¹ Da ni di ni nya-ize yeeji wal'a feeji kan te bondaray ,ni ma si ni bon bare i se.sikka si ni ga ye ka kand'ey ni nya-izo do koy ne. ² Da ni nya-izo ga mooru nin mo, wala da ni man'a bay, kala ni ma kande almano fu ni windo ra.A ma goro noodin ni banda kala waati kan ni nya-izo g'a ceeci, ni mo g'a yeti a se. ³ Yaadin no ni ga te d'a farka, Yaadin no ni ga te d'a kwaayo, yaadin mo no ni ga te da ni nya-izo hari darante kulu kan daray a se, ni mo ni di a. Fondo si no ni m'a tugu. ⁴ Da ni di ni nya-izo farka wala a yeejo fun ka kan fondo bon ,ni ma si ni bon bare i se.Ni ma si jan k'a gaakasinay a m'i tunandi. ⁵ wayboro ma si alboro fo jinay dan, alboro mo ma si wayboro fo bankaray dan.Zama boro kulu kan ga woodin yan te ya fanta hari no Rabbi ni Irikoyo diyan gaa. ⁶ Da ni go fondo ra, ni Kaa Ka gar curo fiti go ni jine, d'a tuuri fo ra wala a go ganda laabo ra,a gonda curayze yan wala mo gunguri yan a ra,curo nyano mo go ga gum izey wala gungurey bon,ni ma si nyano da izey kulu sambu. ⁷ Daahir ni ga fay da nyano.Amma a izey wo kay, i yadda ni m'i sambu ni bon se. Yaadin no ni ga te ka goro baani,ni ma te aloomar kuuku mo. ⁸ Da ni na fu taji cina, kala ni ma ni fuwo kunga,zama boro fo ma si fun noodin ka kan,a ma kande kuri alhakku ni fuwo gaa. ⁹ Ni ma si ni reyzin kalo duma nda dumar'ize dumi hinka, zama ni kalo albarka kulu ma si ciya fanta hari,danga wo kan ni duma da reyzin tilamyan nafa kulu mo. ¹⁰ Ni ma si fari goy te da yeeji nda farka calu follon gaa. ¹¹ Ni ma si bankaray dan kan i te da silli dumi-dumi,danga feeji hamni nda lin *silli margante nooya. ¹² Ni ma jarse jinde dan ni taafa kan ni ga daabu nd'a bon taaca gaa. ¹³ Da alboro na wande hiiji, a margu nd'a,a ye ka konn'a koyne, ¹⁴ a na haawi hari ci a gaa k'a wow, k'a maa sara, danga a ma ne« Ay na wayboro wo hiiji, amma waati kan ay koy a do, ay kaa ka gar wiiza ,a sinda wandiyotaray seeda.» ¹⁵ kala wayboro baabo d'a nyano m'a wandiyotaray seeda kaa taray ka kond'ey kwaara arkusey do faada meyo gaa. ¹⁶ Baabo ma ne arkusey se:«Ay n'ay izo wo hiijandi alboro wo se, amma a konn'a, ¹⁷ Ka haawa a gaa Ka ne nga mana Ay izo gar wandiyo . Amma ay izo wandiyotaray seeda neeya.»Kal i ma zaara daaru kwaara arkusey jine. ¹⁸ kwaara din arkusey mo ga albora din di k'a gooji. ¹⁹ I g'a jukke mo da nzarfu sekel* zangu fo k'i no wandiya din baabo se, zama a na Israyla wandiyo maa sara.Waybora mo ga goro a wande. I si yadda albora m'a fay kal a fundo me. ²⁰ Amma da haya kan a ci din cimi no, kan i mana di wandiyotaray seeda waybora do, ²¹ kal i ma kand'a baabo windo meyo gaa.A kwaara alboray kulu m'a catu-catu nda tondiyan k'a wi,zama a na haawi goy laalo te Israyla ra.zama a te waykuuru nga baabo windo ra. Woodin teeyan gaa no aran ga laala kaa d'a aran game ra. ²² D'i na alboro fo di, a go ga kani nda wayboro fo kan gonda kurnye,kal i boro hinka kulu ma bu, albora Kan kani nd'a ,da waybora din bumbo. yaadin teeyan gaa no ni ga laala kaa d'a Israyla ra. ²³ Da wandiyo fo go no kan boro fo goono g'a arwasay, alboro fo mo m'a gar kwaara,a kani nd'a mo, ²⁴ kal aran m'i boro hinka kulu candi Ka koy kwaara din meyo gaa.Aran m'i catu-catu nda tondiyan k'i wi _wandiya din zama a go kwaara ra amma a mana kuuwa , albora mo zama a na boro fo wande kaynandi woodin teeyan gaa no aran ga laala kaa d'a aran game ra. ²⁵ Amma da albora na wandiya kan gonda arwasu gar saaji ra, a n'a tilasandi ka kom,kala albora kan n'a kom , nga hinne ma bu. ²⁶ Amma ni ma si hay kulu te wandiya se,zama a mana taali te kan to buuyan.A ga saba nda waati Kan boro fo ga tun nga gorokasin gaa k'a wi , yaadin cine no sanni woodin mo bara. ²⁷ Zama albora din n'a gar saajo ra no, wandiya mo kuuwa,amma boro kulu si no kan g'a faaba. ²⁸ Da alboro fo du wandiyo fo Kan Mana te arwasu, a n'a di ka kani nd'a, hala mo i j'ai gar. ²⁹ kulu albora kan kani nd'a din ma wandiya baabo no nzarfu sekel waygu hiijai nooru.waybora ga ciya a wande mo, zama a n'a kaynandi.I si yadda a m'a fay mo kal a fundo me. ³⁰ Alboro kulu kan ma si nga baabo wande hiiji, a ma si kani nd'a mo zama a baabo wane no.