¹ Nɔviwó, nyǝn ŋka tǝŋ xonú nǝnmi sigbǝnǝn gbɔgbɔmǝn mǝnwó ɛ́nǝ̀wó, vɔ̀a sigbǝ́ nǝn ŋtiranmǝntɔwó ɛ́nǝ̀n, sigbǝ́ ɛvi yǝ́yǝ́wó ɛnǝn lǝ Yesú mǝn. ² Ŋ nyi mi kidǝ́ anɔnci, ŋ nyi kidǝ́ ɛran ó, va nǝn ifia mi ŋ sɔgbǝ́ ó. ³ Ɖobǝ́ migbǝ́ kpɔtɔ lǝ ŋtiran mǝ̀n, ɖobǝ́ lǝfi ɛŋuhuan kidǝ́ ajrǝ́ lǝ́ mian mǝn lǝ́ à, mi ŋ lǝ́ nɔn agbǝ́ lǝ́ ŋtiranmǝn i lǝ́ zɔndǝ́ amǝn yǝ́ lɔwó jià ? ⁴ Nǝn amǝnɖǝ́ nu bǝ́: «ŋ lǝ́ Paulú ji» i amǝ̀n bú nú bǝ̀: «ŋ lǝ́ Appolos ji», mi ŋ lǝ́ nɔn agbǝ́ ŋtiran mǝn àn ? ⁵ Mǝn i nyi Appolos ? mǝn i nyi Paulú ? Ɛdɔcɔviwó kǝ́ Axotɔ dǝ́ ɛdɔ asi nǝn, i tó wó jià mi xɔsǝ̀. ⁶ Ŋ dónú, Appolos wú ɛ́cí nǝn, vɔa Mawu nɛ cincin. ⁷ Kǝ́ i lǝ́ nǝ́n an, ŋ nyi amǝn kǝ́ donú amǝn kǝ́ wúcí, i nyi ɛnúɖǝ́ ó. Và Mawú i nan nǝn cíncín ɛnú. ⁸ Í fíà à amǝn kǝ́ donú kidǝ́ amǝn kǝ́ wúcí à à, wó nyi ɖǝkà, i amǝnsiamǝn là xɔ fɛntu nǝn yǝ́ dɔ kǝ́ i wà. ⁹ Ɖobǝ́ mi bɔ lǝ́ wɔ Mawú dɔ yi. Mawú dɔ yí. Mawú yǝ́ hó i mi nyí, Mawú yǝ́ xɔmǝn mǝn nú wó mi nyi. ¹⁰ Mawu yǝ́ amǝnuvɛvɛ kǝ́ wo nanŋ sigbǝ́ ɛxɔmɛntɔ jǝ́ Adaŋ, ŋ ɖokpǝ̀ gú i amǝnbu mǝn ɛxɔ dǝ́ji. ¹¹ Ɖobǝ́ amǝnɖǝkǝn ŋ katǝŋ gbǝ ɖó ɛkpǝn bu ɛgú sigbǝ́ ɛkpǝ́ kǝ́ wó ɖó gú, yǝ́ i nyi Yesú Kristó. ¹² I fià à nǝ amǝnɖǝ́ cɔ sika kpǝ́ mɛn ɛxɔ dǝ́ ɛkpǝ́ kǝ́ wó ɖo gúa jià, kidǝ́ klosalo, ɛkpǝ́ xɔhówó, ɛgbǝ́wó, atíwó, ɛran miwó alo kidǝ́ abaya á, ¹³ Yǝ́ dɔwɔwɔ là zǝ́, ɖobǝ́ ŋkǝ́kǝ́ yǝ́ kandǝ́ la nan à zǝ́. ɖobǝ́ ɛzó la sǝŋ zǝ́. ɛzo la disà ɛnú kǝ́ amǝ̀siamǝ̀ wɔ. ¹⁴ Nǝn ɛnú kǝ amǝnɖǝ́ wɔà kpɔtɔɖǝ̀ à xɔ ý fɛntú. ¹⁵ Ʋɔa nǝn amǝndǝ́ yǝ́ dɔ bízó à, à gú, vɔa aǝn àn ŋtà la kpɔ ɖǝ́ɖǝ́, sigbǝ́ wó ɖǝ́ lǝ́ zomǝn ɛnǝ́n. ¹⁶ Mi ŋ nyàn bǝ́ Mawú yǝ́ ɖǝ́xoxɔ i mi nyianɔ i Mawú yǝ́ gbɔgbɔ lǝ́ mian mɛn an ? ¹⁷ Nǝ amǝnɖǝ́ gban Mawú yǝ́ ɖǝ́xoxɔa, Mawú là gban yǝ́ ca, ɖobǝ́ Mawú yǝ́ ɖǝxóxɔ̀ lǝ́ kɔkoǝ́ i miawó ca milǝ́ kɔkoǝ́. ¹⁸ Miŋ kà brǝ́ mian ɖǝ́kiwó ó. Nǝn mian mǝn tɔ dǝ́ bui bǝ́ yǝ́ jǝ́ ŋununyàn lǝ́ xixǝ́ là mǝn an, nan trɔ zù «ŋúnú manyàntɔ» nǝn avà trɔ ŋunu nyantɔ. ¹⁹ ɖobǝ́ xixǝ́ i là mǝn yǝ́ ŋúnú nyanyan nyi cúkú lǝ́ Mawú gbɔ. Ɖobǝ́ wo hrɔɛnɖǝ̀ bǝ́: «Lǝ́ wó yǝ́jǝ́jǝ́ mǝn wó ŋ tǝ́ dǝnǝ̀n dǝsi ŋunu nyantɔ ó» ²⁰ Sǝ kpǝ́ à: «Axotɔ nyan bǝ́ ŋùnu nyantɔwo ɖaŋ ɖǝdǝ́ ŋ ɖótà ó». ²¹ Kǝ́ í lǝ́ nǝn àn, ŋ jǝ́ bǝ́ wa dó amǝn ɖǝki dǝ́ ɛ́ji ó ! ɖobǝ́ ɛnúnwó séé nyi miantɔ, ²² Nǝn i nyi Paulú aló Appolos, aló Sefas, aló xixǝ́amǝ́n, aló agbǝ́, alo ɛkú, aló ɛgba yǝ́ nú lǝ́ɖǝ̀wó, aló ɛnu kǝlà va lǝ̀ wó. Miant ɔi nyi ɛnuanwó séé; ²³ I mi nyi Kristotɔ i Kristó nyi Mawutɔ.