¹ Madian salga yidka, Jetro, Moyiisi cuado den gbadi U Tienu ń tieni yaali kuli, Moyiisi po yeni O buolu Israyeli yaaba po. O den gbadi ke O Diedo ñani Israyeli yaaba Ejipti diema nni. ² Moyiisi cuado Jetro den taa o bisalo Sefora, Moyiisi ń den cedi ke o denpua, yua n guani ki kuni o baadiegu yeni, ³ Yeni o pua bonjaliedmu; bonjayenga den yi Gercihomi, kelima, Moyiisi den yedi, "N den tie caano, ki wuo doglamu nni." ⁴ Ki bonjaliega yeli den tie Eliyeseri, kelima, o den yedi, "N yaajanba Tienu n den tie n todka, ki faabi nni yeni Farawɔn jugsiega." ⁵ Moyiisi cuado, Jetro den cua yeni Moyiisi bijaba yeni o denpua mi fanpienma nni, wan den caani bi jongu naani U Tienu juali po. ⁶ O den yedi Moyiisi, "Mini, a cuado, Jetro n kpendi a kani yeni a denpua yeni a bonjaliedmu." ⁷ Moyiisi den gedi ki tuogi o cuado, ki ñuani ki fuondi o, ki wobi o. Ke bi buali ki bandi bikuli diedi laabaali, ki kua Moyiisi jongu nni. ⁸ Moyiisi den maadi o cuado O Diedo ń tieni Farawɔn yeni Ejipti yaaba yaali kuli, kelima Israyeli yaaba po. O den waani o ban la ya falaciamo yeni ya janjanma bi sancenli nni, yeni O Diedo ń faabi ba maama. ⁹ Jetro pali den mangi O Diedo ń tieni ya ŋanma kuli Israyeli yaaba po, yeni wan faabi ba Ejipti yaaba nui nni. ¹⁰ Jetro den yedi, "O Diedo ń ga ti kpiagdi yeni wan faabi yi Ejipti yaaba nui nni yeni Farawɔn nui nni, ki go ñani yi Ejipti yaaba ń den wangi ba ya falaciamo nni. ¹¹ Mɔlane, n ji bandi ke O Diedo yabindi cie ya buli n sieni kuli, kelima Ejipti yaaba ń den wangi bi japaaciandi, ki cagni Israyeli yaaba, U Tienu den faabi O buolu." ¹² Moyiisi cuado, Jetro den bobni li padjuukaali, ki go yidi ti kpiagdi salga, U Tienu po. Haarɔn, yeni Israyeli nikpelba den cua ki bɔgdi salga jiema U Tienu nituali yeni Moyiisi cuado. ¹³ Lan den fiifandi, Moyiisi den kali ki jia ti buudi yeni li nitaanli. Bi niba den see ki lindi o, ki cili ku siŋaagu, ki ban pundi hali ku yenjuogu. ¹⁴ Moyiisi cuadbaa ń la wan tieni li nitaanli yaali, ke o yedi, "A tiendi bi niba ne be n yeni i? Be n cedi ke a kaa a baba, ke bi niba kuli see ki cili siŋaagu hali yeni ku yenjuogu?" ¹⁵ Moyiisi den yedi o cuodo, Bi niba kpendi n kani, ki buali U Tienu buujiali. ¹⁶ Bi ya pia maabila bi siiga, bi yi cua, min jia bi buudi, ki go waani ba U Tienu maabilkaama yeni o yikodi." ¹⁷ Moyiisi cuado den yedi o, "ŋan tie yaali ki ŋani bá waamu. ¹⁸ I cɔgni i yula boncianla, fini yeni a niba yaaba n ye yeni a. Ya tuonli ne kpiagi a po boncianla. A kanfidi ki sɔni lanya tuonli fini a ba. ¹⁹ Cengi nni, N ba teni a i cegli, U Tienu ń ya ye yeni a, kelima fini n tie yua n kaa linitaanli kaanu U Tienu nintuali, fini n caa yeni bi maabila U Tienu kani. ²⁰ Li buali ke ŋan tundi ba, ban bandi O maabilkaama yeni o yikodi. A ba waani ba ban baa cuoni maama yeni ban baa tuuni ya tuona. ²¹ Yaali n pugdi, li buali ke ŋan lugdi ya yanfodanba n ba fidi li nitaali siiga, ya jaba n fangi U Tienu, yaaba n maadi i mɔni, ki fangi bi yula yeni i jodi. A ba kaani ba ban ya tie bi niba liiga yaaba; yaaba n baa tie niba tudli, niba kobga, niba piimu, yeni niba piiga liiga yaaba. ²² Bani n baa jiagi ti buudi yeni bi niba ń pia ya maabila kuli bi yema nni, ama bi ya la ya maama n paa, bi ba cua yeni ma a kani i. Li ya tie ya maabila n sieni kuli, bi ba fidi ki jia lanya buudi. Yeni, li tuonli ba yuagi a po, ban todi a yin tugi li tugikpiagli. ²³ A ya tieni yeni, ke U Tienu wangi a ŋan baa tuuni maama, a ba fidi bonli kuli, bi niba kuli mo ba pundi yeni laafia yeni li pamanli yin caa naani." ²⁴ Lanwani ii, Moyiisi den cengi o cuadbaa maama, ki teni wan waani o yaali kuli. ²⁵ Moyiisi den lugdi ya jaba n pia mi yanfuoma Israyeli yaaba siiga, ki tieni ba liiga yaaba, bine niba tudli liiga yua, bine niba kobga liiga yua, bine niba piimu bii niba piiga liiga yua. ²⁶ Bi den jiagi ti buudi lan buali maama. Bi ya la ya maama n paa, bi yi gedi yeni ma Moyiisi kani, ama ya maabidi n sieni bi siiga nni, bi den jiagi li buudi bani biba i. ²⁷ Moyiisi den cabi o cuadbaa, Jetro, ke o guani ki kuni o diema nni.