¹ N den kpaagi lankuli, ki bua min bandi o niteginka yeni o yanfodaano kuli, yeni bi tuona. Bikuli ye U Tienu nuu nni. Obakuli ki bani buama bii nanga n ba baa o. ² Bikuli juodma tie yenma i. Bi niteginkaaba yeni bi nibiadba kuli ba juodi yenma i, bi nimɔnba, bi niŋanba yeni ti nibiidi kuli, yaaba n padi a pada yeni yaaba n ki padi pada kuli. Nani bi nimɔnba yeni, bikuli nan ba kpe, Li go tie yenma i, ti tuonbiadi danba po. Nani yaaba n polgi a ñɔpola ń ba kpe yeni, yaaba n jie li ñɔpoli mo nan ba kpe. ³ Ya bonli n ye ki tinga po ne kuli juodma bia i. Yuakuli pia juodyenma i. O nisaalo pali nni gbie yeni mi biadma i, mi gaadma baba n gbie bi pala nni bi yema kuli nni. Bi yi tieni lankuli yo, ki fidi ki kpe. ⁴ Yua n pia miali, wani n daani, nani o sangbanfuodo ń cie li yanbɔkpienli yeni. ⁵ Kelima, bi nifuodba bani ke bi ba kpe, ama, bi tinkpiba ki bani libakuli. Bi ji ki pia, bi go ki guu ñuadiba kuli, kelima bi sundi bipo o. ⁶ Bi buama, bi nanga yeni bi nunponli kuli taani ki bodi yeni bi kuuma. Bi ji ki pia ban ba tieniyaali ŋanduna nni ne. ⁷ Ya caa mani, ki ban ya di i jiema yeni li pamanli, ki ya ñu i daama yeni li pamanli, kelima U Tienu n maani o nuu i tuonŋana po. ⁸ Yin la i badu tialakaadi, ki sɔgi mi kpama, ki go wuli tulaali i yula po. ⁹ Yin mangi i pala yeni yin bua ya puoba i yema dana yaa kɔbi ne, U Tienu n puni yi ki tinga po ne li yema daakɔbmu, Yin tuuni ya tuona ki tinga po ne, i yema nni ñuadi n yeni. ¹⁰ Yin ba fidi ki sɔni ya tuonli, bii ki tieni yaali kuli, yin tieni ania, ki sɔni yeni i fidu kuli, kelima, tuonliba kuli, kpaagliba kuli, banmaba kuli bii yanfuomaba kuli ji ki ye bi tinkpiba diema nni, yin ba juodi ki gedi naana. ¹¹ N go a bona ki tinga po ne, ke li ŋani boncianla: Yaaba n bua tonma, bani ka paa mi nɔnma. Yaaba n pia mi tuama ka paadi yognu kuli li kɔnli nni. Bi yanfodanba baba ka di ki guodi u yognu kuli. Bi ninfandaba baba ka tie ŋalmandanba. A banda baba ka ye yeni ti kpiagdi. Ama yaali n ŋani yeni yaali n bia kuli baadi bikuli i. ¹² Kelima, obakuli ki bani o kuuma yognu, nani u taalu ń yi cuo o jamo maama yeni, bii, ku diagu ń yi cuo o nuano maama yeni. Nani ti yandi yeni, bi nisaalba yi la ke fala ludi ki baa bipo i. ¹³ N go la ya yanfobuolu n ŋani mini yapo, ki tinga po ne. ¹⁴ Dogu den ye, kaa yabi boncianla, u nibima mo den ki yabi, ya bado n pia u fidu den cua ki cebni ki lindi li dogu, ki ba paadi, ki diedi u. ¹⁵ Li dogu nni den pia luodo, ke o tie yanfodaano, ki bi ba fidi ki faabi u dogu yeni o yanfuoma. Ama obakuli den ki tiadi o luodo po. ¹⁶ Lanwani ii, n maajuodkaama n ne, "Mi yanfuoma cie mi tuama yeni mi jama, ama, bi fali o luodo yanfuoma wani, bi ki cengi luodo ya yanfomaama. ¹⁷ A ya cengi ya yanfodaano n maadi suosuo, li cie ŋan cengi ya badciamo n maadi yeni bi yanluodanba yeni i tantadi. ¹⁸ Mi yanfuoma cie bu tɔbu jatiadi, ama yanluodanyendo ba fidi ki biidi bonŋanli boncianla.