¹ و بعد ما فات السبت, مريم المجدلية و مريم ام يعقوب و يوسي و سالومة شراو الطيب و راحوا باه يدهنوه بيها. ² و في اول الاسبوع في الصباح بكري خلاص مع طلة الشمس راحوا للقبر. ³ و كانوا يقولوا بيناتهم :" شكون راح يزحزح لنا الحجرة على الباب تاع لقبر؟". ⁴ و كي جاو يشوفوا لقاو الحجرة مزحزحة ! على خاطر كانت كبيرة ياسر . ⁵ و كي دخلوا للقبر لقاو واحد الشاب قاعد على ليمين و لابس قشات بيض, حكمتهم الدهشة من الشيء اللي شافوا . ⁶ قال لهم :"علاش راكم حايرين! راكم تحوسوا على يسوع الناصري المصلوب . او قام من بين الموتى! ⁷ بالصح روحوا و قولوا للتلامذة و لبطرس: هو راح يسبقكم للجليل. و لثمة تشوفوه كيما قال لكم ". ⁸ في ساع خرجوا يجريو و هربوا من لقبر, على خاطر جاتهم الحيرة و حكمتهم الرعدة , و ما قالوا لحتى واحد على خاطر كانوا خايفين . يسوع يظهر لمريم المجدلية ⁹ و كي قام في الصباح بكري ف اول الاسبوع اول ما ظهر ظهر لمريم المجدلية , اللي كان خرج منها سبعة شواطن. ¹⁰ و هي راحت عند اللي كانوا معاه لقاتهم يبكيو و ينوحوا و خبرتهم بالشيء اللي صرى . ¹¹ و هما كي سمعوا بلي راه حي , و بلي هي شافاتو. ما قبلوهاش. ظهورو لزوز من التلامذة ¹² و من بعد ظهربهيئة اخرى ل زوز من التلامذة , و هما ماشيين في الطريق رايحيين للصحراء. ¹³ و هما راحوا وخبروا لخرين , و هكذاك و ما قبلوهمش هما ثاني . يسوع يظهر للتلامذة ¹⁴ و في لخر ظهر للحداش و هما قاعدين , و لامهم على قلة ايمانهم و قساوة قلوبهم, على خاطر ما صدقوش اللي قالولهم بلي شافوه قام . ¹⁵ وقال لهم :" روحوا للعالم اجمع و بشروا بالانجيل للخلق الكل . ¹⁶ اللي يامن و يتعمد يمنع . و اللي ما يامنش يتحاسب . ¹⁷ و هاذي المعجزات تتبع المؤمنين : يخرجوا الشواطن بإسمي . و يهدروا بلغات جديدة . ¹⁸ و يهزوا لحنوشة . و كي يشربوا سم قاتل ما يضرهمش , و يحطوا يديهم على المرضى يبراو ". الرب يسوع يطلع للسماء ¹⁹ و من بعد ما كلمهم الرب تهز للسماء, و جلس على يمين الله . ²⁰ اما هما خرجوا وراحوا يبشروا في كل مكان , و الرب يعمل معاهم و يثبت الكلام بالايات التابعة . امين .