¹ O nilo yeŋanli cie tulaali ŋamo, Mi kuuma daali mo n cie ti madi daali. ² A ya gedi kudiegu, li ŋani ki cie ŋan gedi u badu diegu nni, kelima, nilo kuli yema juodma pia i kumoe, lanwani ii, bi nifuodiba ń tiadi, ki bili li maalma bi pali nni. ³ Li pabɔnli n tu yeni ti pamanlaadi, kelima ki nunŋmidga ya pendi, li pamanli n ŋua. ⁴ O yanfodaano pali ye ku kuudiegu i, ama o yanluodaano pali ye u badu ń ye ya diegu nni i. ⁵ A ya cengi o yanfodaano tagli, li cie yeni ŋan cengi o yanluodaano pagdi. ⁶ Kelima o yanluodaano laadi tie nani i konkoni ń cɔgni ki pudi ya bobli n ŋaa u mu po yeni, lankuli fanma yeni muuñii. ⁷ Li mabinli ba fidi ki biidi o yanfodaano yama, bu paabu mo ba kuani o jodi nni, ki biidi o pali. ⁸ Bonli juodma n ŋani ki cie li cilma; Yaaba n pia li juunli mo cie yaaba n fiindi bi pala tonma. ⁹ ŋan da jegbi ki fiini a pali, kelima li pabienli ye o yanluodaano ya pali nni i. ¹⁰ ŋan da buali, "Be n cedi ke yognuba den mani ki cie mɔlane?" Li buali ki tie yanfodaano buali ka. ¹¹ Mi yanfuoma n tie ya faali n ŋani ki cie, ke ti ba di ti danba kani. Mi pia mi todma nisaalo kuli po. ¹² Kelima, mi yanfuoma tie guunli, nani i ligi yeni, ama, yua n pia mi yanfuoma banma, mi ba pugni o li miafagli. ¹³ ŋan fangi U Tienu tuona: ŋma nan ba fidi ki naadi wan goli ya bonli? ¹⁴ Mi yema ya mani, ŋan mangi a pali yeni li yemanma, Ama mi yema ya paagi, ŋan fangi a yuli; Kelima U Tienu n cedi ke li yema lie kuli ye, ki buogi, lanyapo, obakuli kan bandi yaali n ba yuandi ki tieni o yema juodma puoli po. ¹⁵ N la a bona boncianla n yema yaama n ki pia niima nni ne. Bi niteginkaaba kpe yeni bi teginma kuli, ama ke bi nibiadba baa li manfagli yeni bi biadma kuli. ¹⁶ ŋan da tiegi, ki pendi li kaanu, ŋan da waani ke a yanfuoma cie yuakuli. Be n cedi ke a bua bolini a yuli? ¹⁷ ŋan da tie ya nilo n bia ki kandi, ŋan go da tie yanluodaano mo Be n cedi ke a bua ŋan kpe, ke a daali dá ki pundi ii? ¹⁸ Li ŋani ŋan ya kubi a yanfuoma bonŋanla, ki go da ŋa mi teginma mo, kelima ya nilo n fangi U Tienu, o ba cɔlni li tɔgliedma kuli, ki kan pendi. ¹⁹ Mi yanfuoma n tie o yafodaano paciamu, ki cie yikodanba piiga docianyendu nni. ²⁰ Niteginka ki ye ki tinga po ne, kaa kpeli ki tieni tuonbiadi. ²¹ ŋan da cengi ban maadi ya maama kuli. kelima a ba gbadi ke o naaciemo soligi a. ²² Fini abá nan bani a pali nni, ke a mo solgidi nitianba. ²³ Min bigni yaali kuli yeni mi yanfuoma. N yedi, "N ba tua yafodaano," Ama, mi yanfuoma den fagi yeni nni. ²⁴ Mi yanfuoma fagi,ki go ñua, ŋma n ba fidi ki nandi ma? ²⁵ N tieni mi maalma, ke n ba bangi ma, ki kpaagi ma, ki lingi mi yanfuoma yeni i mɔmɔni niima nni, N bandi ke biadma tie yanbɔnma i, ke yanluoma mo tie gaadma i. ²⁶ N bandi ke yaali n bia ki cie mi kuuma tie o pua i, diadi yeni taali baba n gbie o pali nni, o nui mo tie nani kuseseli yeni i. U Tienu ń bua yua baba n ba fidi ki sani ki ciadi o, ama ti tuonbiadi daano wani ba baa o nuu nni i. ²⁷ O yanfodaano yedi, "Diidi min kpaagi ki la yaali" "N kpaagi min diidi ki la yaali, yenli yenli, ki bua min badi i mɔmɔni niima nni. ²⁸ Min lingi yaali n yeni, ama n da ki la li. Ama min la yaali, jaba tudli siiga, n la jayendo baba i, ama, ya puoba n ki pia dugli siiga, mii la bá poyendo. ²⁹ Min la yaali n ne: U Tienu tagi bi nisaalba ke bi tiegi, ama, bani n tudi u sani, ki biidi bi yema."