¹ Ŋgaɖee galee kpatakɩɩ gɩ na lə ma, ga ni jɩ gəŋ waa: Nnyəmə, gɩ wəɖa asaraalaaja abʋmbɔnɔ, asə Gaja kaŋyarɩboi kagʋnyɛsono laŋ alaŋ laŋ ma. ² Alee ka Gaja ka saraa kaalaaɖu kaminiisi nɖee Gaja gatɩ kɩ lee bɛrɛ batɩ ka nɩ na ma. ³ Baa asaraalaja abʋmbɔnɔ apaŋa na, batɩ waa, anaa laa saraa, ʋni gboo ɩlee ɖoole ashee nɩ mɩyaʋ alaa saraa ashee agʋlɔ. ⁴ M'yɩ waa: Kristo anaa ɖa gatəna laŋ kaa lee asaraa laaja na, aɖʋwaa: Mbaɖee bana laasara ɖaa gʋpɔ gʋləma, baɖa. ⁵ Bani baɖe ba na lee bɔɔta alaŋaja kagʋfələfələ ɖaa bafaŋa Musa ŋkələ ana yɛɛ a lee alkawɩlɩ nasəriya kaɖakaa ma, na ba faŋa nɩ nɖee aɖa alaŋ Gaja sul ma, waa: Alee kagʋsra nɔɔ. ⁶ Nnyəmə, Kristo acam ntəma mbʋmbɔnɔ nɖee nẅu baamʋnʋ ma, na apra apɛmpɛŋɛ ka bɛrɛ na Gaja bagɩcuca kalɩka wɩlɩ aŋərə nɖee awu kpata ma, ʋni na batɩ anaa lee bʋkɔɩ lə waa batɩ lee ma, anaa tɔjɩ. ⁷ M'ɩjɩ waa: Alɩkawɩlɩ asəbaka ɖe, aɖa ɖeiɖei, maa kə bakɔɔ afʋba afɔlɩ na. ⁸ Aɖʋwaa: ŋkələ Gaja ga ŋə Israɛl aŋfara afar agʋlɔ ma, na Gaja ga lə waa: Ntɩ ma fʋba alɩkawɩlɩ afɔlɩ na Israɛl na Yuɖaa ba gafala. ⁹ Kɩɩ kɔɔ alee alikawɩlɩ aŋono nɖee mbʋŋa akʋr na bábà ya, ʋshilei nri banyɛ nɩ alaa pɩ Ejibiti kaatəna nɩ aɖoo na ma, ma na; aɖʋwaa: kə ba riba lɔ ayiɖe amalɩkawɩlɩ ɖe nɩ na, n'amʋ gboo kə ma kɔɔ alɩgə balaŋ balaŋ na, ɖaa nɖiyar alə ma na gəŋ. ¹⁰ Ama, alɩkawɩlɩ nɖee ma kʋr na Israɛl agafala ma, ʋni na gəŋ waa: ɩshile ɖe kaŋkəm ɖaa nɖiyar alə ma waa: ntɩ ma ɖʋ ama pɔ baŋŋuro nɩ, ntɩ ma ŋɔni bifolu nɩ; Naa mapra Gaja ashee pɩ, naa ba pra amasamaa. ¹¹ Kasaa ɖe ʋɖən kaa kɔɔ acere ʋsoro na nɩ ba man aɖa ma na, ʋɖən kaakɔɔ acere ʋwor nataba nɩ waa: ʋyɔ Gaja aa? na, aɖʋwaa: baŋuni batɩ batɩ ba yɔ amʋ, tɔɔ na bajala halɩ nɖee alee ʋŋono kpataa ma; ¹² Aɖʋwaa: ntɩ ma təɖə pɩ bambɔnɔ, kə ma kɔɔ alige balesʋra ɩbɔnɔlaŋ ayɔ na. ¹³ Aləgəŋ alikawulɩ afɔlɩma, nalə alɩkawɩlɩ asəbaka waa: Apra aŋono; Nɖee ɩlee ɩŋono akpər gɩpɩla ma shee ɩnana, kɩɩ kɔɔ ɩɖa na.