¹ Bonli kuli pia li yognu i, yaali n tiendi ŋanduna nni ne kuli pia li yognu i. ² Ti madi yognu ye, mi kuuma yognu mo ye i, Li tiiŋuuli yognu ye, li tiiŋabli yognu mo ye i, ³ Ki kpa yognu ye, ki tebi mo ya yognu ye i, Ki mudi yognu ye, ki maa mo ya yognu ye i. ⁴ Li bubuuli yognu ye, ti laadi mo ya yognu ye i, I kumoe yognu ye, ki ciaga jelma mo ya yognu ye i, ⁵ Li tanluli yognu ye, a tana gandma mo ya yognu ye i, Wobi o nilo yeni mi buama yognu ye, ki yie mi buama wobma mo ya yognu ye i. ⁶ Ki linga bonli yognu ye, ki biani li mo ya yognu ye i Ki kubi bonli yognu ye, ki lu bonli mo ya yognu ye i, ⁷ Ki padi ti tialakaadi yognu ye, ki ŋali ti mo ya yognu ye i, Ki ya ŋmini yognu ye, Ki maadi mo ya yognu ye i. ⁸ Mi buama yognu ye, ki nanga mo ya yognu ye i, bu tɔbu yognu ye, mi yanduanma mo ya yognu ye i. ⁹ O tuonsɔnlo di be ya ñuadi i, o tuona po? ¹⁰ N la U Tienu ń tienu ń puogi o nusaalo ya tuonli ke wan sɔni ki dudi (ki tii). ¹¹ U tienu tagi bonli kuli ki dagdi yeni li yogu i. O go bili bi niba pali nni ya yognu n ki pia gbenma. Ama bi nisaalba ki gbia U Tienu tuona niima nni, hali mi cilma ki ban tuoni mi juodma. ¹² N bani ke bonli ki ye o nisaali po, ki cie li pamanli yeni mi yeŋanma, o yema nni. ¹³ Yeni ki di ki guo, ki ñu ki guo, yeni ki di o tuona ñuadi. lanwani ii tie U Tienu paabu i. ¹⁴ N bani ke U Tienu ń tieni yaali kuli ye ya yognu kuli i. Bonli kan pugni, bonli mo kan wadi, kelima U Tienu n tieni yeni, ke bi niba ń fangi o, ki kpiagi o yeli. ¹⁵ Yaali n ye kuli den tuodi ki ye hali yognu bá i. Yaali n ba ti tieni den kpia ki tieni o. U Tienu n cedi ke yaali n pendi lebi ki gɔa. ¹⁶ N la ya biadma n ye ki tinga po ne, naankani ke i mɔmɔni buujiali yeni mi teginma bo baa ye yeni, mi biadma ye lankani i. ¹⁷ N maadi n pali nni, " U Tienu ba diidi a tuada yeni a tuona kuli i , ki jia bi niteginkaaba yeni bi nibiadba buudi, li yognu ya pundi." ¹⁸ N den maadi n pali nni, "U Tienu bigni bi ni saalba, ki waani ba, ke bi tie nani ti yandi yeni i." ¹⁹ Kelima o nisaalo bila juodma yeni ti yandi juodma tie yenma i. Yendo kuuma tie nani o lielo mo ya kuuma yeni i. Bi fuoma tie bikuli po yenma i. O nisaalo ki cie ki yanga. Kelima, bi fuoma ki tie yenma ka aa? ²⁰ Bonlikuli caa kaanyendu i. Bonli kuli ñani ti tandi kani i, bonli kuli go lebi ki caa ti tandi nni i. ²¹ ŋma bani o nisaalo naano n ya ba do poli po oo, ki yanga ya naano n ya ba jiidi ki tinga nni, tiipo oo? ²² Lanwani ii, n go diidi ki sua ke bontɔli ki ye nilo po, ki cie ke wan mangi o pali, ki di o tuoa ñuadi, o biinu n yeni. kelima ŋma ba guani yeni o, wan la o yema puoli po ń baa tie maama?