¹ Jirbi yan ga ka kaŋ i ga Rabbi Irkoy windo tondi kuko cina tondi kuukey boŋ beene, a ga ciya tondi kaarey se hala beene, jama mo ga ka a do nda gaabi. ² Dumi boobo yan ga koy noodin i boro jama, i ga ne mo: wa kaa, ir ma koy Rabbi Irkoy tondi kuko boŋ mo, Yakubu Irkoyo windo do, a ma du ga ir cawandi nga fonda, ir mo ma dira a fondeyzey ra. Zama Sihona ra no asariya ga fatta, Rabbi Irkoy sanno mo Urusalim ra. ³ A ga ciya ciitika kunda boobo se, a gaa fay laabu gaabikoney nda wo kan yan ga mooru game ra. I ga farmi jinayaŋ te nda i wone takubay, i ga koomayaŋ te mo nda mo i wone yajey; Dumi fo kulu si ye ga takuba foobu afo gaa koyne, i si ye ga wongu dondon koyne. ⁴ I ga bafunay afo kulu nga reyzin ŋyaŋo cire nda nga jeejay ŋyaŋo cire, boro kulu sino mo kan ga i lakkal kana za ga kay; Zama Rabbi Irkoy kundey koyo meyo no na'a ci. ⁵ Baa day kundey kulu jama ga nga torey gana, ir wo, ir ga Rabbi ir Irkoyo gana, hala abada nda zamani ga ka zamani. ⁶ Rabbi Irkoy ne: hano din hane, ay ga simbarkey margu, ay ga borey kan i gaarey margu, nda mo borey kan ay taabandi. ⁷ Simbarkey ra, ay ga cindi boryaŋ, borey kan i gaarey mo ay ga'i ciya Dumi gaabikoni; Rabbi Irkoy mo ga may i boŋ, Sihona tondi kuko do, za sohon hala abada. ⁸ Ni mo kuro wane cinari kuuko, kan ga ti Sihona ize wayo tudo, ni do no ga kaa, waato zamaney mayra, kan ga ti Urusalima ize wayo mayra. ⁹ Ifo se sohon ni gon ga kuwa ? Ni si nda bonkooni no koyne, yaamarko, kaŋ se ni go sanda weyboro kan go hay-zaŋey ra ? ¹⁰ Sihona ize wayo, taabi ga durey mo sanda weyboro kan go ga hay-zaŋey ! Zama sohõ ni ga fatta kwaara ra ga bafunay mo farey ra, ni ga koy mo hala Babila; Noddin ni ga koma, noddin no Rabbi Irkoy ga ni candi ga kaa ni ibaray kambe ra. ¹¹ Sohõ dumi boobo margu ni gaa : i go ga ne : i ma hawandi, ir moyey mo ma di ir muraado feeriyaŋ Sihona boŋ ! ¹² Amma i si Rabbi Irkoy miiley bay, i si faham nda a wone miiley mo, i si bay kan a ni margu sanda karayaŋ gangani bokoyaŋ. ¹³ Sihona ize wayo, tun ga koy ga kara ! Ay ga te ni se guuru bi hilli nda guuru say ce camsey, ni ga dumi boobo mo alandaba; ni ga i jiney darzantey ka wani Rabbi Irkoy se, i arzakay ndunŋa kulu koyo se.