¹ Ambawor n'amawɛ mana , ɖʋ ma gʋtɔ arǝŋǝ ŋgaɖee nwǝɖa na yɛɛ ma lǝ nnyǝmǝ ashee anyɩn abǝla ashee aŋgʋlɔ ma. ² Ŋkǝlǝ barǝŋǝ ana lǝ na pɩ Ebǝr kagɩkǝrǝ ma, na ba kɔɔ apɛmpɛŋɛ aŋʋra jɩjɩjɩ. Na Pɔɔl alǝ waa; ³ Yuɖaa kaja nawʋ, tarsɩ na baŋʋm amʋ silisii nɩ; Ama mpa nɖe nɩ na batoŋo amʋ, na gameliɛlɩ sul na ncere ayɔ atɩ baya bagʋpɔ ayɔ kʋ kaɖeiɖei, naa awǝɖa kaŋkaarɩ ashee Gaja ɖaa anyɩn miaʋ ɩwǝɖa ʋrɔŋɖe ma. ⁴ Nnaashɛɛ akǝ baɖǝn ba ci aɖiini ɖe laŋ, akʋr basoro na kebasǝmprǝ akǝʋ pɩ sarka nɩ. ⁵ Asaralaaja abʋmbɔnɔ na baŋono balee sǝriya . Na ba saŋkɔɔ ashee amʋ abɔ aɖʋ Ɖamaasɩ kǝbaja banɖi laŋ nna ce ma tɩ rɩ mbaɖee baɖa ŋkǝŋ akʋr ɩlɔ apɩna Yerusalɛm abɔ batɔ ma. ⁶ Ntɔɔ ʋnyɩŋca na ce asǝla na Ɖamaasɩ ma, kpaarikpaari ŋkǝnɖe nace ɖaa miɖii ma, n'ʋkaɖʋ ʋbʋmbɔnɔ ɖǝn ʋrgǝ n'alaŋ napiɖepiɖe asǝr amʋ akal.Na ⁷ nƒǝɖa atǝn, naa rǝŋǝ ʋwǝlǝ ɖǝn ʋna lǝ amʋ waa: Sool, Sool, mʋ lee ka ʋna naashɛ amʋ gǝŋ? ⁸ Na ntǝlǝ waa: Aŋa n'akɩ, nɖiyar? Na alǝ amʋ waa: Amʋ na Yeesu Nasarɛtɩ kaja nɖee ʋna naashɛɛ ma. ⁹ Mbaɖee bayala amʋ ma, baŋǝ ʋkaɖʋ ɖe ama kǝba rǝŋǝ nɖee alǝ n'amʋ ma, ʋwǝlǝ na. Ŋkǝŋ na nlǝ waa: Mʋ nʋ ma lee nɖiyar? ¹⁰ Na nɖiyar alǝ waa: Ta ayiɖe alaŋ, akpa Ɖamaasɩ, ba tɩ ba lǝ akɩ bʋkɔɩ alee ma. ¹¹ Nta ma, kǝ ma kɔɔ na ŋǝ gaɖu na, adʋ ʋkaɖʋ ʋbʋmbɔnɔ ɖe laŋ, na mbaɖee ba yala amʋ ma, ba toŋo aŋgʋnyɛ nɩ akpa na Ɖamaasɩ kampa nɩ. ¹² Ʋsoro ɖǝn batɩ yiɖa nɩ waa: Ananiasɩ, ɖe lee ɖeiɖei karɛɩ ana kʋn gʋpɔ gɩshɛbɔ ma, Yuɖaa kǝbajaɩ baɖa Ɖamaasɩ ma, baɖe batɩ laa sǝriya asoŋsono na na shee ʋsoro ɖe, n'apɩ amasul. ¹³ Alǝ amʋ waa: Sool , amʋ wor, akɩnyine ɩtine. kpaarɩ namʋnyine ɩtime nŋe gaɖu. ¹⁴ Na alǝ waa: Atɩbaya ba Gaja ga laa ka akɩ waa: Ayɔ ʋcɩŋsɔlɔka, ayɔ nɖee alee ɖeiɖei ma, naa arǝŋǝ aganɔ nɩ kabʋlei. ¹⁵ Aɖʋwaa: Akɩ naa lee asǝriya yar bɛrɛ baŋunii Sul, alesʋraɩ ʋŋǝ arǝŋǝ ma. ¹⁶ Nnyǝmǝ, mʋnʋ ʋnasaa? Ta ayiɖe laŋ, Bamǝnakɩ bʋto, anaa yiɖa nɖiyar aŋyiɖa naa akɩmbɔnɔ ŋŋunii nshɛr. ¹⁷ Nkɔɔ apɩ Yerusalɛm ma, ŋkpa ʋnyiŋu kaafala nɩ na nyiŋǝ ma, nɩɩ lee amʋ ɖaa gʋɖa kʋ nnaƒol ma. ¹⁸ Na ŋŋǝ nɖiyar n'alǝ amʋ waa: Ɖoo Yerusalɛm nɩ were were, kǝba tǝlǝ aka sǝriya ʋna laa na shee amʋ ma na. ¹⁹ Na nlǝ waa: Nɖiyar, ba gɩlopi bayɔ waa: Mbʋŋatɩ ɖʋ mbaɖee bashee akɩ ɩja ma sarka nɩ na kǝɖa pɩ ɩpɛ sinagɔɔgǝ nɩ a, na. ²⁰ Ŋkǝlǝ ba kǝ Etiɛɛnɩ, aka sǝriya yar aŋgɩlopi nɖa ŋkǝŋ aa, ɩɖe ƒana ashee amʋ nna basaaka a; amʋ ntoŋoka mbaɖe ba kǝ nɩ aci ma bɩ toko a. ²¹ Ŋkǝŋ na alǝ amʋ waa: kʋla ntɩ tǝm akɩ gaɖulɩŋka ɩsamaa basaka sul. ²² Barǝŋǝ abʋlei halɩ atɩ cǝm na ŋgaɖe ma. Na ba taa bɩwǝlǝ alaŋ na lǝ waa:laa ma nɩ atǝn! Gʋrɩsʋra ɖaa waa ma kʋʋsǝm gʋɖa ŋŋuro nɩ na. ²³ Baɖe batɩ kuro, aƒɔɖɔ bɩtoko, na kǝʋ alaŋ, na nyun mƒʋrʋkɔ alaŋ. ²⁴ Na akǝmcǝmja alǝ waa: Ba kpa na Pɔɔl sarkanɩ akǝɖa nɩ ɩpɛ, naa ba yɔ bʋkɔɩ laŋ ba na kuro na cɩu na nɩ gǝŋ ma. ²⁵ Ba na kʋr Pɔɔl ɩlɔ na yɛɛ ba kǝɖa nɩ ɩpɛ ma, na Pɔɔl ataba ɩsɔjashɩnʋn banɖɩ yar waa: ɩshee ganɔ waa : ba kǝ Roma kaja kǝba cǝm na nɩ ɩkǝma na aa? ²⁶ Ɩsɔjashɩnʋn banɖiyar arǝŋǝ gǝŋ ma, na ce atɩ lǝ akǝmcǝmja waa: Baɩ n'ʋnaa lee? ʋsoro ɖe alee roma kaja na oo. ²⁷ N'akǝmcǝmja a pɩ atɩ taba Pɔɔl waa: Lǝ amʋ ɩja romakaja nakɩ aa? Na Pɔɔl atǝlǝ waa:lɩ. ²⁸ N'akǝmcǝmja alǝ waa: Nsǝla ɩtanɩ nɩ tuntunma na ye cam ŋyiɖa nɖe na Pɔɔl alǝ waa: Amʋ gboo, ɖoo ambʋŋʋma nɩ. ²⁹ Na mbaɖee ba na yɛɛ bakǝɖa nɩ ɩpɛ ma, babɔ balɔ akɔɔ ŋkǝm, n'akǝmcǝmja aŋǝ waa: Pɔɔl alee Roma kaja ma, n'asampǝna ɩkpa nɩ aɖʋwaa : alǝ ka bakʋr nɩ ɩlɔ. ³⁰ Gaja gakʋɖa ma,n'a cɔɔ na yɛɛ ayɔ bʋkɔɩ laŋ Yuɖa a kǝbaja ba na ciu na Pɔɔl ma, na kǝmcǝmja alǝ bakʋɖa ɩlɔ, na alǝ basaraalaaja kaɖibaja na yuɖaa kǝba kǝmcǝmja ba wa la: Na ba tɔɔ Pɔɔl atɩ bagɩcuca.