¹ ولى يسوع ركب في الفلوكة و قطَع للجيهة الاخرى و رجع للمدينة تاعو وين يسكن. ² و جابو لو واحد مشلول هازينو في الفراش. كي شاف يسوع الايمان تاعهم قال للراجل المشلول: "تشجع يا ولدي, ذنوبك مغفورة". ³ و كاين جماعة من تاع الكتبة قالوا في قلوبهم: "هذا الراجل راه يكفر!" ⁴ و عرف يسوع واش قاعدين يخمموا في قلوبهم, و قال لهم: "وعلاه تخمموا غير في الشر في قلوبكم؟ ⁵ واش هو الشيء اللي اسهل, كي نقول: ذنوبك مغفورة, و الا كي نقول: نوض امشي؟ ⁶ بالصح باه تعرفوا باللي ابن الانسان عندو سلطان على لرض باه يغفر الذنوب". و قال لهاذاك المشلول: "نوض هز فراشك و روّح لدارك!". ⁷ وقف الراجل و روّح لدارو. ⁸ و كي شافو الناس هذا الشيء تعجبوا و سبحوا الله اللي مد للناس سلطان كيما هذا. يسوع ينادي متى ⁹ و كي كان يسوع معدي من لثم شاف واحد قاعد و يلم في لغرامة. اسمه متى. قالو: "تبعني". وقف و راح يتبع فيه. ¹⁰ و كي كان مريّح في الدار, جاو جماعة المكّاسين و ناس ياسر من المجرمين و قعدوا مع يسوع و التلامذة تاعو. ¹¹ و كي شافوا الفريسيين هذا الشيء قالوا للتلامذة: "علاه المعلم تاعكم ياكل مع المكاسين و المجرمين؟". ¹² كي سمعهم يسوع قال لهم: "لعباد الصحاح ما يحتاجوش للطبيب بالصح المرضى همّا اللي يحتاجوا للطبيب. ¹³ روحوا افهموا واش يقصد كي قال: انا نحوس على الرحمة مش على الذبيحة, ما جيتش باه نقول للصالحين يتوبوا بالصح نقول للمذنبين يتوبوا". واحد يسقسي على الصوم ¹⁴ في هاذاك الوقت جاو عندو التلامذة تاع يوحنا و قالوا لو: "علاه احنا و الفريسيين نكثروا من الصوم, اما التلامذة تاعك ما يصوموش؟". قال لهم يسوع: "يقدروا امالين العرس يحزنوا كي يكون لعريس معاهم؟ ¹⁵ بالصح تجي ايامات يترفع فيها العريس من وسطهم, في هاذاك الوقت يصوموا. ¹⁶ ما كانش اللي يطبب ثوب قديم بطبة جديدة, على خاطر تتكمش الطبة و تزيد تقطع الثوب, و تولي الرقعة اكبر من قبل. ¹⁷ و ما يحطوش الشراب الجديد في القربة لقديمة, لا تتشقق القربة, يسيح الشراب و تفسد القربة. بالصح يحطوا الشراب الجديد في قربة جديدة و هكا يربحوهم في زوز". بنت يايرس تقوم من الموت و مرى عندها نزيف تنال الشفاء ¹⁸ و كي كان يكلم فيهم بهذا لكلام, جاء عندو واحد القايد و سجد ليه و قال: "بنتي ماتت ضرك برك, ارواح معايا حط يدك عليها تحيا". ¹⁹ وقف يسوع وراح معاه هو و التلامذة تاعو. ²⁰ و كانت واحد لمرى عندها نزيف دم من اثناش ن عام جات وراه و مست الحاشية تاع قشو, ²¹ على خاطر قالت بينها و بين روحها: "لو كان نمس برك الحاشية تاع قشو نبرى". ²² تلفت لها يسوع وشافها, و قال لها: "ثيقي يا بنية, ايمانك شفاك". و في هاذيك الساعة بالذات ارتاحت لمرى من المرض اللي صابها. ²³ و كي وصل يسوع لدار القايد, شاف الناس يندبوا و الغاشي فوق بعضاه, ²⁴ قال لهم: "بعدوا, الطفلة ما ماتتش راهي راقدة برك". ولاو يضحكوا عليه. ²⁵ خرْجوا الغاشي كامل برى و دخل يسوع و كي حكمها من يدها, حيات الطفلة. ²⁶ و تنشر لخبر لهاذيك الجوايه كاملة. زوز عميان ينالوا الشفاء ²⁷ و كي كان يسوع معدي من لثم تبعوه زوز عميان و همّا يعيطوا و يقولوا: "ارحمنا يا بن داود!", ²⁸ و كي وصل للدار دخلوا عندو, قال لهم يسوع: "تامنوا باللي نقدر ندير لكم هذا الشيء؟". جاوبوا و قالوا: "نعم, يا سيد نامنوا!". ²⁹ و مسهم يسوع على عينيهم و قال: "يكون لكم على حساب الايمان تاعكم". ³⁰ و تفتحت عينيهم. و وصاهم يسوع و قال لهم: "عندكم, واحد ما يسمع بهذا الشيء اللي صرى!". ³¹ بالصح همّا خرجوا من لثم و نشروا لخبر في هاذيك لبلاد كاملة. واحد بكوش ينال الشفاء ³² و كي كانوا همّا خارجين من عندوا, ³³ كاين وحايد جابولو راجل ساكنو جان و بكوش. و كي خرج منو الجان هدرْ و هو كان بكوش, تعجبوا منو الناس و قالوا: "هذا الشيء عمرو ما صرى في اسرائيل!". ³⁴ اما الفريسيين قالوا: "هذا راه يخرج في الجنون والشواطن بالرايس تاع الشواطن!". الخدّامين راهم قلال ³⁵ و كان يسوع يجول في المدن الكل و الدواور و يعلم في المجامع, و يبشر في الناس ببشارة الملكوت, و يرتح كل مرض و كل ضعف في وسط الشعب. ³⁶ و كي شاف الغاشي كيما هكذا حن عليهم, على خاطر كانوا مقلقين و مطيشين في لرض كي لغنم اللي بلا راعي. ³⁷ وقتها قال للتلامذة تاعو: "لحصاد ياسر بالصح لحصّادة قلال. ³⁸ اطلبوا من مولى لحصاد يبعث حصادة للرزق تاعو".