¹ O Diedo ń den maadi ya maama n ne: ² Mini n tie O Diedo, I Tienu, yua n ñani yi Ejipti diema nni, ki ñni yi a yonbdela nni. ³ I kan pugi bultiani N nintuali. ⁴ I kan tagi bonnannanli, bii yaali n naani yeni tanpoli bonli, bii ki tinga po bonli, bii mi ñima nni bonli. ⁵ I kan gbaani ki pugi li bonnannana, kelima, Mini O Diedo, i Tienu tie ya Tienu n pia li ponponli. N ba tuu i yaajanba biidi panli, ki dadi bi yaabila tuba hali ki tuu nifiima taa bii nifiima na yaaba n nani nni po. ⁶ Ama N wangi pali nni buama, ki go gbia yaaba n bua nni, ki go cɔlni N yikodi po mi niñima hali nifiima tudli. ⁷ I kan taa O Diedo, i Tienu yeli fanfanma, kelima N kan taa ki cabi yua n taa N yeli fanma po. ⁸ Yin ya tiani Saba daali po, ki gagdi li daali ki bili N po. ⁹ I ba fidi ki sɔni i tuona kuli dana luoba. ¹⁰ Ama li daaleleli tie Saba i, O Diedo, i Tienu po. Lanya daali, i kan sɔni tuonli bakuli, yinba, i bijaba, i bonpola, i jatuada, i potuada, i yandi, bii ya caano n cani i deni. ¹¹ Kelima O Diedo taa dana luoba i, ki tagi tanpoli yeni ki tinga, li mɔgli yeni yaali n ye li niinni kuli, ki kali li daaleleli ki fuodi. Lanyapo i, ke O Diedo gagdi Saba daali, ki ŋanbi li, ki yadi mi yediŋanma li po. ¹² Cɔlni a naá yeni a báa, lani n tie a miali ń fagdi O Diedo a Tienu ń puni yi ya tinga po ne. ¹³ A kan kpa nilo. ¹⁴ A kan conbi. ¹⁵ A kan su nilo bonli. ¹⁶ A kan pua tofaama a lielo po. ¹⁷ A kan ya nani a lielo o diegu po, o denpua po, o potuadli bii o jatuadli po, o nua po, bii o ŋunbo po, lanyaaka wan li yeni yaali kuli po." ¹⁸ Li nitaanli kuli den la i taañigdi yeni i taatantandi, ki gbadi li naatunli piebma, ki la li juali muniigu. Bi niba ń la lani, ke bidigbi, ki sudi kisedi fagma. ¹⁹ Bi den yedi Moyiisi, "Maadi yeni ti, ti ba gbadi a maama; ama, ŋan da cedi U Tienu ń ya maadi yeni ti, lanyaaka ti ba kpe i." ²⁰ Moyiisi den maadi li nitaanli, "Yin da jie, kelima U Tienu cua ki bua bigni yi, ki cedi o kpiagdi ń kua i niinni, yin ji da tieni tuonbiadi." ²¹ Lanwani ii, li nitaanli den se hali fagma, ke Moyiisi nagni li biigcianli nni, U Tienu ń den ye naankani. ²² O Diedo den yedi Moyiisi, "ŋan ba maadi Israyeli yaaba ya maama n ne: 'Yinba iba la ke N ñani hali tanpojoma nni, ki maadi yeni yi . ²³ I ji kan ya tagi ŋanjilfa buli yeni wula buli, ki pugi yi n nintuali. ²⁴ I ba maa ti tandi salga yidma binbindli N po, ki ya padi i pee, i nee, a padjuukaana po yeni i jaandi pada po. Min cedi ke i tiadi N yeli naankani kuli, ki ba kpiagi nni, N ba cua i kani ki yadi mi yedŋanma i po. ²⁵ I ya maa N binbindli yeni tana, yin da kpiedi li tana, kelima, i ya tuuni li tana po yeni i tiagu, i fanbi li tana n yeni. ²⁶ Li ki buali ke yin do ŋmaada ka ki pundi N binbindli kani, ki da ti wangi i mubima mi doma yognu.'"