¹ Po uYesu akalola umunthu umusambazi akawikaga ivyakupereka mowakawikaga. ² Po akalola umwanthanda umufwile umukavu akawika utumakopala tuwiri. ³ Po akanena, " Nadi nkhunena kwiwe, umufwile uyu mupina awika ukuluska wonsi. ⁴ Pakuti wonsi awa wakapereka ukuyana nuwusambazi bwawo,ukwene umufwile uyu, ukufuma muwukavu bwakwe, akawika vyonsi vyo akawa navyo." ⁵ Lyo wamo wakunena ivya mucharichi, ngati mowakaliyemvezga namabwe agakuyemba nivya kupereka, akanena, ⁶ " Ngati pavinthu ivi vyo mukwennia, amasiku gakwinza aponye kutakwinza apa ibwe pibwe ilya mwawo lyolitakwinza ukulepuka nukugwa pansi." ⁷ Powakamuwuzichizga wuyo, ukunena, "musambizi, lyoli po ivinthu ivi vikwinza ukuchitika? Gakwinza ukuwa masayini wuli ukuti ivinthu ivi vili papipi nukuchitika?" ⁸ UYesu akazgola, "Ukwene muchenjele mutakapusichiche Po awinji wakwinzu kwinza mwizina lyane, ukunena, 'Nene,' po, 'inyengo yapalamila.'Mutakajenje kuwawo. ⁹ Po nanthi mukwivwa inkhondo nichongo, mutakatetemaje, pakuti ivinthu ivi vikwenela ukuchitika suti, ukwene uwumalilo wutakwinza ukuchitika panapo napanapo." ¹⁰ Po akanena kuwawo,"Amaluko gakwinza ukunyamukilana namaluko, po uwufumu ku wufumu. ¹¹ Kuzgakwinza ukuwa ichindindindi ichikulu, muvigawa vya kupambana pambana inzala nimbina. Ivinthu ivijeni nivya kunyizga vikwinza ukuloleka ukufuma kumwanya. ¹² Ukwene povitachitisile ivinthu ivi, wakwinza ukwimika inyowe zgawo pimwe, nukuwanyoza nukuwatwala kuma sinsgogi nakumagadi, nukuwuka nimwe ku mfumu nakuwalongozi chifukwa chi zina lyane. ¹³ Chikwinza ukuwalanjizga imwe umwawi wa chisimichizgo chinyu. ¹⁴ Chifukwa chakwe musimichizge namoyo ginyu pommutafisile kumulandu poinyengo yitakwanine, ¹⁵ pakuti nkhwinza ukuwapa amazwi namahala navyo yumo mwimwe atakwinza ukukana napo ukususka. ¹⁶ Ukwene mukwinza ukuya kuwapapi, kuwayemba, kuwakamu, nakuwamwinyu, powakwinza ukuwawika wamo mwimwe mumfwa. ¹⁷ Mukwinza ukuwengwa ku aliwonsi chifukwa chizina lyane. ¹⁸ Po isisi litakwinza ukunanjika kwitwe lyinyu. ¹⁹ Mukujimba kwinyu mukwinza ukuwa wamoyo. ²⁰ "Popali ponsi mukwinza pakwennia uYerusalemu azinjilizikwa nawakeya, pomumanye ukuti ukupankhuka kwapalamila. ²¹ Po muleche awamu Yudeya wachimbilire mumagamba, wowane mukaya kala wafumemo, nawo wali kunzi kucharo watakinjire mukaya kala. ²² Pakuti aga gomanda gakubwezezga, umwakuti ivinthu vyonsi vyovikalembeka vikwaniliskiche. ²³ Po soka kuwo wali mutukati nakuwowakonsya mumasiku ago! uwupalapala uwukulu sana pacharo , nukulanjika pawanthu awa. ²⁴ Po akwinza ukugwa nupanga uwakukola, powakwinza ukuwalema nukuwatwala kumitundu yonsi, Yerusalemu wakwinza ukupondelezgeka nawamitundu bwelere mupaka munyengo iyawamitundu yakwanilisyika. ²⁵ " Kukwinza ukuwa ivimanyikwilo kwizuwa, nakumwezi,munthondwa, namunsi, amaluko gakwinza kuwa gakupasya uku wakuzizwa nakapomero akanyanja. ²⁶ Awanthu wakwinza ukuzilika nilyoga nukulindilila ivinthu vyovikwinza ukufuma muchalo. Po namaka gakumwanya gakwinza ukuyingana. ²⁷ Powakwinza ukumulola umwana wamunthu akwinza kumawingo namaka nuwuchindamu uwukulu sana. ²⁸ Lyo ivinthu ivi vyamba ukuchitika, mwimilire mwimiche amatwe ginyu, chifukwa ukuwombokwa kwinyu kuli papipi." ²⁹ UYesun akawawuzga wawo muvyili, " Lola kwikwi lyachikunyu, namakwi gonsi. ³⁰ Po nanthi utumatundu twasunda, mukwennia mweka pomukumanya ukuti ichisiku chili papipi. ³¹ Nomba eso, nanthi mwalora ivinthu ivi vikuchitika, mukumanya ukuti uwufumu bwa Chiwuta bwapalamila. ³² Nadi nkhunena kwimwe, umuwilo uwu wutakwinza ukuchilingannia mupaka ivinthu vyonsi visende amalo. ³³ Kumwanya napansi yikwinza ukujenda, ukwene amazwi gane gatakwinza ukumalapo awe. ³⁴ Ukwene mwikale mya mweka, umwakuti amoyo ginyu gatakasanzikanaje nukulya nukung'wela nukukolwa namaghani ghani gawumi, ukuti isiku lila litasenjeleye kwimwe umwakubuchikizga ³⁵ ngati chipingo. Chikwinza paminso aga munthu wonsi wo akwikala pachalo. ³⁶ Ukwene imwe muwe aminso inyengo zgonsi, muputaje ukuti muwe namaka agakukwana ukuti mupulumuche kuvinthu vyonsi ivi vyovyande visende amalo, nukwimilila panthanzi pamwana wamunthu." ³⁷ Po umusanya wuli wonsi akasambizgaga mucharichi, ponuwusiku akafuma kunzi nukwikala kwigamba kokukwitwa Oliveti. ³⁸ Po awanthu wonsi wakalawila pandawi ndawi kucharichi pakumwivwa wuyo.