¹ Wóá cɔ́ɛ bǝ́ ŋ lǝ dó amǝnwó gbǝ kidǝ́ Mawu yǝ́ ŋɛndótɔ́wó tɔ. Vɔ nǝ́n nyǝn ŋ́ wɔ rɔ́nrɔ́n dɛáá, ŋ nyin ganu gbale nɔnmí ayáwágbán kǝ dinǝn gbǝ sínsín. ² Wóá cɔ́ɛ bǝ́ ŋ wɔ ǝnyɔn nudɛ́ yǝ́ nunánán dɛ́ í ŋ sǝnǝn ǝnyɔn dodóẃ sééé gǝnǝn í nyánǝ́n ǝnúwáwrá wó sééé, í mán wɔ xɔsé kǝ́kǝ́ mán nú bǝ́ ǝtówó nán gboyi. Vɔ nǝ́n nyǝn ŋ́ wɔ rɔnrɔn dɛáá, nyǝn ŋ́ nyin ŋ ŋ́dǝ́kɛ́n o. ³ Íwóá cɔ́ɛ bǝ́ ŋ cɔ́ tiŋ nú nɔn amǝnsiwó sééé sǝ́ nán amǝn mawɔŋ́dǝ́dɛ́tɔ́wó, í kǝ́kǝ́ ŋ cɔ́ dǝǝkinyǝn nán bǝ́ wóá tɔ́zoŋ. Vɔ nǝ́n ŋ́ wɔ rɔnrɔn dɛá nyǝ ŋ́ dulǝ dǝ́kɛ́n ó. ⁴ Rɔnrɔn gbɔnǝnjidɛ í nyɔ́n, rɔnrɔn ŋ́ huanaŋún o, í ŋ́ dónǝ́n dǝǝkia dǝǝjí grojo o, í ŋ́ wɔnǝn akɔ́a. ⁵ Rɔnrɔn ŋ́ wɔnǝn ŋunkpǝn núó, í ŋ́ jínǝ́n yǝ́ dǝ́kɛ́n tɔ o. Ŋ́ wɔnǝn xomǝnfíɛ́n kábákábá o, í ŋ́ lǝ́nǝ́n ǝvɔɛn kǝ wó wɔ dǝ́ŋún dǝ́ adɔnmǝn o. ⁶ Ǝnú majɔmajɔ́ ŋ́ vivinɔ́n nɛ́ɛn o, kǝ́ ǝ́ kpɔ́nǝ́n jijɔ dǝ ǝnyɔn dódó ŋún. ⁷ Rɔnviɔn cɔ́ nǝ́n núsíanú kpoŋ dǝdǝ. Xɔsǝ kídǝ́ ǝmɔ́n kpɔ́kpɔ́ ŋ́ búnǝ́n dǝ́ǝo, í i donǝ́nji lǝ nuwó sééé mǝn. ⁸ Rɔnrɔn ŋ́ vɔnɔn gbǝdǝo. Nǝ́n ǝnyɔn núdɛ́wó lɛá, wónu vá yinɔn. Nǝ́n ǝgbǝdódówó lɛá, wóá vá nɔntǝ. Nǝ́n ŋununyányán lɛá, yǝ́ nu ává yi. ⁹ Dó mí nyánǝ́n dówó í mí gbǝ núnǝ́n ǝnyɔn dówódɛ́í, ¹⁰ vɔa nǝ́n ǝnúkǝ nyɔ́án váá, ǝnúkǝ ŋ́ dǝbliíboá ǝ́ búnɔ́n. ¹¹ Gákǝmǝn ŋ nyín dǝ́viá, ŋ xonǝnu súsú sigbǝ dǝ́vi ǝnǝ́n. Kǝ ŋ vá cián, ŋ tací tiŋ́ dǝvi mǝnúwódɛ́. ¹² Ífia, mi lǝ kpɔ́ŋunú sigbǝ miŋ lǝ kpɔ́ ǝnǝ́n ó tó mɔnkpɔ́nijí, vɔ́á ŋkúví mǝn kidǝ́ ŋkúvímǝn. Í fiaá ŋ nyán ǝnú dówó, vɔá maán vá nyɛ́ɛn krédé wó dǝsiŋ ǝnǝ́n. ¹³ Vɔa ifiaá, ǝnú amɔntɔn ŋunán wó lɛdɛ́: xɔsǝ, mɔ́nkpɔ́kpɔ́ kidǝ́ rɔnrɔn, vɔa ǝnú kǝ gánŋgánwú lǝ́ amɔntɔ́ an wó mǝn án yǝ́ í nyin rɔnrɔn.