¹ O badciamo Dafidi bijua, Jerusalema bado, o yanfodaano ń maadi ya maama n ne: ² O yanfodaano yedi mine. "Bonli kuli tie muñiigu, li pendi nani mi faama yeni, bonli kuli pendi nani ku muñiigu yeni i. ³ O nilo ń tuuni ya tuona kuli ki tinga po, u yienu nni ne, o ba ŋmani be i? ⁴ Nifiima ń pendi, nifiitɔma ń cua, ki tinga wani li bii ki ye ya yognu kuli. ⁵ U yienu yi pudi, ki ti baa, ki guani tontoni, ki pudi un bi pudi naani. ⁶ Mi faama figi, ki caa niganu po, ki jilni ki lebi, ki caa nijienu po, mi yi figi, ki lebdi, ki guani wun bi ñani naanpo. ⁷ I kpeni kuli puubi ki jii mi ñincianma nni i, ama mi ñincianma naa gbiegi hali bada, to, i kpeni kuli nan li jii lanpo i. ⁸ Bonli kuli tie cɔgindi i. niloba kuli kan bandi li niima nni. bu nunbu kan gbeni diidma, tubli mo kan gbeni gbadma. ⁹ Yaali n den tieni, lani n go ba tieni, ke yaali n den tiendi hali yognu, lani n go baa li tiendi. Liba kuli ki tie boncanli ki tinga po. ¹⁰ Bonli ye, ki tieni, ke ti yedi, 'Diidi, ne wani ii, da tie boncanli i.' Yaali n tiendi ne kuli, den kpeli ki tieni yognuba, hali ke tinba dá ki ye. ¹¹ Ti ki tiani yaali n den tieni ti jaajanba yogu, yeni yaali n tieni ki pendi, kaa waagi; Yaaba n ba yuandi ki cua mo, bi puolŋuani kan tiadi bipo. ¹² Mini n tie o yanfodaano, n den tua bado, Israyeli diema nni, Jerusalema dociamu nni. ¹³ N den tieni mi lingma n yama nni, ke min kpaagi, ki bandi yeni mi yanfuoma, yaali n tiendi ki tinga po. Li lingma tie U Tienu ń bili bi nisaalba ya tuonli, ke lan ya cɔgni ba, ki piendi bi yaanma. ¹⁴ N diidi yaali n tieni ki tinga pone, ki sua ke likuli tie yaalidgu bonli i, li tie nani nilo ǹ ŋua ki kpaa mi faama yeni i. ¹⁵ Yaali n goli kan fidi ki godi! Yaali n pɔdi kan fidi ki cɔdi! ¹⁶ N den maadi n pali nni, ki yedi, "Diidi, n baa mi yanfuoma ki cie yaaba n den tie badtieba Jerusalema ne. Mi yanfuoma yeni mi banma kua n yuli nni." ¹⁷ N den kpaagi ke min bandi mi yanfuoma yeni mi yanluoma siiga, ki go bandi ya paadma n ye mi banma yeni mi bɔnma siiga. N ti bandi ke lani mo tie nani nilo ń ŋua ki deli mi faama yeni i. ¹⁸ Kelima, mi yanfuoma boncianli yegi yeni yanyagdi i, bancianma mo yegi yeni falaciamo i.