¹ Napɩ gɩpaɖa nátǝbawoo ma, na gɩtǝŋǝ na cɔɔs, gajɩkʋɖa ka na gɩ ce rooɖǝ ŋkǝŋ na gɩkpa pataraa. ² Na gɩ ŋǝ mɛla ɖǝn ana ce ƒenisiikagʋsaʋ ma, na gɩ kpa mɛla ɖe ni ace. ³ Gɩta na ŋǝ shiipu kaatǝna ma, na gɩ pala jɩ na gʋnyɩpɛnɛ laŋ, naatǝŋǝ na sirii kʋja halɩ atɩkpa tiir aɖʋwaa ŋkǝŋ na mɛla anaa rgǝ bayaja bayɔkɔ. ⁴ Na gɩ ŋǝ Yeesu abakǝŋja ŋkǝŋ, naa aɖa aɖa basul halɩ ɩshile kulumi. Ŋŋuro nsoŋsono ŋriŋǝ na Yeesu abakǝŋja baɖe ma, na ba lǝ Pɔɔl waa: Apaatɩ ce yerusalɛm na. ⁵ Ama ɩshile kumuli kʋ́baŋu nɩ, na gɩ ni ʋnyɩŋca na baŋunii ba yàlà atʋ baɖǝn na babaka na bapur aɖoo na mpá nɩ. Na gɩ cǝm atakǝwǝ laŋ gatunɔ naa anyiŋǝ Gaja. ⁶ Gɩ jabla nátibawoor aboyo ma, na gɩ kpa mɛla nɩ na bani bakɔɔ ashɛʋ bagaɖu. ⁷ Gɩ tǝwǝ atɩgasawa aɖoo na tiir ma, na gɩ kpa pitolomaisɩ, na gɩ sala atɩbawor baɖǝn ŋkǝŋ naa ɖa basul ʋshile ʋɖǝŋkɔnɔ na pɩ . ⁸ Gajɩkʋɖaka na gɩ shɛʋ atɩ kpa sesaree. Nókpa ƒiliipu waasu yar agafala nɩ; filiipu ɖe aleeka bɛrɛ kulumi bʋɖǝn na gɩ ɖa agaɖu. ⁹ Aɖe wǝɖa bapigii ɩ kǝ ba yɔ basoro na ma, banam ba ɖǝ ba tɩ lǝ annabi mana babʋlei. ¹⁰ Ɖaa gɩɖa ŋkǝŋ ɩshɩle tuutuuma ma, Annabi ɖǝn batɩ yɩ ɖa nɩ waa Agabus, aɖe ɖoo na yuɖee apɩ. ¹¹ Atɩ wǝɖa atʋ. Na atɔɔ Pɔɔl abɛlɛtɩ akʋr anyɛ nikei na lǝ waa: << Rǝŋǝ ma ŋgaɖee ŋŋuro nsoŋsono nna lǝ ma: ʋsono nɖee ajie bɛlɛti nɖe ma, Yuɖaa kǝbaja batɩ ba kʋr nɩ ɖaa bakʋr ba kʋ ma, Yerusalɛm, naatɔɔ nɩ akara mbaɖee kǝ ba yɔ Gaja na ma banyɛ nɩ. ¹² Gɩrǝŋǝ gǝŋ ma, nátinna mbaɖee baɖa gaɖʋ gaɖe ma, pǝla pǝla Pɔɔl a paa ce yerusalɛm na. ¹³ Na Pɔɔl ataba pɩ waa : << Mʋleeka ɩna yu na yɛɛ ɩpɛɛ amʋcine gǝŋ? Amʋ ŋkpeɖe aboŋo, kɩ lee waa bakʋr amʋ ɩlɔ kanɖǝnɖǝn na, ama ncɔɔ waa: Macii aɖʋ nɖi yar Yeesu aŋyiɖa laŋ. ¹⁴ Ɖaa Pɔɔl katǝlǝ at ʋpǝlʋpǝlʋ na ma, na gɩ nyantǝra aŋʋra nálǝ waa: Nɖiya ʋciŋsɔlɔka ʋlee. ¹⁵ Kɩ ɩshile ɖe kaŋkǝm na gɩ kpeɖe atalɔ ace Yerusalɛm . ¹⁶ Yeesu abakǝŋja kǝ baɖǝn baɖa sesaree ma, batǝn atɩ ŋkǝma tɔɔ atʋ ace na ʋsoro ɖǝn batɩ yɩɖa nɩ mǝnasɔn aɖe ɖa shiipu kaatǝna nɩ, alee Yeesu akǝŋjakʋŋa na ɖǝn, na gɩ ɖa agaɖu. ¹⁷ Gɩ kpa yerusalɛm ma, na bawor pɩ atuu n'ʋciŋkerka. ¹⁸ Gaja gakʋɖa ma, na tɩnna Pɔɔl gɩ ce Yakubu agadʋ, na baŋona baŋunii bawala ŋkǝŋ. ¹⁹ Asala pɩ aboŋo ma, nálǝ akɛɛshu ashee pɩ antǝma nɩ pɩ bʋkɔɩ Gaja galee ashee mbaɖǝǝ kǝbabʋŋayɔ Gaja na ma. ²⁰ Baŋunii barǝŋǝ gǝŋ ma, na bakʋma Gaja. Na lǝ nɩ waa: Wuu, ʋŋǝ aa? Yuɖaa kǝbɛrɛ ɩmiili baɩ bashee ka ɩja baŋunii baɖa ashee gʋpɔ kakoŋkaarɩ. ²¹ Aɖʋwaa: barǝŋǝ waa: ʋtɩ cere yuɖaa kǝbaja ɩ baɖǝ bʋkǝmǝ mbaɖee kǝba yɔ Gaja na ma, bagɩcuca waa: bapaa kɔɔ kʋn Musa agalei na, ba paa kɔɔ pɛŋɛ bapisoro na, bapaa kɔɔ kʋn ɖaa gʋshile gʋlǝ ma na . ²² Baɩ na gɩ sar? Sika ɖǝn amana tuutuuwa taawala, aɖʋwaa batɩ ba yɔ waa ʋpɩ. ²³ Galaŋ shee alee bʋkɔɩ gɩ nɩ gɩ lǝ akɩ ma, bɛrɛ banan baɖǝn ba lǝ waa batɩ ba lee Gaja gʋjɔɔ. ²⁴ Gala pɛmpɛŋɛ akʋʋlɔ naa atɔɔ pɩ ɩce, yɛɛ bataŋjika naa ɩka anyɩnaɖi. Naa ɩfaŋa waa galei ɩ barǝŋǝ akɩnɖi laŋ ma ɩsǝɩ nɩ ama akɩgboo sara ɖaa gʋpɔ gʋlɔ ma. ²⁵ Ɩtasaa na mbaɖee kǝ ba bʋŋa yɔ Gaja na naa ba shee ɩja nnyǝmǝ ma, gɩtɔɔ asǝŋsi ɖǝn aŋɔn alǝpɩ waa/ Bapaa kɔɔ ajɩ ataŋkɔɩ balaa saraa ashee akʋna ma na, ba paa kɔɔ jɩ akɔnɔ na, ba paa kɔɔ jɩ ɩbɔrɩkono na, ba paa kɔɔ jɩ ajɩwa kayɔkɔ na. ²⁶ Nkǝŋ na Pɔɔl atɔɔ bɛrɛ baɖe n'apɛmpɛŋɛ agʋlɔ, Gaja gakʋɖa ma, na akpa ʋnyiŋu kaaƒala nɩ aɖǝn na pɩ, atilǝ ʋshileɩ ba lee gʋshile na gʋjɔɔ ŋgɖee baaŋa alee ma. ²⁷ Ʋshile kulumi ɖe kʋbaŋu ni, na yuɖaa kǝbaja ɩ baɖa asii ma, ba ŋǝ Pɔɔl ʋnyiŋu kaaƒalanɩ, na ba pikǝl samaa aŋunii, na bata ari Pɔɔl. ²⁸ Na kuro waa:<< Atɩbaja israɛl kǝbaja tama oo ƒʋrara ma gaɖu! Ŋǝma arɛ ɩ ana lee waasu baa ŋkana ɖulinyanɩ na ciʋ na samaa ma, na cin na gʋpɔ, na cin na gaɖu ŋgaɖe; Akɔɔ tɔɔ grɛkɩ kǝbaja akpa n'ʋnyiŋu kaaƒala nɩ na yɛɛ akpa cɩrɩ cɩrɩ kaaɖu ajɩwa. ²⁹ Aɖʋwaa: << Babʋŋa aŋǝ troƒim Efɛɛsi kaja Pɔɔl sul mpá nɩ, bayɔ yɔ waa: Pɔɔl atoŋo ni na akpa n'ʋnyiŋu kaaƒala nɩ. ³⁰ Ŋkǝŋ na mpa ŋŋunii nta, na samaa ata acunna baa ŋka. Atɩ ri Pɔɔl abɔnɩ ʋnyiŋukaafalanɩ aɖoo náka, na rim acaŋkɔ. ³¹ Ba na yɛɛ ba kǝ nɩ acii ma, na kantogi ŋkpa Yerusalɛm k akǝmcǝmja nɖee ana paɖa ɩkǝma ma atɔ nɩ, waa : Gaɖǝn gakpa Yerusalɛm kampa nɩ. ³² Kpaarɩ kpaarɩ na amana cuu atɩ tɔɔ ɩsɔja n'ɩsɔjashɩnʋn kaɖi baja atɩ kpa basul : Ba ŋǝ akǝmcǝmja n'ɩsɔja ma, na bapala Pɔɔl kʋkǝʋ. ³³ Ŋkǝŋ na akǝmcǝmja akpa bagɩcuca arɩ Pɔɔl akʋr nɩ ɩwɔrɔ banyɩʋ. Naa ataba nɩ gʋrɩsʋra ɩ alee ma, na bʋkɔɩ alee ma. ³⁴ Ama , samaa agɩcuca nɩ baɖe batɩ kuro baaŋa na agaja, nɖe waa ŋgaɖe basaaka wȧȧ wàà; Akǝmcǝmja kɔɔ atɩ kaashɩ na, aɖʋ ŋkǝmprǝ laŋ, na alǝ ba laa nɩ acena sankanɩ. ³⁵ Ŋkǝlǝɩ Pɔɔl argǝ sɩkalee laŋ na pɩ ma, n'ɩsɔja bataanɩ aɖʋ samaa acukucuku laŋ; ³⁶ Aɖʋwaa samaa atǝr aŋkǝm, nakuro waa; kǝ ma nɩ acii. ³⁷ Ba na yɛɛ bakpa na nɩ sarka nɩ ma, na Pɔɔl alǝ akǝmcǝmja waa; Jɩsuuru ntɩ yɛɛ ma lǝ akɩ alei gaɖǝn aa? Nakǝmcǝmja ataba nɩ waa: ʋtɩ rǝŋǝ gǝrɛkɩ kagija aa? ³⁸ kalee Ejibtɩ kaja nɖee abǝla gayili atɔɔ akɔŋcǝrǝ baja ɩmuli banan ace na ʋteru nɩ ma na,? ³⁹ Na Pɔɔl alǝ waa: Yuɖaa kaja n'amʋ, Tarsɩ kaja silisii nɩ, mpa nɖee nwǝɖa ɖarja ma nɩ. Shee amʋ ganɔ ma lǝ na samaa. ⁴⁰ Nakǝmcǝmja ashee nɩ ganɔ, Pɔɔl , ayiɖe sɩkalee laŋ ma, naa ataa gʋnyɛ alǝ samaa waa: Baŋʋra shɛlɛm. Na samaa aŋʋra sʋraɩɩ, na Pɔɔl alǝ na pɩ heebrǝ kagɩkǝrǝ.