¹ اذا كان وعظ يكون في المسيح. و اذا كانت تعزية تكون في لمحبة. و اذا كانت مشاركة تكون في الروح. في لحنانة و الروف, ² تزيدوا تفرحوني كي يكون عندكم راي واحد و محبة وحدة بقلب واحد و فكر واحد. ³ بعدوا على التحزب و الغرور, اسلكوا بالتواضع, حطوا خاوتكم خير من ارواحكم. ⁴ و ما يشوفش الواحد فيكم غير لمصلحتو, بالصح كل واحد يفضل الاخرين على نفسو هو. ⁵ فكروا كيما هاذا الفكر تاع يسوع المسيح: ⁶ هو اللي كان التصويرة تاع الله, ما حطش باللي المساواة تاعو مع الله فرصة. ⁷ بالصح حط من روحو, و جا في صورة عبد, ولي كيما واحد من الناس. ⁸ و جعل ذاتو في هيئة تاع بشر, هبط من ذاتو, و طاع حتى للموت, الموت على الصليب. ⁹ على هاذا ثاني, رفعو الله, و اعطاه اسم فوق الاسامي الكل, ¹⁰ باه تركع لاسم يسوع كل ركبة في السماء, و فوق لرض, وتحت لرض, ¹¹ و يستعرف كل لسان باللي يسوع المسيح هو رب, للمجد تاع الله الاب. كونوا نور يضوي في الدنيا ¹² مالا يا لحباب, كيما كنتوا دايما طايعين, مش غير نكون حاضر معاكم برك, بالصح بالاخص حتى في غيابي, تموا الخلاص تاعكم بخوف و رعدة, ¹³ على خاطر الله هو يعمل فيكم باه يجعلكم راغبين وقادرين على رضايتو. ¹⁴ اعملوا كل شيء بلا ما تدمروا و بلا ما تتجادلوا, ¹⁵ حتى تكونوا صافيين بلا لوم في حتى شيء, و ابناء الله حاجة ما تعيبكم في وسط جيل اعوج و فاسد, تضوِيوْ في وسطهم كي النجوم في السماء. ¹⁶ حاكمين في كلمة لحياة, نفخر بيكم في نهار المسيح, باللي ما تعبتش و ما سعيتش على جالكم باطل. ¹⁷ بالصح حتى لو كان دمي يسيح ضحية على جال فايدة الايمان تاعكم, نسعد و نفرح معاكم الكل. ¹⁸ على هاذا الشيء بالذات اسعدوا انتم ثاني و افرحوا معايا. تيموتاوس وابفرودتس ¹⁹ نتمنى في الرب يسوع المسيح باه نبعث لكم تيموتاوس في اقرب وقت باه نعرف احوالكم و نتهنى عليكم. ²⁰ على خاطر ما عندي حتى واحد اخر الا تيموتاوس يتوله باحوالكم كيما نفسي, ²¹ على خاطر لخرين الكل يحوسوا على مصالحهم مش على الامور اللي تخص يسوع المسيح. ²² و انتم تعرفوا الخبرة تاعو وكيفاه خدم معايا الانجيل كيما خدمة الابن مع باباه. ²³ و ضرك نبعثو عندكم اول ما تبان لخبار على احوالي هنا. ²⁴ و عندي ثقة في الرب باللي انا ثاني راح نشوفكم قريب. ²⁵ و شفت باللي لازم نبعث لكم ابفروديتس خويا, رفيقي و متجند معايا, و المرسول من عندكم باه يساعدني في حوايجي. ²⁶ راه توحشكم الكل و حزن كي عرف باللي سمعتو انو كان مريض. ²⁷ على خاطر مرض و قرّب يموت, بالصح الله حن عليه و حن عليا انا ثاني معاه, باه ما يزيدنيش حزن على حزن. ²⁸ الشيء اللي خلاني نبعثو عندكم بالزربة, باه كي تشوفوه انتوما تفرحوا و انا حزني ينقص. ²⁹ اقبلوه في الرب و افرحوا بيه, و الناس اللي كيما هو اكرموهم. ³⁰ على خاطر وصل للموت على جال خدمة المسيح, و عرض روحو للخطر باه يكمل النقص تاع خدمتي ليكم.