¹ Yin caani Akasia daadi padbinbindli salga po li fagmu ń ya tie nuukpanduna mu, li piamu mo nuukpaduna mu. li binbindli baa tie bonŋmabdagdili, ke li sedma tie nuukpanduna taa. ² Yin duoni li kunnaadi yin yugdi ki nandi yeni li padbinbindli, ki duadi a ti kumɔndi. ³ Yin bobni li padbinbindli tiadi: a bobŋaankaana, mu tadbuomu, a tadkuana ti nancɔgtiadi ya pelinba baa wo mi fantama. Yin bobni lanya tiadi kuli yeni ti kumɔndi. ⁴ Yin bobni ti kumɔndi gilyayaari, yeni ti kumɔdi biamu li kunnaadi po. ⁵ Yin bobni li binbindli yeni gilyaari, ki cili tinga ki ban dagdi li sedma bɔgdima. ⁶ Yin bobni Akasia daadi cuokaani li binbindli po, ki duadi yi yeniti kumɔndi. ⁷ I cuokaani yeni ba kua ki tuuni a biana nni i, li cuokaani baa ye li padbinbindli kali po, ki todi yeni mi yugdima. ⁸ Li daaseda padbinbindli baa tie bonlongu i. Yin bobni li nani min waani yi maama li juali po yeni. ⁹ Yin bobni u luolu li gbandieli po. Yin jɔni ya kpalbu n lugi yeni leni niganu po ke bu fagmu tie nuukpaduna kobga ¹⁰ Li kpaldi baa pia daasieda piilie yeni ti kumɔndi bunbuna piilie bi ba taani ki loli a daasieda yeni yeni ŋanjilfa baabu. ¹¹ Nujienu po mo baa pia daasieda piilie ke a tuu bunbuna piilie nni yeni ti kumɔndi biana, ki ltaani ki luoli yeni ŋanjilfa baabi. ¹² U luolu nintuali po baa pia kpalbu ke bu fagmu tie nuukpaduna piimu, ki pia daasieda piiga yeni bunbuna piiga. ¹³ Puoli po mo baa pia ya kpalbu fagmu tie nuukpanduna piimu. ¹⁴ Bu bulñɔbu kani cabjɔnkaali fagmu baa tie nuukpaduna piiga a mu, ki pia daasieda taa yeni bunbuna taa. ¹⁵ Potɔ po mo baa pia ya cabjɔnkaali fagmu baa tie nuukpanduna piiga a mu yeni a bunbuna yeni a a biana. ¹⁶ Bu bulñɔjabu baa pia ya cabli fagmu baa tie nuukpanduna piilie, ke li lugi yeni leni yaali n pia taawalgbanbɔngu, nannanli, yeni yaali n mɔni colicoli, yeni yaali n mɔni ku tuudi, ki kpa a bala ki lindi. A baa pia daasieda na yeni bunbuna na. ¹⁷ U luolu daasieda kuli baa pia ŋanjilfa baabi, ŋanjilfa biana yeni ti kumɔndi bunbuna. ¹⁸ U luolu fagmu baa tie nuukpanduna kobga u piamu mo nuukpaduna piimu, u sedma mo nuukpanduna mu, ke u cabjɔnkaana lugi yeni leni ki kagni ki lindi yeni ti kumɔndi bunbuna . ¹⁹ Li gbandieli nni yeni ku jongu nni tiadi yeni u luolu nni kuli baa tie kumɔndi tiadi i. ²⁰ Yin cedi Israyeli buolu ń cua yeni Olifi kpama, yaama n ŋanbi ki ŋɔli, mu fidsanmu po mun ya tundi ki co, ki yendi. ²¹ Haarɔn yeni o bijaba ba sieni mu fidsanmu mun ya co yognu kuli O Diedo po, ki cili yenjuogu ki ban pundi siŋaagu, u tantaanu jongu nni, li gbandieli caba yaa n liegi yiko ñɔmaama kpagu kani. Lanya ñɔmaama ń tua ya bogdili ke Israyeli buolu baa cɔlni hali nifiima ń tuu nifiima.