¹ Da Alboro fo na wande hiiji,amma woodin banda a si kaan a se, zama a di taali fo a gaa, kal a ma fayyan tira hantum Ka dan waybora kambe ra.A m'a sallama nga windo ra. ² A ga ciya mo, d'a fun boro sintina windo ra, a ga hin ka te a ma koy Ka te boro fo se wande. ³ Amma da woodin mo wang'a, ka fayyan tira hantum a se ka dan a kambe ra k'a sallama nga windo ra, wala da kokor banda kurnye Kan n'a hiiji din bu. ⁴ a kurnye sintina kan n'a fay, i si yadda a ma ye ka du waybora din ma te a se wande koyne, zama a ban ka ziibi . Zama woodin ya fanta hari no Rabbi jine. Ni ma si zunubi dan mo laabo Kan Rabbi ni Irikoyo ga ni no tubu hari din ra. ⁵ Alboro kan gonda hiijay taji ma si koy wongu, i ma si muraafu kulu dak'a bon mo. A ma goro fu a windo sabbay se jiiri fo kubante, ka nga wando kan a hiiji din bine kaanandi. ⁶ Boro kulu ma si boro fo fufuyan jinay, wala mo a fufuyan tond'ize ta tolme, zama danga fundi no a go ga ta tolme ya. ⁷ D'i na boro fo gar a go ga boro zay nga nya-ize Israyla izey ra k'a te bannya, wala a m'a neera mo, kal i ma zayo din ciiti nda buuyan. Woodin teeyan gaa no aran ga laala kaa d'a aran game ra. ⁸ Ma haggoy nda kaajiri doori, ka laakal dan da anniya ni ma goy da hay kulu Kan alfagey da lawitey ga ni dondonandi. Mate kulu kan ay n'i lordi nd'a, yaadin mo no aran ma haggoy Ka te. ⁹ Ma fongu mate kan Rabbi te Maryama se fonda ra, waato kan aran go ga kaa ka fun Misira. ¹⁰ Da ni na hay fo garaw dan ni gorokasin gaa, hay kulu kan dumi no, ni ma si koy ka furo ra ka tolme ta. ¹¹ Ni ma kay taray hala bora kan gaa ni na garawo dan ma fatta da tolma ka kand'a ni do. ¹² Da bora din ya talka no mo, tolma ma si kani ni do. ¹³ Daahir ni g'a yeti a se hala wayna ga kan, zama a ma du ka kani nga taafa ra ka albarka gaara ni se. Woodin mo ga ciya ni se adilitaray Rabbi ni Irikoyo diyan ga. ¹⁴ sufuray ize kan alfukaaru no, kan go laami ra mo, ni ma s'a kankam, da ni nya-izey ra boro no, wala yaw kan zumbu ni laabo ra ka goro ni kwaara ra no. ¹⁵ Han kulu ni g'a banando no a se. Wayna ma si kan k'a gar ni do, zama nga wo talka no,a na nga bina sinji a gaa mo. A ma si te ka ciya bora din ma he Rabbi gaa ni bon. Woodin mo, i g'a lasaabu ni se zunubi. ¹⁶ I ma si baabey wi izey sabbay se, i ma si izey mo wi baabey sabbay se, amma i ma boro kulu wi nga bumbo zunubo sabbay se. ¹⁷ Ni ma si ciiti siirandi yaw kan zumbu, wala alatuumi se.Ni ma si wayboro kan kurnye bu mo bankaray ta tolme. ¹⁸ Amma ni ma fongu mate kan ni te bannya Misira ra, amma Rabbi ni Irikoyo na ni fansa ka ni kaa noodin. woodin sabbay se no ay na ni lordi nda haya din. ¹⁹ Da ni na ni fari albarka si mo, da ni dinya boko fo faro ra, kulu ni ma si ye Ka koy koyne k'a ceeci. A ga ciya yaw kan zumbu, da alatuumi, da wayboro kan kurnye bu wane, zama Rabbi ni Irikoyo ma ni albarkandi ni kambe goy kulu ra. ²⁰ Da ni na ni zeytun *nya som, ni ma si ye kambey do ka filla.Wo kan cindi ga ciya yaw kan zumbu, da alatuumi, da wayboro kan kurnye bu wane. ²¹ Da ni na ni reyzin * kalo izey kosu, ni ma si ye a do ka koobu ceeci. A ga ciya yaw kan zumbu, da alatuumi, da wayboro kan kurnye bu wane. ²² Ni ma fongu mo mate kan ni te bannya Misira laabo ra. Woodin sabbay se no ay na ni lordi nda haya din.