¹ Gəŋ ci kristo gboo ajɩ ɩshɛɩ gʋlɔnɩ, anyɩn gboo rɩm ma, nagʋfaŋa gʋɖɔŋkɔnɔ gʋɖe kɩgbaja, aɖʋwaa: Nɖee anajɩ ɩshɛɩ gʋlɔ nɩ ma, aboŋo na mbɔnɔ kʋleu. ² Naa apaa kɔɔ aɖa bɛrɛ bagɩnyɩnfɔnɔ nɩ na, ama, Gaja Kʋsɔlʋ nɩ, alʋwaatʋʋ ndee asaa ashee nɩ waa aɖa gatəna laŋ ma. ³ Ɩfana gəŋ, ɖaa gɩbʋŋa na sara na lee mbaɖe kəba yɔ Gaja na ma bʋcinsɔlɔ ka, na sana ʋripaɖʋ kaasana, gɩnyɩnfɔnɔ, ʋkanyem, ɩjɩbɔnɔ n'ʋnyem, n'akʋna ɩbɔnɔ k'ʋpɛnʋ. ⁴ Paa ma tɩ pala alesʋna ɩsanaɖe ɩtutur anyɩn akulo afəl na ma,ɩshi anyɩn naa ba naa ciu n'anyɩn na. ⁵ Batɩ ba ce atɩ lee ŋkɔnta balesʋra ashee nɖee akpeɖe abaŋo na yɛɛ cim n'ɩkəma ŋŋuno baja na bakono ma. ⁶ Aɖʋwaa: Balee laabaarʋ asoŋsono kawaa su ashee bakono gboo, naa ɖaa ba cim napɩ ɩkəma ɖaa bɛrɛ baɖa Gaja gana yɛɛ ma, na aŋŋuro. ⁷ Baa mʋ nʋ kʋboŋu ʋsəla, wəɖa ma, asəŋsi na nɖawa nsoŋono na kara gayɛ na nyiŋə. ⁸ Baa mʋ nʋ kpataa nɩ wəɖa ma ʋsɔlʋ ʋŋərə n'anyɩnbawor, aɖʋwaa: ʋsɔlʋ ʋɖa ma, ʋtɩ sin mbɔnɔ laŋ tuutuuma. ⁹ Naa ma na cam anyɩnbawor gɩsana, ʋŋumoŋumo ʋpaa ɖa na. ¹⁰ Ɖaa bɛrɛ ba soŋsono mbaɖee bana yʋɖa Gaja kajɔɔ asʋra asʋra ma, baaŋa atɔo gʋjɔ ŋgʋdee a cam ma, akaŋa na basaaka. ¹¹ Ʋɖən ata naa lə bʋlei, baa maa nɖee ana lə Gaja kabʋlei ma: ʋɖən ata naa lee antəma karɛ alee ɖaa Gaja gashee nɩ ɩkashɩ waa alee ma, naa baa mʋnʋ nɩ bakvma Gaja Yessu-Kristo nɩ, aɖʋwaa ajee ʋkʋmʋ, nɩkashɩ bʋja bvja na ce nace ami. ¹² Ambasɔlɔka,ɩpaa lee anyɩ biti, ɖaa gʋlesʋra gʋfɔlɩ ɩ gʋwəɖa anyɩn gɩsana ɖaa boɖoboɖo kaŋku ɩna wur na yɛɛ ɩtʋŋa ɩtŋa anyɩn aŋə ma na. ¹³ Ɖama ʋjaŋ nɩ, na lə waa Kristo ɩshɛɩ nɩ gɩ na jɩ gəŋ, naa anyɩn gboo ɩɖa ʋcinkər ka nɩ, n'ʋjaŋ ŋkələ ʋkʋmʋ ʋnʋtɩ ɖoo ma. ¹⁴ Bata naa lim anyɩn Kristo aŋɩɖa laŋ yɔ ma waa: ɩɖoo naɖi, aɖʋwaa: Ŋŋuro ʋkʋmʋ kanja nɖa anyɩnalaŋ, Gaja kaŋŋuro nɖa n'anyɩn. ¹⁵ Ʋɖən apaa tɩ najɩ ɩshɛɩ alaa bɛrɛ baŋŋuro ma na, kokoo, anyim, kokoo mbɔnɔ yar na, kokoo ʋɖən agalei gawaka nɩ na. ¹⁶ Ama ʋɖən ata naa jɩ ɩshɛɩ,alee Kristo kʋpi ma la, gɩcifala gɩpaa kpaa nɩ na, ama anaa kʋma Gaja ŋyɩɖa nɖe laŋ. ¹⁷ Aɖʋwaa: Nnyəmə na Gaja kɩ kəma ɩsəba na Gaja kaafala, ɩtajɩ waa: Atʋ mpɩ ɩkəma ɩsəba na ma, baɩ na mbaɖee kə ba na nyene Gaja ka laabaarʋ asoŋsono na ma, ba boŋo na ma? ¹⁸ Ɩta jɩ waa: ɩnyinkipi nɩ nɖee atəŋə ma, aɖoo na ndi, gəŋ ma, mbusu yar na mbɔnɔ baja baɩ na balee? ¹⁹ Galaŋ mbaɖee ba ba jɩshɛɩ na Gaja kʋcinsɔlɔ ka ma, bakɔɔ na baŋŋuro akara ndee awəɖa ʋyiɖu nama alee baa mʋ nʋ kpataa ma, anyɛnɩ nalee nsono.