¹ Ban den ñani Ejipti diema nni, o ŋmaataalo daali, li daacincinli daali, bi den pundi Sinayi fanpienma nni. ² Ban ñani Rifidimi, ki kua Sinayi fanpienma nni, bi den caani bi jongu mi fanpienma nni li juali kani. ³ Moyiisi den doni U Tienu kani. O Diedo den yini o li juali nni, ki yedi o "ŋan maadi Jakɔbu buolu yaaba, Israyeli yaaba: ⁴ I la min sɔni Ejipti diema nni yaaba maama, I la min taa yi N fiabi po maama, ki cua yeni yi N kani. ⁵ Mɔlane, i ya cibni ki cengi N maama, ki kubi, ki go cɔlni N maabilkaama,i baa tie N Buolu i buoli kuli siiga, kelima ki tinga kuli, Mini n die. ⁶ I ba tua salga yidkaaba diema yeni ya nitaanli n gagdi ki ŋani N po. ŋan ba maadi Israyeli yaaba ya maama n yeni." ⁷ Moyiisi den taani Israyeli nikpelba. O den togdi, ki waani ba O Diedo ń bili o ya ñɔmaama bi po. ⁸ Li nitaanli kuli den taani, ki jiini, ki yedi, "Ti ba tieni O Diedo ń yedi ke tin tieni yaali kuli." Lanwani ii, Moyiisi en doni ki togdi O Diedo li nitaanli ń yedi yaali. ⁹ O Diedo den yedi Moyiisi, "N ba cua i kani ya ŋunli n kpiagi nni, yeni bi niba baa gbia ke n maadi yeni a, bi go baa dugi a po hali ya yognu kuli." Moyiisi den waani O Diedo li nitaanli maama. ¹⁰ O Diedo den yedi Moyiisi, "gedi li nitaanli kani, ki bobni ba mini ya po dinne yeni saala, ŋancedi ban ŋuudi bi tiadi. ¹¹ Yin bobni ki ya guu li daataali daali, kelima, li daataali daali, O Diedo ba ña Sinayi juali po ki jiidi. ¹² ŋan bili u bianu, ki lindi li juali, ki maadi bi niba, 'Fangi mani i yula ki da gedi li juali po, ki go da sii li kunga mo. Yua n sii li juali, bi ba jia o ti buudi, ki kpa o.' ¹³ Obakuli ya nuu kan sii ya nilo n sii li juali. Bi ba lugdi o a tana bii ban yegi o i piemi bii a kpaana ki kpa o. Lan tie nilo yo oo, yangi yo oo, li buali ke ban kpa o i. Bi ya gbadi ke li naatunli piebi, ban do ki sedi ki juakunga." ¹⁴ Moyiisi den ñani li juali kani, ki guani li nitaanli kani. O den gandi yaaba n ba ŋuudi bi tiadi O Dido po. ¹⁵ O den yedi li nitaanli "Yin bobni i yula li daataali daali po; obakuli ń da nagni o denpua. ¹⁶ Li daataali daali, ku siŋaagu nni, i taatantandi, i taañigdi ya ŋunli n kpiagi ti talwadi nni den tieni li juali yuli po, ke bi gbadi ke li naatunli piebi ki waagi. Ti jawaanciandi den cuo bi niba, ke bi digbi ku jongu nni. ¹⁷ Moyiisi den cedi ke bi niba ñani ku jongu nni, ki ba tuogi U Tienu ¹⁸ Sinayi juali kuli den gbie yeni muñiigu i, kelima O Diedo den ñani li po ki ji yeni mu yeni muñiigu i. I muñii den do nani fantanbuogu nni yii yeni, ke li juali kuli digbi boncianla. ¹⁹ Li naatunli ń den piebi, ki do ki pugdi, Moyiisi den maadi, ke U Tienu yaadi ki jiini o ²⁰ O Diedo den jiidi Sinayi juali yuli po, O den sedi li juali yuli po, ki yini Moyiisi.Moyiisi den doni. ²¹ O Diedo den yedi Moyiisi, "Jiidi ki tuodi ki waani li nitaanli, ke ban da nuuli ke ban la nni, lanyaaka bi niba bonciala ba kpe. ²² Salga yidkaaba yaaba mo n doni N kani ń piadi ki sedi. ŋan bobni ba N cuama po, Min da ti pua ba." ²³ Moyiisi den yedi O Diedo, "Li nitaanli kan fidi ki do li juali po, kelima a den bili ti li kuali ki yedi 'Bili u bianu, ki lindi li juali, ki paadi yeni O Diedo kani.'" ²⁴ O Diedo den yedi o "Gedi, jiidi ki ban yegi yeni Haarɔn na, ama ŋan da cedi salga yidkaaba yeni bi niba ń kua i siiga, ki kandi u bianu ki cua N kani, lanyaaka N ba pua ba. ²⁵ Lanwani ii, Moyiisi den jiidi ki ban ŋanbi ki maadi, ki waani bi niba.