¹ فكر المومنين باه يكونوا طايعين للحكام و اصحاب السلطة و يكونوا خاضعين و واجدين باه يعملوا كل ما هو صالح, ² ما يسبوا حتى واحد, ما يكونوش مخاصمين, يكونوا مربيين و بالقدر مع الناس الكل. ³ حتى احنا ثاني كنا قبل ما نعرفوش, و ما نُوخْذُوش الراي واعرين, كنا نجرِِيوْ وراء الشهوة و جميع الملذات, عايشين في الخبث و الحسد, و في البغض لبعضانا. ⁴ بالصح نهار اللي ظهرت محبة الله و اللطف تاعو لجميع الناس, ⁵ خلصنا_مش بفعالنا احنا, بالصح بالرحمة تاعو_ بالغسل تاع لولادة الثانية لحياة جديدة بالروح القدس. ⁶ اللي فاض بيه علينا بيسوع المسيح المخلص تاعنا. ⁷ حتى ولينا بالنعمة تاعو ابرار, و نكونوا وراثة للحياة الدايمة اللي نرجاوها. ⁸ الكلمة صادقة. و ما ذابيا تركزوا على هاذي الامور, باه المومنين بالله يتقواو و يعملوا اعمال الخير. امور صالحة و تنفع الناس. ⁹ اما الهدرة اللي ما عندها حتى معنى, ولنساب, ولحسايف و المنازعات تاع الشرع بعّد عليها, ما فيها حتى فايدة, و لا منفعة. ¹⁰ اما صاحب البدع الظالمة انذرو مرة و زوز, من بعد اجبد عليه. ¹¹ راك عارف واحد كيما هاذا غالط, و في ظلال حكم على روحو بروحو. ملاحظات اخيرة ¹² نهار اللي نبعثلك ارتيماس و الا تيخيكس, في ساع ازرب ارواحلي ل نيكوبوليس, على خاطر ناوي نعدي الشتاء لثمة, ¹³ على قد ما تقدر عاون زيناس عالم شرع الله و ابولس باه يوجدوا ارواحهم للسفر و باه ما ينقصهم شيء. ¹⁴ علم جماعتنا ثاني يعملوا الخير باه يوفروا لحوايج اللازمة, باه ما تكونوش بلا ثمار. ¹⁵ جميع اللي معايا يبلغولك السلام. و سلم انت ثاني على حبابنا في ليمان. النعمة تاع ربي تكون معاكم اجمعين. امين