¹ Nani naasiikpiema waamu ba biidi tulaaliŋamo nuulmanu yeni, mi yanluoma waamu ba fidi ki biani mi yanfuoma yeni ti kpiagdi fanma. ² O yafodaano yantiali ŋmagdi o, ke o caa liiga, ama o yanluodaano yantiali tulini o ke o cuoni sinsinpuoli i. ³ Yanluodaano ya paa sanu nni, o maalma yeni o tuada n wangi ke one tie yanluodaano i. ⁴ A yudaano ya fiini o pali apo, ŋan da ña ŋan ye naani ki tuuni. kelima mi yandingma ba fidi ki pieni (ki lagdi) ti tuonbiaciandi. ⁵ N la ki tinga po ne, yaali n ki tiegi, ki tie tudma, ki ñani yikodanba kani: ⁶ Yanluodaano ba fidi ki baa tuongbengli, ke a tuonsɔnbanda jaadi bi yula yeni ti tuonyuoyuodi. ⁷ I Yonbi ba fidi ki ya jagi i taami, ke bi badbijaba cuoni yeni bi taana nani i yonbi yeni. ⁸ Yua n gbiidi buogu, wani o go ba fidi ki baa lienni, yua n pua ki guli bilinguonli, o waa ba fidi ki juni o. ⁹ Yua n ñagdi a tana ba fidi ki duoli o yuli, yua n yagdi daadi mo, waa fagi yeni jalbu. ¹⁰ Pengu ya gbidi, ke nilo ki luani gu, li buali mi tuama waamu, ama yeni mi yanfuoma, li tuonli ba cuoni bonŋanla. ¹¹ Nilo ya ba fidi ki dingi waa yama, ki nan cedi ke o juni o, li go pia be ya todma i li nilo po. ¹² O yanfodaano maama mangdi bi niba pala, ama o yanluodaano ya ñɔbu n ba biani o fanma. ¹³ Ya maama n cindi ki ña o yanluodaano ñɔbu nni yi tie panpiimaama i, o ya maadi ki caa, o ji ba juodi yeni ya gaadmaama n bia i. ¹⁴ O yanluodaano maadi ki jalgi o maama, ama obakuli nan ki bani yaali ba yuandi ki tieni. ŋma nan ba waani o yaali ba cua o puoli po? ¹⁵ O yanluodaano tuonyuoyuodi cɔgni o boncianla, hali ke o ji ki bani wan ba tɔgni maama, ki kua u dogu nni. ¹⁶ Fala ye yeni ya diema ke bi bado tie bonwaaga, o kɔnbɔnnaabanba yi cindi ku siŋaagu i, ki ya di, ki go ñu! ¹⁷ Mi yedŋanma ye yeni ya diema bado tie bulcinbiga, o kɔnbɔnnaabanba kaa li jiedili lan buali ya yognu i, ke ban di ki pugni u fidu, ki naa tie ban ñu ki gaadi ka. ¹⁸ O kpadjedaano diegu yi kpadi ki baa ki ñagi o i, O nibalmo mo ya dieli n lundi, ki cuudi opo. ¹⁹ Bi niba bobindi u badu jiema ke ban mangi bi pala i, mi daama mo pugdi li pamanli mi yema nni, i ligi mo ñangi i payiani kuli, ki tie maama kuli ya gaapo. ²⁰ ŋan da sugi yikodaano, da bigni ki sugi o a pali nni, ŋan da sugdi ŋalmandaano a dieduadgu nni, kelima nuaga, bii bonyugdliba ba fidi ki gedi yeni a maama, bonyugdli kuli ba fidi ki tuali ŋan yedi yaali.