¹ Inaŋgbə́á ŋ kpɔ́ əran ɖə́ká lə do có àxumɛn ə̀zò ámɛwó lə tə̀ta nɛ́ɛn kíɖə́ ə̀ta ámadrə lə si lə ə̀zòàwòjíá ə́fiɔkúkú amɛnwó lə wó ə̀tá də̀síàdə jíá bùsú yə́ŋkɔ́ lə wójí. ² Ǝran la kəŋkpɔa yə sigbə əkpɔn ənɛn, í yə́ fɔwó lə sigbə ə̀hràtɔ ənɛ́n ənɛn, yə́ nu lə sigbə jàŋtá tɔ ənɛ́n. Vɔ̀drìbà cɔ́ yə́ŋunsɛn nɛɛn, yə fiɔ zinkpin kiɖə́ yé cɛkpakpa gánŋgán í sə́ nɛ́ɛn bə́ nán dù fiɔ. ³ Lə əranwó domɛn án yə́ bikpa lə ɖə̀ká ŋún sigbə wó wuikpɔ́ váyi ənɛ́n. Vɔ̀à ə̀kú yə́ bikpa kə lə ŋún án ku. Í anyíngbanjí nɔntɔ́wó sééé əranú wɔwɔ kpácáwó í wó kprɔ ərandó. ⁴ Wó lə súbɔ́ vɔ̀drìbà ənúkədɔ́á ə́cɔ́ yə́ cɛkpakpa í sə nán əran an wó lə súbɔ́ əran cá í yi jí í lə nú bə́: "mɛɛ́n átə́ŋun lə sigbə əran ənɛ́n màn?" "í mɛ́ɛn átə́ŋú wɔ àhùà kidə́ màn". ⁵ Ǝ́cɔ́ ənukə ə̀zùgbə̀ ganŋgán wó donɛn kidə́ búsú nyɔnwóá sə́ nán əvan wóɖəmɔn nɛɛ bə́ ná tə́ŋún wɔ́ yə́dɔ́ wrétí hòoka cíìvə. ⁶ Í əran kə yénu ì lə nú bùsú nyɔnwó də Mawu ŋú, í dóòhɛn yə́ŋkɔ fí ìnɔnɛn kídə amə kə lə jìkoríà. ⁷ Wó sééé wó ɖəmɔ́n nɛn əran bə́ nánwɔ àhùà kídə́ xɔ̀sə̀tɔ́wó nə́ àduwójí. Ǝ́gbəxɔ ŋúsɛ́n də ə̀hannuwó sééé ə̀dúwó, ə̀gbə̀vóvówó, kídə́ dùkɔ́nwó. ⁸ Anyígbájìtɔ́wó sééé kəwó wóŋ ŋrɔ wóŋkɔ́ də́ wéman kələnyín arɛ́ngbɔ́ kə wówua yə àgbə̀wema mɛn, ə́ có kə́kə́ xíxə́á yə́ gɔmənɖókpə́ mɛnan wó súbɔ́ɛ. ⁹ Nə́ ə̀tó sənú lə amədəsíá nán sééé. ¹⁰ Nɛ́n amənɖə́ jə nɛ́n lə̀lə́ɖɛ́á wóálə́ədɛ́ nɛ́n amənɖə́ jə bə́ wóá wui kídə́ kpacaá wóá wui kidə kpaca. Yə́ ídɔ í aməxɔxɔ kəwó cɔ́ wó ɖə́kiwó sééé sə́ nán Mawuá nán dójì ì wó xɔsə ŋká ɖə kpɔtɔ ò. ¹¹ Ŋunan yə́ ŋgbə́á ŋkpɔ́ əran bú lə do có anyingbán mən gbɔnɔn. Ǝ̀zò ámə̀nvə̀ lə sí sigbə arɛ́ngbɔ́ví tɔ ənə́n vɔ̀à ə́lə xonu sigbə vɔ̀drìbà ənə́n. ¹² Í ìwɔ́ əran kə́lə́kə́lə́tɔ yə ŋúsən wó sééé lə yəŋkuvimən, ə̀zín anyíngbanjítɔ́wo jí bə́ wóá súbɔ́ əran kə́lə́kə́lə́ tɔa kə ye bikpa kú lə ŋúán. ¹³ Ǝ́wɔ àmlima nú wó ə́ná í ə̀zò do có jìŋkorì vá anyìgbánjí lə amənwó ŋkúvímən ¹⁴ kiɖə́ jẹ̀sì kəwó wó ɖəmɔ́n nɔ́n bə́ náwɔa í to yə nuwɔwɔ wó mən an ə́brə anyíjítɔ́wó ə́bíɔ́wó bə́ wóá wɔ rɛ̀ɛ́gba də əran yə́ nɔnɔmɛn, kə wó dákpaŋún í ì gbəkpɔtɔ lə àgbə̀ɖɛ̀á. ¹⁵ Ǝnə́n wóɖəmɔ́n nɛɛ bə́ nánán gbɔ̀ngbɔ̀n əran yə́ rɛ́gbaa nə́ rɛ̀ɛ́gbaaa nátə́ŋú xonuxó, í tó inan mənán wóá wuamənwó amən kəwó ágbə́ bə́ yəwó ŋkàá də́tagú nɛɛ ò. ¹⁶ Azí amə də̀síàdəjí, bə́ wóáxɔ də̀sì dəvìwó, amən cincinwó, hòtɔ́nɔnwó ayamənɔnwó amənxəxrəwó kídə́ vòvòmənwó sééé axɔ də̀sì də́ wó lɔ dunú ŋún nɔ̀mí wóŋgónu. ¹⁷ Amənɖə́kɛ́n ŋ́kàá tə́ŋún xrənú nɔ̀mí ásanú nə́n əran yə́ də̀sì ŋ́ləŋí ò. Aməkəŋú əran ŋkɔ́ hə̀hrə̀-jə̀sì ləa də̀də̀ yí. ¹⁸ Lə lá í núnyá lə kə̀. Nə́ gɔmə̀sə̀sə̀ lə amədə́síá ná bu əran éhəhrəməkpɔ́ ənúkədɔ́á àgbə̀tɔ́ éhəhrəmə yí yé həhrə lə nyió kààtɔn ámadɛ́n kídé kakítakpocía din.