N go maali ya biadma n ye ŋanduna nni ne po. Ban wangi yaaba falaciamo ninsiidi, Ama bi naa pia yua n ba todi ba, ki faabi ba! U paalu kuli ye yaaba n cagni ba yeni nui nni i, niloba kuli ki ye ki ba faabi ba! ² Lanwani ii, yaaba n kpe ya yula n mani, bi pia li pamanli ki cie yaaba n da fo ³ Ama yaaba n ŋanbi ki pia li yumanli n tie ban ki mali yaaba, ke bi la ki tinga po ne biadma yeni, bani ya pali n ŋanbi ki mani. ⁴ N go la ke tuonŋanli kuli, banma tuonli kuli tie nanga i yeni nunponli i a lielo po. Li mo tie fanma i, nani nilo ń ŋua ki deli mi faama yeni. ⁵ O yanluodaano n yi pɔli o nui, ki ya kaa, ki di. O gbannandi n tie o jiedi. ⁶ Ama mi fuoma waamu cie ya tuonpaali n ki pia fuoma, nani yua n deli mi faama yeni. ⁷ N go la ti cancagindi n tie fanma ki tinga ne po. ⁸ A ba la nibuoluba, ke o ye o baba, waa pia lielo, waa pia biga, waa pia kpiilo. O nan tuuni kaa pia fuodma, o lingi mi piama ki dogindi, li naa pia ke li dagdi o. O naa go buali, "N tuuni ŋma ya po i, ki naa tie libakuli ki mangdi n pali. Limo tie fanma i, gbengbendiyema. ⁹ Niba lie tuuni ki cie niyendo; Bi ya taani ki tuuni, bi ba di ya ñuadi n yabi, bi tuonli po. ¹⁰ Kelima, yendo ya baá, o lielo ba fiini o. Ama, yua ye o baba, ki baá, o ye yeni fala i, kelima nilo nan ki ye ki ba fiini o. ¹¹ Niba lie ya taani ki dua, bi baa tongdi bi yaba gbanu, Ama, niyendo ba tieni ledi, ki tongi o gbanu? ¹² Bi ba fidi ki kɔni ki paadi niyendo, ama, bi ya tie niba lie, bani n ba paadi, tɔndi taa baabu kan cie faala po. ¹³ Ya biga n tie luodo, ki nan tie yafodaano, cie ya badciamo n kpelgi, ki go ki gaani cegli. ¹⁴ Kelima, li biga ba fidi ki ña li kpaadidieli nni, ki tua bado,li go ba fidi ban mali o luodo o diema nni. ¹⁵ Ama, n la yaaba n ye ki tinga po ne, ke bi taani ki ŋua ya biga n ga li bali, ki lebdi o badkpelo. ¹⁶ Yaaba n den ŋua o badpaano den ki dɔa dindini, ama yaaba n ba yuandi ki mali kan ya fangi o. Li waani ke lanya yema mo tie fanma i, nani yua n deli mi faama yeni.