¹ A ga ciya mo, ni ga furo laabo kan Rabbi ni Irikoyo ga ni no tubu hari din ra, hala ni ga du a mayray mo, ni go ga goro a ra mo. ² Waati din gaa, kala ni ma kande ni fari nafa bon-jina, wo kan ni ga kande Ka fun faro kan Rabbi ni Irikoyo ga ni no din ra.Ni g'a dan cilla ra ka kond'a hala nango kan Rabbi ni Irikoyo ga suuban zama nga maa ma goro noodin. ³ Ni ma kaa alfaga kan go no jirbey din ra do. Ni ma ne a se 'Hunkuna ay ga seeda no Rabbi ni Irikoyo jine Ka ne: ay to laabo kan Rabbi ze d'a iri kaayey se din ra, kan a ne nga g'iri no.' ⁴ Alfaga mo ma cilla ta ni kambe ra k'a jisi Rabbi ni Irikoyo sargay* feema jine ⁵ Ni mo, ni ma seeda Rabbi ni Irikoyo jine ka ne: « Ay kaayo ya suriyance no, gana-gana ize. A zulli ka koy Misira ka yawtaray goray te noodin, boro ciraariyan no. Noodin mo no a ciya jama bambata gaabikooni, kan yulwa mo. ⁶ Misirancey mo n'irir taabandi, k'iri dan tamtaray laabo ra. ⁷ Iri mo he iri kaayey Irikoyo gaa. Rabbi maa iri jindey mo, a di iri taabo d'iri goy doora d'iri kankamo. ⁸ Rabbi n'iri kaa taray mo iri ma fun Misira nda kambe gaabikooni, da kambe sallante, da te-goy bambata yan kan ga humburandi, da alaamaya, da dambara hariyan mo. ⁹ A kande iri k'iri dan nango, k'iri no laabo wo, laabu kan ga wa da yu bambari. ¹⁰ Soho binde, ya Rabbi, ay neeya. Laabo Kan ni n'ay no din ra, Ay kande a fari nafa bon-jina.» Gaa no ni ga cilla jisi Rabbi ni Irikoyo jisi Rabbi ni Irikoyo jine ka sududu Rabbi ni Irikoyo jine. ¹¹ Ni ga fahã mo albarka kulu kan Rabbi ni Irikoyo na ni no din se,nin da ni windo , da Lawito da yaw mo kan go aran do. ¹² Waato kan jiiri hinzanta, kan ga ti zakka kaayan jiiro to, da ni na ni fari albarka kulu zakka kaa, kala ni m'a no lawiti , da yaw kan zumbu, da alatuumi, da wayboro kan bu mo se,hal i ma nwa ni kwaara ra ka kungu. ¹³ Ni mo, ni ma salan Rabbi jinda Ka ne :«Ay na ni hari hanney kulu kaa taray k'i no Lawiti, da yaw kan zumbu,da alatuumi, da wayboro kan kurnye bu mo se,ay mana diny'ey mo. ¹⁴ Ay mana nwa a gaa ay seew jirbey ra. Ay mana lamb'a gaa waati kan ay ziibi, ay mana kaa a gaa mo kaa sarga buuko fo se. Amma ay na hanga jeeri Raabi ay Irikoyo sanno se. Mate kulu kan ni n'ay l'ordi nd'a, yaadin cine mo no ay te. ¹⁵ sohõ, ni go noodin beene, ni nangoray hananta ra, ni m'ay guna ganda.Ma ni jama Israyla kulu albarkandi, iri nda laabo kan ni n'iri no, mate kan ni ize d'a iri kaayey se, laabu no kan ga wa da yu bambari.» ¹⁶ Hunkuna Raabi ni Irikoyo go ga ni lordi ka ne ni ma hin sanney da farilley wo te. Ni m'i haggoy, k'i te da ni bina kulu, da ni fundo kulu mo. ¹⁷ Hunkuna ni seeda taray kwaaray ka ne kan Rabbi ga ciya ni Irikoyo, kan ni g'a fondey gana,k'a hin sanney, d'a lordey, d'a farilley gana hala ni ma hanga jeeri a sanno se. ¹⁸ Raabi mo seeda ni se Hunkuna ka ne ni ga ciya nga jama, nga bumbo arzaka, danga mate kan cine a na alkawli sambu ni se d'a. A ne mo ni m'a lordey kulu gana. ¹⁹ Nga mo ga ni beerandi dumi cindey kulu kan a te bon. A ga ni ciya saabuyan hari, ka no maa hanno da beeray. Ni ga ciya jama hanante Rabbi ni Irikoyo se, mate kan a ci din bon.