¹ D'i na boro buuko fo gar laabo Kan Rabbi ni Irikoyo ga ni no mayray din ra, a go saajo ra ga furu, i mana bay mo boro Kan n'a kar, ² kala ni arkusu beerey da ni ciitikoy ma fatta kaa ka.I ma neesi za buukwa do Ka koy kwaarey Kan yan g'a windi gaa. ³ A ga ciya mo, kwaara Kan maan buukwa gaa bisa cindey kulu, kwaara din arkusey ga kande haw kuru ra zan fo.A ma ciya wo Kan i mana goy d'a ce fo,wo Kan mana calu candi no. ⁴ kwaara din arkusey mo ga konda zano Ka koy gooru fo do,nan Kan gonda hari zuru, nangu Kan i mana far, man'a duma mo.I ma zano jinda ceeri mo noodin gooro ra. ⁵ Alfagey mo, lawi izey ga kaa ka maan,(zama ngey no Rabbi ni Irikoyo suuban zama i ma goy a se,i ma albarka gaara Rabbi maa ra.I sanno bon mo no kakaw kulu ga ban, ciiti kulu ga dumbu mo.) ⁶ kwaara din kan ga maan buukwa, arkusey kulu ma ngey kambey nyun zano kan i n'a jinda ceeri gooro ra din bon. ⁷ I ma tu mo Ka ne:« Manti iri kambey no Ka kuri woone mun, iri moy mo mana di a. ⁸ Ya Rabbi, ma ni borey Israyla yaafa, ngey Kan ni fansa. Ma si ta mo boro adili alhakku ma goro ni jama Israyla game ra.» I ga kuri alhakku mo ma yaafa i se. ⁹ Yaadin no ni ga te Ka kuri adilante tuusu ni game ra d'a, da ni te han kan ga saba Rabbi diyan ga. ¹⁰ Alwaati ga Kaa Kan ni ga fatta ka konda wongu ni ibarey gaa. Rabbi ni Irikoyo mo g'i dan ni kambe ra hala ni ga kond'ey tamtaray ra . ¹¹ Da ni ga di wayboro hanno fo tamey ra, ni ga ba r'a mo, ni ga ba a ma ciya ni wande, ¹² kala ni ma kond'a fu ni windo ra. noodin a ma nga bono cabu ka nga ce da kambey camsey dumbu. ¹³ A ma nga tamtaray bankaarayey Kaa goro ni windo ra.Hala handu fo ma Kubay a ma nga baabo nda nga nyano hē.waato din ga no ni ga furo a do ka ciya a kurnye, nga mo ma ciya ni wande. ¹⁴ a ga ciya mo, da waybora din fun ni bine,kala ni m'a tan a ma koy nan kan a ga ba.Amma ni ma s'a neera Ka ta nooru, abada, ni ma s'a himandi konno mo, zama ni na kaynandi. ¹⁵ Da alboro gonda wande hinka, afa way-kwaasu no, afa mo zoogay no, i na izeyan hay a se mo, way-kwaasa da zoogayo kulu ,da zoogayo ize alboro no ga ti hay-jina , ¹⁶ kal a ma ciya ,waati kan albora ga nga mayray haro fay tubu nga ize arey se, fondo kulu si no a ma way- kwaasa din ize aro te hay-jine zoogayo ize aro nango ra.zama nga no ga ti hay-jina nda cimi. ¹⁷ A ma nga hay-jine seeda kaynandi zoogayo ize aro do, k'a no baa hinka a arzaka kulu ra, zama a gaabo sintina no. Hay-jina wazibo a wane no. ¹⁸ Da boro gonda ize aru Kan hanga ga sandi, murtante mo no, kan ga wangu nga baaba wala nga nyano sanni ganayan, kulu nda yaadin a si hangan i se, ¹⁹ kal baabo da nyano m'a di. I ma kond'a i kwaara arkusey do, ka koy hala faada meyo do. ²⁰ I ma ne kwaara arkusey se:« Iri izo hanga ga sandi , murtante mo no. A si maa iri se. Laakal zaaro no gumo-gumo, a ga baji han Ka bugu mo.» ²¹ kal a kwaara alborey kulu m'a catu-catu nda tondiyan hal a ma bu.Woodin teeyan gaa no aran ga laala kaa d'a aran game ra.Israyla kulu mo ga maa baaro ka humburu. ²² Da boro fo na zunubi te Kan to buuyan , da ciiti n'a wi mo, hal i n'a sarku tuuri-nya gaa, ²³ buukwa, ma si kani tuuro gaa.Daahir ni m'a fiji han din hane Kan a bu.Zama boro kan i sarku bundu gaa ya laalante no Irikoy do.Ni ma si ni laabo kan ni Irikoyo na ni no tubu hari din ziibandi.