŋan kagni li kuni yeni wula, ki ban cebni. ⁴ ŋan duadi wula biani alie, ki tabni a ya kali n tuogi iyaa tiipo. Li biana nni i, ke bi ba tuuni a daapanda, li padbinbindli tugma po. ⁵ ŋan bobni Akasia daapanda, ki duadi a yeni wula. ⁶ ŋan seni li ŋubli juuma padbinbindli bu kpalbu yaabu duagi yiko ñɔmaama kpagu nintuali. Li baa ye ku kpagu bonbiili nintuali i, naankani ke ke N baa kadi yeni a. ⁷ Li buali ke Haarɔn ń ya ŋubindi siŋaagu kuli tulaali ŋubli i. O baa ŋubindi wan bua fiadi ki ŋanbi mu fidsanmu, ⁸ Haarɔn ya go ba cuoni mu fidsanmu ku yenjuogu, li buali ke li ŋubli ń ya tundi ki ŋubi yognu kuli, N ya kpiagdi po, nifiima ń tuu nifiima. ⁹ Ama li ki buali ke lan juu bontɔli li ŋubli binbindli po, laa buali padjuukaali paabu. Daama paabu kan wuli lipo. ¹⁰ Haarɔn ba tieni ti tuobiadi po sugli miabu yenma, binli kuli, li padbinbinldi yina po. O ba mia ti tuonbiadi po sugli yeni ki yanpadkaaga sɔma, binli nni yenma, hali nifiima ń tuu nifiima. Li padbinbindli baa tie O Diedo nintuali yaali n gagdi ki ŋani hali boncianla. ¹¹ O Diedo den maadi Moyiisi, ki yedi o, ¹² "A cili Israyeli yaaba cɔli, nilo kuli ba pa o miali daafaabma O D iedo po. ŋan ba tieni yaali li ya tie ke a tieni li cɔli ki gbeni n yeni, lani n tie falabiado kuli ń da baa i po li cɔli yognu. ¹³ Ban cɔdi yua kuli ba pa dibapieli bɔgdima, nani ban bili maama U Tienu diegu pani. Lanya dibapienli bɔgdima baa tie paabu i, O Diedo po. ¹⁴ Ban li cɔdi yua kuli, ke o bina pundi bina piilie bii ki cie, o ba pa nni li pani. ¹⁵ Bi niba ya pa bi miali daafaabma pani, o piado kan pa lan cie dibapienli bɔgdima, o luodo mo kan a lan ya waa ki cie dibapienli bɔgdima. ¹⁶ A ya ga Israyeli yaaba kani, bi miali daafaabma pani, a ba taa lanya ligi ki sɔni U Tienu diegu, u kadkaanu po tuona. Li bogdili ń tua bontiadkaali Israyeli buolu po, N nintuali, ban ya tiani ki pa bi miali daafaabma pani." ¹⁷ O Diedo den maadi yeni Moyiisi, ki yedi o, ¹⁸ " ŋan cedi ban maa kumɔndi tadigu yeni ku kumɔndi tuankaanu, kuni n baa tie mi nidiŋanbima tiagu. ŋan sieni gu u kadkaanu yeni li padbinbindli siiga, ki tieni mi ñima ki niinni. ¹⁹ Haarɔn yeni o bijaba baa nii, ki ŋuudi bi taana yeni ku niinni ya ñima i. ²⁰ Bi ya ba kua u kadkaanu gbandieli nni, bii bi ya bua kua ki yidi salga li padbinbindli po, li buali ke ban nidi ki ŋanbi bi yula lini n tie ban da kpe. ²¹ Li buali ke ban nidi, ki ŋuudi bi taana, lani n tie ban da kpe. Lan tua Haarɔn yeni o puolŋuani yeni bi nifiima kuli po, maabilkaama hali ya yogu ń tuu ya yogu." ²² O Diedo go den maadi yeni Moyiisi ki yedi o, ²³ " ŋan lingi a ŋubli nuulu n mani: Miiri, ya nuulu n mani cilo bona mu; Sinamɔni ya nuulu n mani, cilo bona lie yeni bɔgdima; Kani ya nuulu n mani, cilo bona lie, yeni bɔgdima; ²⁴ Kasia cilo bona mu, lan cɔlni nani ban bingdi maama u kaangagdiŋamu nni yeni; yeni Olifi kama liida luoba. ²⁵ ŋan cedi tulaali tuonsɔnbanlo ń taani lanya tulaali buoli kuli, ki bobni kpagagdiŋanma. Mani n baa tie ban baa tuuni yeni ya kpagagdiŋanma Nini baba ya po. ²⁶ ŋan sɔgi u kadkaanu gbandieli yeni li kpagagdiŋanma yeni yiko ñɔmaama kpagu. ²⁷ Ki sɔgi taabli yeni li bonbaanbidi kuli, u fisantuankaanu yeni u tiabobinkaadi, li ŋubli binbindli, ²⁸ Ki sɔgi a padjuukaana binbindli eni li tiabobinkaadi, ki sɔgi ku tadgu yeni ku tuankaanu. ²⁹ ŋan sɔgi mi kpagagdiŋanma, ki ŋanbi ya bona kuli gagdi ki dagdi Mini baba ya tuona po i. Yua, bii yaali n sii lanya bona kuli mo gagdi ki ŋanbi. ³⁰ ŋan sɔgi ki ŋanbi Haarɔn yeni o bijaba, ban gagdi ki dagdi yeni mini ya salga yidkaaba. ³¹ ŋan yedi Israyeli yaaba, 'Ne tie ya kpagagdiŋanma n bobni ki dagdi yeni O Diedo baba ya tuona po i, ti buolu nni, hali nifiima ń tuu nifiima. ³² Li tie kuali nilo po, ke wan sɔgi li kpama Li go ki cabi ke nilo ń ŋɔli li kpama buolu yeni li bonbaanbidi, kelima mi bobni O Diedo baba ya po i. Yin fangi i yula li kpama po. ³³ Yua n ŋɔli li kpama liema, bii yua taa li kpama, ki sɔgi nitiano, li dagdi ke ban deli ki ñani li nilo u buolu nni.'" ³⁴ O Diedo den yedi Moyiisi " Lingi ya tiidi nuulu n mani, nani Sitoraksi, Onikisi yeni Galbanumi, ki pugni ŋan bani ya tiidi ke i nuulu mani. ³⁵ ŋan cedi tulaali tuonsɔnbanlo ń taani likuli ki pugni mi yaama lan tua ya ŋubli nuulu n mani, kaa pia jɔgindi bakuli, ki dagdi Mini baba ya po. ³⁶ ŋan taani likuli, ki nugi, ki baa li bonyoma. ŋan bɔgdi li bonyoma, ki seni yiko ñɔmaama kpagu kani, u kadkaanu, li gbandieli nni, Min baa kadi yeni a naani. Yin fangi i yula ki cɔlni li ŋubli gagdiŋanma. ³⁷ ŋan ba bobni ya ŋubli ne, yin da bobni yinba ya po li ŋubli buolu yen li bonbaanbidi. Li gagdiŋanma ki dagdi yeni yi. ³⁸ Yua n bobni li ŋubli buolu o yuli po, li dagdi ke ban deli ki ñani o li nitaanli nni."