¹ ŋan ya tiani a Yudaano yua n tagi a po, a panma dana nni, Ki fidi ku tadingu yebiadma dana ń pundi, ki fidi ki pundi ŋan ba yaadi ya bina, ki yedi, "Ya yema dana ne ji ki mani npo" ² ŋan ŋɔdi li yema, ki fidi ki guudi u yienu yenma, ń ba tua bɔnbɔnbiigli ya yognu, o ŋmaalo yeni a ŋmaabila yenma ń ba tua biigli, nani ki taaga ń yi pendi, ti tawalgbandi ń guani maama yeni. ³ Lanyognu, a nii yii guu a nani o dieguudo yeni baa digbi, a taana yaa wangi mi tuama yeni u fidu yeni, ba pɔli, a ñina yaa n naani apo mi jiema yeni ba seni li naali, kelima a ji waagi, a nuni yii todi ke a duandi li takobioli ki nua a bona yeni ba dingi, a ji kan ya nua bonŋanla. ⁴ Lanyognu i, ke i sani nni gana ba luoni, kelima a tuba ñali, ke a ji ki gbia i sani nni fuugu, li naali nni yani yeni li fuugu ba dingi, ama bá nuanga moe ba pieni a guama, ŋan findi, a ji kan ya gbia o bonpola laadi yeni bi yani, lankuli ba fagdi yeni a ⁵ A ba ya jie gbangbanli doma, u sanu nni cenli baa tie apo tuoncianli i, a yudi ba pendi nani ti kunkundi yeni, a gbanu ń kpiagi ñimñimñim, a yama ba ña bonli kuli nni, ŋan miadi yaali n den tie apo pamanli. Kelima yuakuli ba guani o diejuodkaali po, i kumoe danba mo baa gaani ki lini, ki duadi a deni. ⁶ ŋan ya tiani U Tienu yua n tagi a po, ke a ŋanjilfa gaalu dá ki cie ke a wula tiagu dá ki mudi ke a lɔngu dá ki baa li caali nni, ke a cuali dá ki mudi u kpenu po, ⁷ Ki fidi ti tandi ń guani tinga nni, tin bo ñani naani, ke o naano dá ki guani U Tienu yua n den teni a o yeni po. ⁸ O yanfodaano yedi, "Fanma ya fanma likuli tei fanma i" , "Mi yema nni, bonli kuli tie fanma i." ⁹ O yanfodaano go den pia mi banma boncianla, ki wangi bi niba. O den bangi, ki kpaagi, ki jagi, ki cegni mi kpajama boncianla. ¹⁰ O yanfodaano tieni ania, ki dɔgdi ki waani yaali n tie i mɔmɔni, ki go lingi ki baa ya maama n pia mi todma. ¹¹ O yafodaano maama tie nani i tanmimili yeni. Mi tie nani ya kpakpaana n ba cuo mi banma ki seni, man da pendi yeni. Lankuli tie U tienu, o yankpaamno ya paabu i. ¹² N bijua, ŋan fangi a yuli ki da pugni bona boncianla. O nisaalo ń ba diani ya tila ki pia bianu, ama mi cogma boncianla kuandi u gbanu ti cɔgindi. ¹³ N maama kuli maajuodkaama n tie ne, ke yin fangi U Tienu, ki cɔlni o ñɔmaama, kelima ban puogi o nisaalo ya tuonli n yeni. ¹⁴ kelima U Tienu ba jia a tuona yeni a tuada kuli ya buudi, bá yaali n wuo, yaali n ŋani yeni yaali n bia kuli.