¹ Yini Israyeli yaaba siiga, a kpelo Haarɔn yeni o bijaba: Nadaabi, Abihu, Elehasari, yeni Itamari a kani, ban tua salga yidkaaba, ki ya tuuni npo. ² ŋan bobni a kpelo Haarɔn po ya tialakaadi n gagdi ki dagdi ke N lugdi o ki puni o li bali. ³ ŋan kali ki boe yeni yaaba n pia mi yanfuoma, min gbieni yaaba yeni mi yanfuoma, ban bobni Haarɔn po ya tialakaadi n wangi ke o gagdi ki dagdi yeni wan tua salga yidkaaba ciamo npo. ⁴ Ban ba bobni ya tialakaadi n ne: ki sogdiga, ki liaditedga, gu liadfagdili, ya gbagdigu n kpa a bala, li finfinjuali yeni ku gbanñagdigu. bani n ba bobni li tialakaadi lan waani ke ti gagdi ki dagdi npo. Li tiadi baa tie a kpelo Haarɔn yeni o bijaba ya tiadi lan waani ke bani n baa tuuni npo, ki tie salga yidkaaba. ⁵ Ya ŋaldo n ba kpa a bala ba taa wula gaali, yeni leni caba yaa n bɔni nani tawalgbangu yeni, yeni yaa n mɔni colicoli, yeni yaa n mɔni ki tuudi. ⁶ Ban bobni wula liadtedga yeni ya caba n pia tawalgbanbɔngu, ki ŋmadi yeni ya gaali n mɔni colicoli, ki mɔni ki tuudi. Li baa tie tuonsɔnbanba tuoli i. ⁷ Yin kpa cabmu lie, ki tabni a buacaba kani. ⁸ Ku gbanñagdigu yuu n baa maa ki liadtedga po yeni ba taani yeni ga ki ya tie cabyenli; bi ba lugi gu yeni wula gaali yeni leni yii n pia tawalgbanbɔngu nannanli, ki mɔni colicoli, ki mɔni ki tuudi. ⁹ ŋan taa Oniksi tana, ki diani apo Israyeli piiga n bijaliedba. ¹⁰ Yela luoba baa ye tanyenli po, yela luoba mo tantɔli po, lan cɔlni li bijaba maakpedi. ¹¹ ŋan diani a tana yeni po nani a tuonsɔnbanda ń dangi maama a tana po yeni, ki yuandi ki ñuni li tana wula. Yin maani li tana ki liadtedga buapiadi po, lan tua bontiadkaali yaali n ki pia piinma O Diedo po yaali n nua Israyeli piiga n bijaliedba po. Haarɔn ba gedi yeni bi yela o buacaba po, O Diedo nituali, lan tua bontiadkaali o po. ¹³ Likuli baa ye wula tuadi nni i, ¹⁴ ki tuugi yeni wula laani ilie, ke i tuugi yeni ti tuadi. ¹⁵ Yin bobni ya benŋundu n tie tuonsɔnbanlo ya tuonli nani ban bobni ki sogdiga maama yeni, Yin lugi u yeni wula gaali, yi n bɔni nani tawalgbanbɔngu, ki ŋmadi yeni ti yankobdi yeni leni gaali yii n mɔni colicoli, yeni yii n mɔni ki tuudi. ¹⁶ U kali kuli baa dɔa i. Yin gbabi, ki tagni u benŋundu. u fagmu baa tie nubadyaagu, u piamu mo nubadyaagu. ¹⁷ Yin sagni u niinni ya tanŋana n pia mayuli ke a dunga pa, juudi na. U cincinjuudu baa tie rubi, topasi, safiiri yeni emerodi tanŋanma i. ¹⁸ U juudlielu baa tie emrodi,safiiri, yeni diaman tana i. ¹⁹ U juudtaalu baa pia yasenti, agati yeni emetisiti tana i. ²⁰ U juudnaalu baa pia berili, oniksi yeni jasipa tani i. Bi ba sagni li tanŋana kuli wula tuadi nni i. ²¹ Li buali lan sagni li tanŋana, lan cɔlni Israyeli bijaba yela i, maama ke li ba cɔlni yuakuli yeni o yeli. Li tana baa tie nani tanpɔn diani yeni, ki wangi cugyenli li piiga n cuglieda siiga. ²² Yin tugni u benŋundu po wula laani nani baabi yeni. ²³ Yin bobni wula biamu, mulie, ki kpa ki tabni u benŋundu kuni po. ²⁴ Lanya biamu po i, ke i ba lɔgni wula laani poyenpo, u benŋundu kuni po. ²⁵ Yin lɔgni i wula laani yeni potɔpo yeni wula tuadi yaadi n pia a tanŋanna ki maa ti buapiadi po yeni, liiga po. ²⁶ Yin duadi wula biamu alie, ki lɔgni mu ki kunliega po caba fiabi po, mun guani nunga po. ²⁷ Yin go duadi wula biamu alie, ki loli ki tabni tiipo ti buapiadi caba po u benŋuunu mun nagni ku gbanñagdigu. ²⁸ Mu ba loli ki taani ti buadi caba biamu yeni u benŋuunu yaamu yeni galula baabu, ki ya taabi u benŋuunu gbanñagdigu tiipo. Lani n ba todi li benliadli yeni u benŋuunu ń da paadi yeni i yii. ²⁹ Li ya tie ke Haarɔn kua u kaangagdiŋamu nni, o baa tugi Israyeli cuga yela ³⁰ ŋan ŋuuni u benŋuunu nni ya tana n tie Tumima yeni Urima ŋan fidi ki todi a jaga taama. Lanwani ii, li tana baa maa Haarɔn benli po, wan kua ya yognu O Diedo nintuali. Lanyapo i ke li buali ke Haarɔn ń ya ya laá lanya tiadi, ke li tana maa o benli po, lani n tie wan fidi ki bandi O Diedo yanbuama Israyeli yaaba po. ³¹ Yin lugi li benliadli likuli ń ya mɔni ki tuudi. ³² Yin bobni li bonli u liadñialu siiga, li yuli ń ba kua naani. Yin kpaa a bala ki lindi li bonli yeni, ki guuni li liadli lan da padi. Ya lugdo n pia a bala kpaama tuonsɔnbanma n ba kpaa li liadli. ³³ Li liadli tiipo, yin lugi gerenadie bonluana yeni ya pakobdi n mɔni ki tuudi, ki ŋmadi yeni yaadi n mɔni colcoli ki lindi. Yin duadi wula sanbuamu, ki sagni gerenadie bonluana siiga ki lindi. ³⁴ Gerenadie bonluana lie siiga kuli, wula sanbuali baa saagi, ki ban lindi li liadli. ³⁵ Haarɔn ya bua kua u kaangagdiŋamu nni, ki sɔni o tuonli, o baa laá lanya liadli i, ban ya gbia ke a sanbuana mɔa wan kua u kaangagdiŋamu nni yeni wan ña ya yognu kuli. Lani n tie wan da kpe. ³⁶ Yin duadi ya wula tadtialga n naani mi puuma, ki diani kipo nani ban jaagi a yela maama yeni, "Li gagdi ki ŋani O Diedo po i." ³⁷ Yin baa galula baabu, ki kpaa ki tabni li dibali li finfinjuali liiga po. ³⁸ Li dibali baa maa Haarɔn yutunli po i; wani n baa tugi Israyeli yaaba tagli, yeni bi paabu. Li finfinjuali baa bii ki ye Haarɔn yutunli po i, lani n tie O Diedo n tuo ki ga bi paabu. ³⁹ Yin lugi li benliadli yeni leni gaali yii n ñilgi ki ŋani, ki lugi li finfinjuali yeni ya leni gaali n ñilgiki ŋani, ki kpaa a bala ki lindi yeni mi tuonsɔnbanma. ⁴⁰ Haarɔn bijaba po, yin lugi a benliada, ti gbanñagditi, a finfinjuana lanya tiadi kuli ń gagdi ki wangi bi nicingma yeni bi bulcindi. ⁴¹ ŋan lani kpelo, Haarɔn yeni o bijaba, ŋan wuli bi yula po mi kpaŋanma, ki bogdi ba, ki gagdi ki kaani ba min puogi ba ya tuonli po, ban ya tie n salga yidkaaba. ⁴² Yin lugi bi po leni gaali banda, ya canyiedi, n ba legni bi mubima, ki cili ki ciaga ki ban pundi a pana. ⁴³ Haarɔn yeni o bijaba baa la lanya tiadi i, li ya tie ke bi kua u kadkaanu, bii bi ya bua nagni li padbinbindli ki sɔni bi tuonli u kaangagdiŋamu nni. Bi ba cɔlni lanya tuada, ki da baa mi tudma nni, ki kpe, kelima bi waani bi mubima O Diedo nintuali. Li tuada ń tua Haarɔn yeni o puolŋuani po yiko maabilkaama hali ya yogu ń tuu ya yogu kuli.