1 Baad de, kede nina sibu bidaya bita risala ta Al Mesih wa kede nina ruwa gidam le shokol kebir wa timu raba. Kede nina ma rija kutu asas bita touba min hajat al meit wa bita iman be Allah, 2 wole asas bita dirasa fi kalam bita mamudiya, wole kutu ida, wole giyama bita meitin, wa bita hukum al abadiya. 3 Nina bi amulu zede ile kan Allah wodi izin. 4 Ashan saab le del al nur wala le humon wahid marra, del al jeribu hadiya bita sama, del biga shuraka bita Roho al kudus, 5 wa al jeribu kelima ta Allah al kuwes wa guwat bita zaman al jai. 6 Lakin del al rija beiid - saab ashan bi rijau humon tani le touba. De ashan humon selibu Jena ta Allah le nufus bitomon kaman, wa amulu fadiya le Huwo. 7 Ashan wata al bi ashrab moyo ta motoro al bi nenzil fogo, hajat kuwes bi raba fogo le nas al wata de tomon - de yau wata al ligo baraka min Allah. 8 Lakin kan raba fogo shok wa gesh al fogo shok, de ma bi anfa wa bi ligo laana. Nihaya bito bi kun fi nar. 9 Lakin nina iktana be haja kuwes le intakum, ya habaib, hajat ta kulasa, sala kan nina bi wonusu zede. 10 Ashan Allah ma bi zulumu. Huwo ma bi nesitu shokol takum wa muhaba takum al intakum zahiru ashan isim Bito, Ashan intakum kadimu nas Bito al kedisin, wa lisa intakum bi kadimu humon. 11 Nina kan deir ai wahid min intakum kede beinu be nefs guwa le nihaya, ashan bi akid rajaa bitakum. 12 De ashan kede intakum ma tala kaslanin, lakin del al bi jeribu nas al be iman wa sobur humon worisu waad. 13 Ashan wokit Allah amulu waad Bito ma Ibrahim, Huwo halifu be nefsa Bito, ashan kan mafi wahid aazam al Huwo bi halifu be huwo. 14 Huwo kelim, "Ana bi bariku inta wa bi wodi le inta iyal ketir." 15 Kida, Ibrahim agder ligo haja al kan waadu huwo baad ma huwo kan istena be sobur. 16 Nas bi halifu be zol azam min humon. Fi nihaya bita kore kore tomon, humon bi halifu ashan bi wogif ai haja. 17 Wokit Allah karir ashan bi zahir be sura wadeh le del al bi worisu waad Bito gali karar Bito ma bi geiru kulu kulu, Huwo halifu. 18 Huwo amulu ze de ashan be itnin hajat del ma bi geiru - wa be yatu kan bikun saab ashan Allah bi kabasu - nina, al jere wa ligo taziya, nina indu teshji al gowi ashan bi amsuku fi raja al kutu gidam bita nina. 19 Nina indana de ze farmala al sabit wa gowi fi nufus bitana. 20 Ze ma Yesuah, ruwa gubal nina, wa dakalu fi juwa mahal dak bidal nina. Huwo biga reis bita kahana le nihaya baad rutba ta .Meliksadik