¹ I ba bobni u kaangagidiŋamu yeni leni caba yaa pia tawalgbanbɔngu yeni yaa n mɔni ki tuudi yeni yaa n mɔni colcoli, ki pia ciherubennba nannanli a po. Li baa tie tuonsɔnbanlo ya tuonli i. ² cabyenli fagmu baa tie nuukpanduna piilie a niin (28) a piamu mo baa tie nuukpanduna na (4) . A caba kuli yabnu baa dɔa i. ³ I ba taani ki tugni caba mu, ki go taani ki tugni ya cabmuuda n sieni mo. ⁴ I ba bobni baabijɔnkee yii pia taawalgbanbɔngu ya nannanli a caba kunu po. I go ba tieni yeni i ya caba n sieni mo ya kunu po. ⁵ I ba bobni gaali piimu li cincincabli kunu po, ki go bobni gaali piimu, li cablieli kunu po. yin tieni maama ke i gaali yeni ń ya tuoli yeni i yii. ⁶ Yin duadi wula bonjɔnkaana piimu, ki lɔgni ki tugni a caba, ki cebni ki mubni u kaangagdiŋamu. ⁷ Yin bobni ya caba n lugi yeni ti ŋuakobdi ki pua jongu li gbandieli po. I ba bobni caba piigi n yenli li jongu po. 8 Cabli kuli fagmu baa tie nuukpanduna piitaa, li piamu mo ń ya tie nuukpanduna na. li piiga n cabyenli yeni baa dɔa i. ⁹ I ba taani ki tugni caba mu, ki go taani ki tugni caba luoba yaa sieni. I ba tagni li cabluobli ku jongu bulñɔbu kani. ¹⁰ I ba bobni gaali piimu li cincincabli kunga po, ki go bobni gaali piimi li cablieli kunga po. ¹¹ I ba bobni ti kumɔndi bonjɔnkaana piimu, ki jɔni i gaali ki tugni ki cebni li gbandieli jongu yenma. ¹² Ya cabli n sieni gani po lani ntie ya cabli n sieni ba jɔni ku jongu puoli i. ¹³ cabyenli yaali n tie nukpandunyenli baa ye poyen po, ke cabtɔli yaali mo n tie nuukpandunyenli baa ye potɔ po. Ku jongu caba yaa n sieni baa juani li gbandieli kuni po, poyen po yeni potɔ po i, ki legni li. ¹⁴ Yin pini li gbandieli yeni ti patonkobdi yaadi n mɔni coli coli, ki go pugni ban sɔdi ya paton-gbanmɔndi poli po. ¹⁵ yin bobni Akasia daasieda yeni li daapanda, ki tebni U Tienu gbandieli , ki pugni li u paalu ¹⁶ Daagu kuli fagmu baa tie nuukpanduna piiga ku sedma mo n ya tie nuukpandunyenli yeni bɔgdima. ¹⁷ Daapandu kuli baa pia mubinkaani lie i, ke i tiegi i yii. I ba bobni li gbandieli daapanda kuli yeni i. ¹⁸ I ya bobni li gbandieli daapanda, li baa tie daaanda piilie i ganu po. ¹⁹ Yin bobni bunbuna piina ki sɔlni a daapanda mubinkaani daagu kuli baa pia bunbuna lie i, daapandli kuli baa pia bunbuna lie i, lan sɔlni a mubinkaani. ²⁰ Li gbandieli jienu po mo baa pia daapanda piilie i. ²¹ yeni li kumɔndi bunbunpiinaada. li cincindaapandli baa pia bunbuna lie, yaali n tua ń ya pia bunbuna lie, kiban juadi lidaapanda kuli. ²² Li gbandieli puoli po, nintuali, i ba bobni daapanda luoba. ²³ puoli po kuni baa pia daapanda lie. ²⁴ li daasieda baa se liba liba tinga po, ama ki na taani ki tuogi liyaa poli po, li baa tie yeni i puoli po kunliedi kuli. ²⁵ Daasieda niini yeni li kumɔndi bunbuna. A bunbuna kuli ba taani piiga n bunbuna luoba i, li cincindaasiedli baa pia bubuna lie i, yaali n tua mo yeni, daasiedli kuli baa pia bunbuna lie i. ²⁶ I ba bobni Akasia daapandidi, li gbandieli poyenpo baa pia daapandidi mu, ²⁷ li gbandieli potɔ po mo baa pia daapandidi mu i, li puoli po mo daapandidi mu, li nintuali mo daapandidi mu. ²⁸ Ya daapandigu n ye a daasieda sinsiiga nni polu po ba cili poyendu po, ki ban tuoni potɔ po. ²⁹ Yin duadi wula a daasieda po yin ñuni a kanda mo yeni wula li kanda nni i, ke a daapanda ba kua ki cuo ki mubni lan ya paa ³⁰ I ba bobni li gbandieli nani lan den waani maama li juali pi yeni i. ³¹ Yin bobni ya kpalbu n lugi yeni leni yaali n pia taawalgbanbɔngu, yaali n mɔni colicoli yeni yaali n mɔni ki tuudi, ke bi tagi ciheruben bu po, li baa tie tuonsɔnbanlo tuonŋanli i. ³² Yin jɔni bu ban duadi wula ya Akasia daasiednaada po yeni. Bi ba tuuni li daasiednaada ti kumɔndi bunbunnaada nni. 3 Yin jɔni bu kpalbu a bonlɔginkaana po, ki taa yikodi maama kpagu ki kuani lienni. Bu kpalbu ba paadi u kaangagdiŋamu yeni u kaangagdiŋanmɔnu. ³⁴ Yin taa li bonbiili ki ŋɔgni yikodi ñɔmaama kpagu yuu n ye u kaangagdiŋanmɔnu nni yeni. ³⁵ Yin seni taabli bu kpalbu niinpo. I ba seni u fisantuankaanu potɔgu po li gbandieli ganu po, taabli ń ya ye jienu po. ³⁶ Yin tieni li kpajɔnkaabu ku jongu bulñɔbu kani. Bi ba lugi li kpalbu yeni leni yaali bɔni nani taawalgbangu yeni, ki mɔni colicoli, ki go mɔni ki tuudi ki kpa a bala ki kogni. ³⁷ Yin bobni Akasia daasieda mu, ki duadi ti yeni wula, a bonjɔnkaana mo baa tie wula i, ki sɔlni a daasieda ti kumɔndi bunbunmuuda nni.