¹ Maani a jiema u ñingbanu po, kelima, man tieni ya dana kuli, dayenli, a ba guani ki la a jiema. ² Taa a biinu ki bɔgdi yeni niba lele bii niba niin, kelima a ki bani ya yebiadma n ba yuandi ki baa o po mi yema nni. ³ Ti tawalgbandi ya gbie yeni taaga, kikuli ba jiidi ki tinga po i, tibu mo ya baa ki teli maama, bun bili naani, bu bili n yeni, bu nan ka fidi ki ŋmiagi, bii ki lie. ⁴ Ya nilo n diidi u faalu, o kan buli, yua mo n gbelgi ti tawalgbandi mo, o kan yendi kpaangu. ⁵ Nani yin ki bani u faalu sanu yeni, kaa go bandi ki biga ń tagi maama o tugpunbo tugu nni yeni, i go kan bandi U Tienu tagma yeni o tuona niima nni mo. ⁶ Ku siŋaagu nni, ŋan buli a bonbulkaali, ki ya tuuni lan buali maama, ki da fuodi ku yenjuogu, kelima a nan ki bani ya tuonlin pia apo ti ñuadi, ku siŋaagu yaali bii ku yenjuogu yaali i, lanyaaka li tuona kuli ba cuoni bonŋanla i. ⁷ I mɔmɔni, mi yenyenma ŋani, li yendanli diidma mo mani. ⁸ O nilo miali ya fagi, o pali ń ya mani likuli po, ama, wan da sundi ya dana n kpendi, ki tie li biigli, kelima li biigli dana n yabi. Yaali n tiendi ki tinga po ne kuli tie fanma i. ⁹ O jawaalo, ŋan mangi a pali a jawaama po, a pali ń mani yaali ya po kuli, ŋan tieni, ki mangi a jawaama yema. A nunbu ń la yaali ke li ŋani, ki mani apo kuli, ŋan tieni la. Ama ŋan ya bani ke U Tienu ba ti jia ŋa ti buudi ŋan tieni yaali kuli po. ¹⁰ ŋan ñani a pali nni yaali tie pabienli kuli, ki sundi yaali n tie yianu po, kelima bi nipanba yeni bi nipanma paalu kuli ba pendi, likuli tie fanma i.