¹ Israyeli buolu den fii Elima, ke bi nitaanli kuli pundi Sini fanpienma nni, yaama n ye Elima yeni Sinayi diema nni, li den tie o ŋmaalielo, o piiga n daamuuli, hali ban ñani Ejipti diema nni. ² Israyeli nitaanli kuli den fabni, ki fuu yeni Moyiisi yeni Haarɔn, mi fanpienma nni. ³ Israyeli yaaba den yedi ba, "O Diedo ya den cedi ke ti kpe Ejipti diema nni, tin den kaa ki kuu naani a nanboba, ki ŋmani kpanu ki guodi tikuli, li den baa tu. Kelima i ñani ti, ki cua yeni ti mi fanpienma nni ki bua mi koma ń kpa ti nitaanli kuli i." ⁴ Lanwani ii, O Diedo den yedi Moyiisi, "N ba cedi kpani ń ña ŋaljanli nni, ki baa nani ki taaga yeni i po. Li nitaanli baa ña daali kuli, ki taadi yaali n dagdi bi daali jiema, yeni, n ba bigni ba, ki diidi bi ba tɔgni bii, bi kan tɔgni n yikodi sanu i. ⁵ Yaali n ba tieni, tie ke li daaluobli daali, bi ba taa ya jiema n yabi ban yi taadi yaama taalma lie, ki kuni ki bobni ban kpeni yeni yaama kuli. ⁶ Ke Moyiisi yeni Haarɔn yedi Israyeli nitaali kuli, "Ku yenjuogu, i ba bandi ke O Diedo n ñani yi Ejipti diema nni. ⁷ Ku siŋaagu, i ba la O Diedo kpiagdi, kelima o gbadi yin fabni ki fuu yeni o maama. Ti mo tie bile yo, ke i baa fabni ki fuu yeni ti?" ⁸ Moyiisi go den yedi ba, "I ba bandi lani, ya yogu ke O Diedo ba puni yi ti nandi ku yenjuogu, yeni kpanu ki siŋaagu, yin ŋmani ki guo - Kelima o gbadi yin fabni ki fuu yeni o yaali ya po. Haarɔn yeni mini mo tie ŋma i? I fanfabni yeni i fuugu ki nua tinba ka, I fabni ku fuu yeni O Diedo i. ⁹ Moyiisi den yedi Haarɔn, "Yedi Israyeli buolu nitaanli kuli, 'Nagni mani O Diedo nintuali, kelima o gbadi i fanfabni.'" ¹⁰ Haarɔn ń den maadi yeni Israyeli nitaanli kuli, bi den gbegi ki nua mi fanpienma po i,bi ti sua ke O Diedo kpiagdi dɔgdi ti talwadi nni. ¹¹ Ke O Diedo maadi yeni Moyiisi, ki yedi o, ¹² "N gbadi Israyeli yaaba fanfabni. Maadi yeni ba, ki yedi ba, ' Ku yenjuogu, i ba ŋmani ti nandi, ku siŋaagu, i ba ŋmani kpanu ki guo. Yeni, i ba bandi ke Mini n tie O Diedo i Tienu.'" ¹³ Lanwani ii, ku yenjuogu po, a ñinpɔnpɔla den cua ki jiidi, ki gbie ku jongu. Ku sipŋaagu nni mo, ke ku mangu baa ki lindi ku jongu. ¹⁴ ku mangu ń den kaadi, bi den la mi fanpienma tinfanma po ki bonyoma bili ki naani taatanyoma. ¹⁵ Israyeli yaaba ń la lani, ke bi buali bi lieba, "Ne mo tie be i?" Bi denki bani lan tie yaali. Moyiisi den yedi ba, "O Diedo ń puni yi ya kpanu ke yin ŋmani n yeni. ¹⁶ O Diedo ń bili ya ñɔbonli n ne: Yuakuli ba wodi lan ba dagdi o maama wan di i, i dansanu nni, niyendo po kuli Omeri yenli (liira lie). yin ba wo maama n ne. Yin wodi yaali n ba dagdi i dansanu nni niba ń di lan dagdi.'" ¹⁷ Israyeli yaaba den tie yeni i. bine den yi wodi lan yabdi, tianba mo ń wodi lan ya waa. ¹⁸ Bi ya den bigni ban wodi yaali yeni Omeri bonbiginkaali, yaaba n den wodi ke li yabdi den ki di ki sengi libá, yaaba n den wodi ke li waagi mo , libá naa den pɔdi ba. Yuakuli den yi wodi o buama ń dagdi maama i. ¹⁹ Lanwani ii, Moyiisi den yedi ba. "Obakuli ń da cedi jiema ń sieni hali ku siŋaagu." ²⁰ Ama bi nan den ki cengi Moyiisi. Bi tianba bi siiga nni den yi di lan sieni hali lan fandi, ama li kpanu den yi ŋmia i, ki bedi. Lanwani ii, Moyiisi pali den beni bi po ²¹ Bi den yi wo siŋaagu siŋaagu i. Yuakuli den yi wodi wan ba di yaali daali nni i. U yienu ya doni, lan bodi. ²² Li daaluobili daali, bi den wodi biini lie lie i, Omeri alie yuakuli. Li nitaali liiga yaaba den cua ki togdi Moyiisi. ²³ O den yedi ba, "O Diedo ń yedi yaali n ne: 'Saala baa tie mi fuoma daali i, Saba ŋamo, O Diedo kpiagdi po. Pua mani yin ba pua ya kpanu, ki ŋaani yin ba ŋaani yaali. Yaali n sieni kuli, yin begni hali lan fandi.'" ²⁴ Lanwani ii, bi den wuoni yaali n sieni hali ku siŋaagu, nani Moyiisi ń waani ba maama. Li den ki ŋmia aa, li go den ki bedi mo. ²⁵ Moyiisi den den yedi ba, "Di mani lanya jiema dinne, kelima dinne tie ya daali n gagdi ki tie Saba O Diedo kpiagdi po. Dinne, i kan la li ikuani nni. ²⁶ I ba wodi li dana luoba, ama li daaleleli tie Fuoma daali (Saba), Saba daali Maani ki ye." ²⁷ Bi niba den ñani li daaleleli daali ki ba wodi Maani, ama bi den ki la libakuli. ²⁸ Lanwani ii, O Diedo den yedi Moyiisi, "Hali yeni bedaali i ke i ba ŋɔdi N ñɔbonli, ki cɔlni N yikodi? ²⁹ Cengi mani O Diedo n teni yi Saba. Lanwani ii, li daaluobili o yi teni yi dana lie kpanu i. Yuakuli i siiga nni ń ya ye o kaanu. Obakuli kan ŋmiagi wan ye naani ki ña ki gedi kaanu li daaleleli daali." ³⁰ Lanwani ii, li nitaali den yi fuodi li daaleleli daali i. ³¹ Israyeli buolu den yini lanya jiema "Maani." Li den tie bonbipienma i, ki tie nani ban pua ya laladi yeni ti siadi yeni. ³² Moyiisi den yedi, "O Diedo ń bili ya ñɔbonli n ne: 'Taa mani Maani Omeri bonmunli, ki ya kubi i buolu nifiima po, i yaabila ba fii ki la min den dingi yi yeni ya jiema mi fanpienma nni, min den ñani yi Ejipti diema nni ya yogu. ³³ Moyiisi den yedi Haarɔn, "Baa tiagu, ki wodi Maani Omeri munli ku niinni. ŋan bili O Diedo nintuali, yin ya kubi li i buolu nifiima ń tuu nifiima po." ³⁴ Nani O Diedo ń den bili Moyiisi ya ñɔbonli yeni, Haarɔn den begni li tiagu ki kpiani u ñɔnianu kpagu. ³⁵ Israyeli buolu den dini Maani hali bina piina mi fanpienma nni, ki fidi ki pundi bi niba ń ye ya diema nni. Bi den di lani i, hali, ki ban pundi Kanana diema banlu. ³⁶ Mɔlane, Omeri piiga n tie Efa yenli.