¹ N den maadi n pali nni, "U yogu pundi, n ba bigni li pamanli. N ba mangi n yema." Ama, lani mo tie fanma i. ² N den yedi, "ti laadi tie jadma i," li pamanli mo,"li ba pugni be i?" ³ N den bobni n yama nni, ke min mangi n yema yeni li daañuli. N den cedi ke mi yanfuoma n ŋmagdi n maalma, ki nan togdi bi yanluodanba yeema. N den bua min diidi yaali n mangdi bi niba pala, ki tinga po ne, ban tuuni ya tuona kuli bi yema nni. ⁴ N den sɔni ya tuonciama ne: N de maa ti dieciandi, n yuli po, ki ŋuuni ku daamɔngu tiidi. ⁵ N den tieni n yuli po gɔgdigu, yeni u tiikuanu, ki ŋuu li niinni ya tiibuoli n luoni kuli. ⁶ N den gbiidi a ñinbuna, ki baa mi ñima, ki jɔgni n fuali nni tiibigu. ⁷ N den baa a jatuada yeni a potuada, ki pugni yaaba n den kpia ki ye po; N go den pia i yankuli, a yagbenga yeni ti yanbidi kuli, ki cie ya badtieba n den kpia ki diedi Jerusalema kuli. ⁸ N go den lingi, ki taani ŋanjilfa yeni wula kuli, min die ya badtieba yeni ya diema kuli ya ŋalmani. N den pia n yuli po yanyinla, bi puoba yeni bi jaba kuli, ke bi mangdi n pali. N den baa nisaalo ń lingi ya piama kuli, yeni bi puoba boncianla. ⁹ Lanwani ii, n ji den tie niciamo yeni ŋalmandaano i, ki cie ya badtieba n den kpia ki kali Jerusalema kuli, ki go ye yeni n yanfuoma. ¹⁰ N nunbu ń faadi yaali kuli, min den ki bulgi n nunga. N den ki piigi n tuba yaali n tie pamanli kuli po, Kelima n pali den mani n tuona kuli po, Mi yemanma n den tie n tuonli ñuadi. ¹¹ Lanwani ii, n den diidi n nui ń tieni yaali kuli, yeni min sɔni ya tuona kuli, Ama likuli den tie fanma i, nani nilo ń ŋua ki deli mi faama yeni. Li den ki pia ñuadiba kuli ki tinga po ne. ¹² Lanwani ii, n den guani ke min diidi mi yanfuoma, mi yaapiima yeni mi yanluoma po. Kelima, n den bua diidi ya badtieba n ŋua puoli, ya ba fidi ki tieni yaali n cie ya badtieba n den pendi ń den tieni yaali. ¹³ N ji den bandi ke mi yanfuoma ŋani ki cie mi yanpiima, Nani mi yenyenma ń cie li biigli maama yeni. ¹⁴ O yanfodaano luodi o nuni, ki nua, ki bani wan caa naani, Ama o yanpiidaano wani tulbi li bɔnbɔnbiigli nni i, yeni lankuli, n bani ke bikuli nan ba juodi yenma i. ¹⁵ Lanwani ii, n den maadi n pali nni, "Yaali n tieni o yanpiidaano, nan ba tieni mini, o yanfodaano mo. Mini yeni o yanpiidaano ń ba juodi yenma yeni, min pia ya yanfocianma ne kuli ba puni nni be i?" N den yedi n pali nni, "Lani mɔno ki pia mayuli." ¹⁶ Kelima, bi kan fidi ki ya tiani o yanfodaano yeni o yanpiidaano kuli po lan waagi. Li ya tieni dana waamu, bi ba sundi bikuli po, o yanfodaano ba kpe nani o yanpiidaano ń kpe maama yeni i. ¹⁷ Lanwani ii, n yama den ñani mi yema nni, kelima yaali n tieni ki tinga po ne kuli tie tuongundigu i, mini ya po.Kelima likuli tie fanma nani yua kpaa mi faama yeni i. ¹⁸ N den nani min sɔni ya tuona kuli ki tinga ne po, kelima min baa yaali kuli ne n ba yaadi ki ŋa yua n ba ŋɔdi n puoli po i, ń di li ñuadi. ¹⁹ ŋma nan bani o ya baa tie yanfodaano bii yanpiidaano i? Yeni lani kuli, o nan baa tie min sɔni n tuona yeni n yanfuoma ki baa yaali kuli bondaano i. Lankuli tie fanma i. ²⁰ Lanwani ii, n pali den wadi yeni min sɔni ya tuona kuli, ki baa yaali kuli, ki tinga ne po. ²¹ O nisaalo ba sɔni yeni mi yanfuoma, yeni mi banma, yeni mi tuosɔnbanma, ama, o nan ba yaadi ki ŋa wan baa yaali kuli ya nilo n ki tieni libakuli ń diedi lankuli. Li mo tie fanma i, li ki tiegi bá waamu. ²² O nilo ń laadi fala, ki tuuni boncianla, ki tiendi yaali ne kuli ki tinga po ne, ba pugni o ti laa ñuadi i ? ²³ Daali kuli, li tie opo fala yeni yanyagdi i, o tuona po, ku ñiagu mo, o yantiali kan baa fuoma. Lanmo tie fanma i. ²⁴ Yemanma ki ye ki cie o nilo ń di ki guo, ki ñu ki guo, ki mangi o pali, lani n tie o tuonli ñuadi. N diidi ki sua ke U Tienu n tieni li yemanma. ²⁵ Kelima, ŋma ba fidi ki di ki guo, ki mangi o yema, ke laa tie ke U Tieni ka puni o u sanu? ²⁶ Kelima U Tienu puuni wan bua yua i, mi yanfuoma, mi banma yeni li pamanli. Ama o puuni ti tuonbiadi daano wani li tuonli yeni wan ba taani ya ŋalmani, U Tienu pali ń mani yua ya po ń diedi i. Lani mo tie fanma i, nani yua n kpaa mi kpaama yeni.