¹ Ŋkǝŋ na baŋǝ n'atʋ waa:Kristo abatǝŋleeja pɩ gɩlee na mbaɖee ba na kaɖa na faŋa Gaja kantǝmaɩ nlugo ma. ² Ngaɖee ga ɖa ma na gǝŋ waa: Ntǝma nɖe kǝbalee ka ba lee njɩ gɩshɛbɔ gɩshɛbɔ ka ɖeiɖei. ³ Ɩta saa n'amʋ, gani kaa lee amʋ gaɖǝn na saaɩ ɩ na cǝm n'amʋ ɩkǝma kokoo bɛrɛ ba saaka ba na cǝm n'amʋ ɩkǝma ma. Kǝ ma na cǝm nagʋlɔ ɩkǝma na, aɖʋwaa: Kǝ ma wǝɖa taalɩ ɖǝn na, ⁴ Kɩlee gani gapalaka nɖa ɖeiɖei na. Nɖee a na cǝm n'amʋ ɩkǝma ma, ʋni na gǝŋ nɖiyar. ⁵ Galaŋ paa ma kana cǝm ɩkǝma na, nɖiyar ata kpa aboŋo a naa kaɖa nɖee ɩfǝrǝ ŋkomo nɩ ma, ɩɖoo gbagbaraa, bʋkɔɩ bʋ ɖa ɩfolu nɩ ma, ŋkǝŋ na baaŋa acam ʋkʋmʋɩ Gaja gashee nɩ ma. ⁶ Ambawor, anyɩnnalaŋ na nɖʋ jɩ amʋ n'apolosɩ gɩ kʋnjɩ naa ɩnaa kiɖe n'atʋ, n'ʋɖǝn a paa tilee aɖǝ bʋkɔɩ ba ŋǝn ma na, naa gʋlɔfaŋaka gʋpaa tɩ kpa anyɩn ɩnaa faŋa anyɩnnalɔ na. ⁷ Aŋa na laa agʋlɔ na fǝlǝ na basaa ka? Mʋ nʋ ɩwǝɖa na kɩlee faala na bashee anyɩn na? Ba ta shee anyɩn faala, mʋ laŋ na ɩ na kʋma anyɩna lɔ ɖaa kɩ lee faala na ba shee anyin na ma? ⁸ Ɩwǝɖa baa mʋ nʋ aboŋo, ɩpra arisikibaja atʋ ku wǝɖa akɔɖǝ na, ɩsǝba na jɩ ko gɩyarɩ boŋo. Nsɔlɔ waa: ɩjɩ gɩyarɩ gɩ ɖe naa n'anyɩn gɩ man ajɩ! ⁹ Ŋŋǝ waa: Gaja ga tɔɔ atʋɩ gɩ lee Yeesu a ba tǝmka ma, aɖʋ ŋkkǝm gɩ pra ŋkǝm kǝ baja, ba kǝ atʋ gɩ cii, aɖʋwaa: Gɩ pra sake ashee ɖulinya, ɩmalaɩka na bɛrɛ ba tɩjɛlɛ. ¹⁰ Atʋ gɩ pra baŋantǝra Kristo laŋ,ama, anyɩn gʋfaŋa baja Kristo laŋ; Ata lɔ ɩci, ama anyɩnɩja ɩkaŋkǝr.Baa ŋa atɩ nyene anyɩn, ama ba yɛɛ atʋ afar. ¹¹ Halɩ na alʋwaatʋ nɖe, gɩ tɩ ciakɔmɔ, ʋtunyem ʋtɩ kǝ, kɩɩ wǝɖa ayɔkɔkaraka na, batɩ naashɛ atʋ, kǝrǝ atʋ kuwǝɖa bʋɖuɖaka na; ¹² Gɩ tɩ leentǝma n'atanyɛ ɩkpa atʋ; Ba tɩ lǝm atʋ ama, gɩ tɩ ɖʋ pɩ alǝbarka; Batɩ naashɛɛ atʋ, gɩ tǝlǝ. ¹³ Ba tɩ jɩ atʋ gɩwʋlʋ, atʋ gɩ tɩ lǝ na pɩ na bʋcǝma; gɩ pra ɖaa aŋɔɩ ba na shɛr na bǝɖa ma, ɖulɩnya nɩ, ba kɔɔ n'atʋ abǝɖa halɩ na nnyimǝ. ¹⁴ Kǝ ma ŋɔn alesʋra ɖe na yɛɛ ma kara anyɩn gɩcifala na, ama, ntɩ yɛɛ ɩyɔ ɖaa ambapi basɔlɔ ka ma. ¹⁵ Aɖʋwaa: Baa maa ɩwǝɖa bacereka ɩmiili tǝb Kristo nɩ, kɩ wǝɖa baya tuutuuma na, aɖʋwaa: Amʋ nŋʋm ka anyɩn Kristo nɩ na laabaarʋ asoŋsono. ¹⁶ Ntɩ ɖʋ anyɩn ɩkashɩ, waa:Ɩnaa tɔɔtɔɔ amʋ. ¹⁷ Galaŋ na n'tǝm ampi asɔlɔka Tɩmotee, aɖa ɖeiɖei ndiyar nɩ ma, ashee anyɩn; Ataa lige anyɩn amɩnyɩŋca Kristo nɩ, ɖaa nna cere baa ŋka na ɩcɔɔcɩ baŋunii nɩ ma. ¹⁸ Bɛrɛ baɖǝn ba tɩ faŋa ba lɔ ɖaa kǝ ma kɔɔ apɩ anyɩn gaɖu ayɔna ma. ¹⁹ Ama, ɩta lee cei ntɩ ma pɩ anyɩngaɖu, nɖiyar ata tǝlǝ, naa ma yɔ mbaɖee banafaŋa balɔ ma, ba bʋlei n'ɩkashɩ ɩ bawǝɖa ma ²⁰ Aɖʋwaa: Gaja kaayarɩtǝna kaa lee bʋlei kanɖɛn ɖǝn na ama n'ɩkashɩ. ²¹ Mʋ nʋ na yɛɛ ma pɩ na ma?Ma pɩ n'ʋpɛ yaa mapɩ n'ʋsɔlʋ n'ʋrɩsana?