¹ ŋma n tie o yanfodaano? ŋma n bani yaali n tiendi mi yema ne kuli niima nni? Mi yanfuoma yendi o nilo nunga, mi mangdi onilo nunga. ² N cegli yi ke yin cɔlni o bado yikodi, kelima yin niani U Tienu ya ñɔnianu po. ³ Yin da jegbi, ki yie o bali, yin go da tiendi yaali n ki mani o pali, kelima, o bado tiendi wan bua yaali i. O bado maama n pia u paalu, kelima, ŋma nan ba buali o, "A tiendi be i?" ⁵ Yua n cɔlni o bado ñɔmaama kuli, o fuodi yeni li mabli. O yanfodaano bani o yama nni U Tienu buudi po, yeni wan ba jia li buudi ya yognu. ⁶ Yaali n tieni kuli pia lan ba jia li buudi ya yognu, kelima o nisaalo tuonbiadi yabi boncianla. ⁷ Niloba kuli ki bani yaali ba yuandi ki cua. ŋma n ba waani o yaali n kpendi ń ba cuoni maama? ⁸ Obakuli ki pia ya sanu n ba kubi o miali, obakuli kan fidi ki suagi o kuuma liiga. Bu tɔbu ya baa, niloba kuli kan fidi ki kogni ki ciadi, mi biadma mo kan faabi yua buadi mi tienma. ⁹ N kpaagi, ki la lankuli; N bigni yaali n tiendi ki tinga ne po kuli. Yogtianu, o nilo n yi kubi o nisaallielo, ki cagni, hali ki ban duoli o. ¹⁰ N den la ke bi nibiadba kpe, ke bi piini ba. Bi yi taa ba u kaangagdiŋamu nni, ki ban piini ba, ban den ye ya dogu nni ki tiendi bi tuonbiadi yeni niba n go baa kpiagdi bi yela. Lankuli ki pia lan pugdi yaali. ¹¹ O nibiado ki pa o tuonbiadi pani li yognu liga ka, lanyapo i ke bi niba buadi mi biadma tienma. ¹² O nibiado ya tieni mi biadma taalma kobga, ke o miali go fagdi, Ama, n bani ke yaaba n fangi U Tienu n pia mi yemanma, kelima bi kpiagdi o yeli. ¹³ Ama yemanma ki tie nibiado ya yema ka. O miali kan fagdi. O yema tie nani junjungu yeni i, kelima o nan ki fangi U Tienu. ¹⁴ A tuada go ye ŋanduna nni, kaa pia mayuli, ki tie fanma. Bi niteginkaaba ye, ki pa bi nibiadba pani, ke bi nibiadba mo ye, ki pa bi niteginkaaba pani. N la ke limo ki pia mayuli, ki tie fanma. ¹⁵ Mini wani, n pali paa li pamanli po i, kelima o nilo ki pia yemanma, ki kandi wan di ki guo, ki ñu ki guo, ki mangi o pali. Li pamanli n ba ciani o nilo U Tienu ń teni o ya yema, o tuonli kuli nni, ki tinga po ne. ¹⁶ N den kpaagi n yama nni, ki ba bandi mi yanfuoma, ki go bandi ya tuona n tuuni ŋanduna nni kuli, ya tuona n tuuni, kaa pia guama ku ñiagu yeni u yensiinu kuli. ¹⁷ N den kpaagi U Tienu tuona, ki sua ke nilo kan fidi ki bandi ya tuona n tuuni ki tinga po ne kuli. Nilo ń tieni maama kuli, o kan bandi ki gbeni U Tienu tuona wani. Bá o yanfodaano ya yedi ke o bani, o kan fidi ki bandi libakuli niima nni.